Kooj Txig Ya Tuaj

1 Cia li tshuab raj kub yaj rau hauv Xi‑oo, cia li tshuab raj ceeb toom saum kuv lub roob dawb huv. Cia cov tibneeg sawvdaws hauv lub tebchaws no tshee hnyo, rau qhov hnub uas (יחוח)Yahweh teem cia tabtom los, tabtom los ze lawm, 2 yog hnub uas tsaus ntuj thiab tsaus dub nciab, yog hnub uas muaj huab thiab tsaus nciab. Muaj ib pab kooj coob coob uas muaj zog heev tuaj laum nkaus saum tej roob nyob tsaus nti yam li duab ntxoov ntxoo. Ib txwm thaum ub los tsis tau txeev muaj li no thiab txij no mus yuav tsis muaj dua ib txhiab ib txhis mus rau txhua tiam tibneeg.

3 Hluavtaws kub ua lawv ntej, nplaim taws cig raws lawv qab. Tom lawv hauv ntej lub tebchaws zoo yam nkaus li lub vaj Edees, tom lawv qub qab zoo yam nkaus li tebchaws moj sab qhua uas nyob do cuas, tsis tshuav ib yam abtsi dim li. 4 Lawv lub cev zoo yam li nees, lawv dhia li tej nees ua rog dhia. 5 Lawv dhia caws qia saum tej ncov roob nrov qas voog yam li tsheb nees ua rog, thiab nrov plij plej yam li nplaim taws hlawv quav nyab, thiab yam li pab tub rog uas muaj zog npaj txhij ua rog. 6 Tej tibneeg pom lawv, mas poob siab nthav, txhua tus ntsej muag thim xem tag.

7 Lawv dhia yam li cov uas txawj ua rog, lawv nce saum ntsa loog yam li tub rog. Lawv mus tau ua ib sob, tsis tig rau sab twg kiag li.

8 Lawv tsis sib txeeb kev mus, nyias mus ncaj nyias xubntiag. Lawv txeem plaws tej cuab yeej uas thaiv kev, tsis muaj abtsi tav tau lawv li. 9 Lawv caws qia rau hauv lub nroog lawv dhia saum tej ntsa loog, lawv nce mus rau hauv tej tsev, lawv nkag tej qhov rais ib yam li tub sab. 10 Lub ntiajteb ua zog kais rau ntawm lawv xubntiag, thiab lub ntuj ntseeg nkaws. Lub hnub lub hli tsaus ntais, tej hnub qub tsis ci lawm. 11 (יחוח)Yahweh nthe nqho rau ntawm nws cov tub rog xubntiag. Nws pab tub rog coob heev, cov uas ua raws li nws hais kuj muaj zog heev. Hnub uas (יחוח)Yahwehteem cia yog hnub uas loj heev thiab txaus ntshai. Leejtwg yuav thev taus?

​

Los Cuag (יחוח)Yahweh Thiaj Tau Kev Hlub

12 (יחוח)Yahweh hais tias, txawm li ntawd kuj xij, nej cia li rov los cuag kuv kawg siab kawg ntsws nimno, thiab yoo mov, quaj thiab quaj ntsuag. 13 Cia li dua nej lub siab tsis yog dua nej lub tsho. Cia li tig rov los cuag (יחוח)Yahweh uas yog nej Tus Tswv, nws yog tus uas hlub thiab khuvleej, nws tsis chim sai, nws txojkev hlub uas ruaj khov muaj nplua mias, nws hloov dua siab tsis tso xwm txheej phem los. 14 Leejtwg yuav paub tias tej zaum nws yuav tig kiag hloov dua siab, thiab tseg tej koob hmoov rau nej, yog tseg qoob loo uas nej yuav xyeem thiab tej cawv txiv hmab uas yuav hliv xyeem rau (יחוח)Yahweh uas yog nej Tus Tswv.

15 Cia li tshuab raj kub yaj rau hauv Xi‑oo, tshaj tawm kom ua kevcai yoo mov, hu kom sawvdaws tuaj txoos ua ke caiv so tiag tiag li.

16 Cia li sau zog cov pejxeem tuaj, cia li tu ib tsoom pejxeem kom dawb huv.

Cia li hu cov laus tuaj, thiab sau zog cov menyuam yaus, thiab cov menyuam noj mis. Cia tus nraug vauv tawm hauv nws lub chaw tuaj, thiab cia tus nkauj nyab tawm hauv nws lub txaj tuaj. 17 Cia cov pov thawj uas ua koom tu (יחוח)Yahweh quaj rau ntawm lub qab khav tuam tsev thiab lub thaj kem nruab nrab, thiab hais tias, Au (יחוח)Yahweh, thov khuv-leej koj haiv neeg, thov tsis txhob cia koj tej qub txeeg qub teg raug ib tsoom tebchaws thuam luag thiab tiag luag ncauj luag lus. Ua cas ib tsoom tibneeg yuav hais tias, lawv Tus Tswv dua twg lawm?

