(יחוח)Yahweh Teem Txim Rau Ib Tsoom Tebchaws

1 Saib nawj, hnub ntawd thiab lub sij hawm ntawd uas kuv pub Yahdah thiab Yeluxalees rov vam meej li qub, 2 kuv yuav sau zog ib tsoom tebchaws huvsi thiab coj lawv los rau hauv lub hav Yehausafas, mas yuav txiav txim rau lawv qhov ntawd vim tej uas lawv tau ua rau kuv haiv neeg Ixayees uas yog kuv qub txeeg qub teg. Lawv ua rau kuv haiv neeg khiav ua sab ua sua rau hauv ib tsoom tebchaws thiab muab kuv lub tebchaws faib, 3 thiab lawv muab kuv haiv neeg rho ntawv saib leejtwg tau, muab tej menyuam tub ua nqe ntiav poj muag cev, muab tej menyuam ntxhais muag pauv cawv txiv hmab haus. 4 Thailab thiab Xaidoos, thiab tag nrho Filixatees tebchaws es, nej muaj plaub abtsi rau kuv? Nej ua pauj rau kuv lov? Yog nej ua pauj rau kuv, kuv yuav ua pauj tej uas nej ua poob sai kawg rau saum nej taubhau tamsid.

5 Nej twb coj kuv tej nyiaj tej kub mus thiab coj kuv tej qhov txhia chaw tsim txiaj mus rau hauv nej tej tsev dab. 6 Nej twb muab cov Yahdah thiab cov Yeluxalees muag rau cov Kilis, thiab muab lawv dob cag coj mus deb lawv lub tebchaws.

 7 Tiamsis nimno kuv yuav tsa lawv sawv tawm hauv tej chaw uas nej muab lawv muag ntawd thiab kuv yuav ua pauj tej uas nej ua poob rau saum nej taubhau. 8 Kuv yuav muab nej tej tub tej ntxhais muag rau hauv Yahdah caj ces txhais tes, mas lawv yuav muab muag rau cov tibneeg Xenpas uas yog lub tebchaws nyob deb kawg. (יחוח)Yahweh hais tej lus no ntag. 9 Cia li tshaj tawm li no rau ib tsoom tebchaws paub. Cia li npaj ua rog, cia li cuab cov tub rog siab loj siab tuab lub zog. Txhib cov tub sawvdaws tuaj ua ke, cia lawv mus ntaus rog. 10 Cia li muab nej tej khais laij teb ntaus ua ntaj, muab nej tej liag tav txiv hmab ntaus ua hmuv. Cia tus uas tsis muaj zog hais tias, Kuv yog tub rog siab loj siab tuab. 11 Ib tsoom tebchaws sawvdaws uas nyob ib ncig, cia li maj nroos tuaj, cia li sau zog ua ke rau qhov ntawd. Au (יחוח)Yahweh, thov coj koj cov tub rog siab loj siab tuab nqes los. 12 Cia ib tsoom tebchaws ras zom zaws tuaj rau hauv lub hav Yehausafas, rau qhov lub chaw ntawd kuv yuav zaum txiav txim rau ib tsoom teb chaws sawvdaws uas nyob ib ncig.

13 Cia li xuas rab liag hlais, rau qhov tej qoob loo siav lawm. Cia li mus tsuj pes ntiag, rau qhov lub qhov tsuam puv lawm. Tej rhawv kua txiv hmab phwj lawm, vim lawv tej kev limhiam ntau kawg li. 14 Tibneeg coob, tib neeg coob kawg hauv lub hav txiav txim, vim yog ze hnub uas (יחוח)Yahweh teem cia lawd rau hauv lub hav txiav txim. 15 Lub hnub lub hli kuj tsaus lawm, tej hnub qub tsis ci lawm.

Foom Koob Hmoov Rau Yahdah

16 (יחוח)Yahweh nthe nqho hauv Xi‑oo, nws tsa suab nrov hauv Yeluxalees tuaj, lub ntuj thiab lub ntiajteb ua zog kais. Tiamsis (יחוח)Yahweh ua lub chaw cawm siav rau nws haiv neeg, ua lub chaw ruaj khov rau cov Ixayees.

 

17 Thaum ntawd nej yuav paub tias kuv yog (יחוח)Yahweh, yog nej Tus Tswv, yog tus uas nyob hauv Xi‑oo uas yog kuv lub roob dawb huv. Yeluxalees yuav dawb huv thiab lwm haiv neeg yuav tsis nkag mus rau hauv lub nroog ntawd dua li lawm. 18 Thaum txog hnub ntawd cawv txiv hmab qab zib yuav nrog saum tej roob los, thiab kua mis yuav ntws saum tej pov roob los, thiab Yahdah txhua lub hav yuav muaj dej ntws, thiab dej cag yuav txhawv ntawm (יחוח)Yahweh lub tuam tsev los ntxooj lub hav Sithis. 19 Iziv tebchaws yuav raug nyob do cuas, Edoos tebchaws yuav ntxeev ua tebchaws moj sab qhua nyob do cuas, vim lawv tau ua limhiam ntais ntuj rau cov Yahdah lawm, thiab lawv ua rau tej tib neeg tsis txhaum los ntshav rau hauv lub tebchaws. 20 Tiamsis yuav muaj tibneeg nyob hauv Yahdah mus ib txhis, thiab nyob hauv Yeluxalees txhua tiam mus li. 21 Kuv yuav ua pauj qhov uas los ntshav ntawd, kuv yuav tsis daws tus uas ua txhaum lub txim, rau qhov (יחוח)Yahweh nyob hauv Xi‑oo.