18 (יחוח)Yahweh txawm khib xeeb nws lub tebchaws thiab khuvleej nws haiv neeg.

19 (יחוח)Yahweh thiaj teb nws haiv neeg tias, saib maj, kuv tabtom pub qoob loo thiab cawv txiv hmab thiab roj rau nej, nej thiaj muaj txaus nkaus. Kuv yuav tsis ua rau nej raug ib tsoom tebhcaws thuam luag dua li lawm.

20 Kuv yuav rho cov kooj uas tuaj sab rau hauv lub tebchaws uas qhuav nkig nkuav thiab tsis muaj abtsi. Pab uas ua ntej yuav mus rau hauv lub hiavtxwv uas nyob sab hnub tuaj, pab uas ua qab yuav mus rau hauv lub hiavtxwv uas nyob sab hnub poob. Yuav hnov lawv tej ntxhiab tsw lwj tuaj, vim (יחוח)Yahweh ua haujlwm loj heev. 21 Lub tebchaws es, tsis txhob ntshai, cia li zoo siab thiab xyiv fab, rau qhov (יחוח)Yahweh tau ua tej haujlwm loj kawg lawm. 22 Tej tsiaj qus es, tsis txhob ntshai, vim tej tshav zaub hauv tebchaws moj sab qhua ntsuab tsaus nti, tej txiv ntoo kuj txi txiv, tej txiv cev thiab tej txiv hmab txi txiv ncw ncw.

23 Xi‑oo cov tub es, cia li zoo siab nawj, cia li xyiv fab rau hauv (יחוח)Yahweh uas yog nej Tus Tswv. Nws muab cov nag hauv xyoo cawm nej, nws tso nag ntau kawg los rau nej, muaj nag hauv xyoo thiab nag qab xyoo ib yam li yav thaum ub. 24 Yuav muaj qoob puv nkaus tej tshav ntaus qoob, yuav muaj cawv txiv hmab thiab roj puv tej rhawv phwj yos. 25 Kuv yuav pub kom lub niaj lub xyoos rov zoo li qub rau nej, yuav pauj tej xyoos uas kooj txig kooj ntsuab kooj tshuab kooj me muab noj tag lawd, yog kuv pab tub rog coob coob uas kuv tso los rau hauv nej.

26 Nej yuav tau noj nplua mias thiab tsau npo, mas nej yuav qhuas (יחוח)Yahweh lub npe uas tau ua tej txujci phimhwj pab nej. Kuv haiv neeg yuav tsis raug txaj muag dua li lawm. 27 Nej yuav paub tias kuv nyob hauv nruab nrab cov Ixayees(Israyl), thiab paub tias kuv yog (יחוח)Yahweh, yog nej Tus Tswv, tsis muaj dua lwm tus li. Kuv haiv neeg yuav tsis raug txaj muag dua li lawm.

​

Hnub Uas (יחוח)Yahweh Teem Cia

28 Yav tom qab kuv yuav hliv kuv Tus Ntsuj Plig Dawbhuv rau saum ib tsoom tibneeg sawvdaws. Nej tej tub tej ntxhais yuav cev kuv li lus, nej cov laus yuav ua npau suav, nej cov hluas yuav ua yog toog pom. 29 Lub sijhawm ntawd txawm yog kuv cov tub qhe nkauj qhe los kuv yuav hliv kuv Tus Ntsuj Plig Dawbhuv rau saum lawv. 30 Kuv yuav ua tej txujci phimhwj tshwm saum nruab ntug thiab hauv lub ntiajteb yuav muaj ntshav thiab hluavtaws thiab pa ncho.

31 Lub hnub yuav ntxeev ua tsaus ntuj, lub hli yuav ua ntshav, ua ntej hnub uas loj txaus ntshai uas (יחוח)Yahweh teem cia los txog. 32 Thaum ntawd txhua tus uas thov hu (יחוח)Yahweh lub npe yuav dim. Yuav muaj tibneeg dim hauv Xi‑oo thiab hauv Yeluxalees raws li (יחוח)Yahweh hais cia lawd, thiab cov uas dim ntawd yog yuav muaj cov uas (יחוח)Yahweh hu.