Kooj Txig Noj Lub Tebchaws Du Lug

1 No yog (יחוח)Yahweh tej lus uas hais tuaj rau Yahyl uas yog Pethu-ees tus tub. 2 Nej cov laus, nej cia li mloog zaj no, cov tibneeg hauv lub tebchaws sawvdaws, cia li tig ntsej mloog. Tej no puas txeev muaj tshwm rau nej sim neej lossis tshwm rau nej tej poj koob yawm txwv sim neej li? 3 Cia li hais rau nej tej menyuam paub, thiab cia nej tej menyuam hais rau tej xeeb ntxwv, thiab cia tej xeeb ntxwv hais rau tiam tom qab. 4 Tej uas kooj txig noj tsis tag, kooj ntsuab muab noj, tej uas kooj ntsuab noj tsis tag, kooj tshuab muab noj. tej uas kooj tshuab noj tsis tag, tej kooj me muab noj huvsi. 5 Cov uas qaug cawv es, cia li tsim dheev thiab quaj, cov uas nyiam haus cawv txiv hmab es, cia li quaj nyiav rau qhov cawv txiv hmab qab zib tu nrho ntawm nej lub qhov ncauj. 6 Muaj ib haiv neeg tuaj ua rog rau kuv lub tebchaws, lawv muaj zog heev thiab muaj coob suav tsis txheeb, lawv tej kaus hniav yog kaus hniav tsov ntxhuav, lawv tej los yuaj yog los yuaj maum tsov ntxhuav. 7 Lawv muab kuv tej txiv hmab ua piam tag, thiab muab kuv tej txiv cev ua puam tsuaj tag. Lawv muab tej txiv ntoo laws tawv pov tseg tag, tseg tej kav dawb paug cia. 8 Cia li quaj ntsuag ib yam nkaus li tus nkauj nyab uas hnav khaub seev tsaj quaj nws tus txiv uas yuav thaum tseem hluas. 9 Tej qoob loo uas muab xyeem thiab tej cawv txiv hmab uas hliv xyeem tu nrho ntawm (יחוח)Yahweh lub tuam tsev lawm. Cov pov thawj uas ua koom tu (יחוח)Yahweh kuj quaj ntsuag. 10 Tej teb piam tag, tej av kuj quaj ntsuag, rau qhov tej qoob raug ua puam tsuaj tag, tej cawv txiv hmab tshiab tsis muaj lawm, roj tu nrho lawm. 11 Cov uas ua teb es, cia li poob siab nthav, cov uas tu txiv hmab es, cia li quaj nyiav, vim tsis muaj mog tsis muaj qeb, tej qoob loo hauv teb raug puam tsuaj tag huvsi. 12 Tej txiv hmab kuj tuag tshav, tej txiv cev kuj qhuav tag. Tej txiv ntsiav kws, tej txiv toov laj, tej txiv duaj, thiab tej txiv ntoo huvsi hauv teb kuj tuag tshav tag. Tej kev xyiv fab kuj ploj zuj zus ntawm tibneeg mus lawm. 13 Cov pov thawj es, cia li muab khaub seev tsaj los hnav thiab quaj ntsuag, cov uas ua haujlwm rau ntawm lub thaj xyeem es, cia li quaj nyiav, cov uas ua koom tu (יחוח)Yahweh es, cia li nkag mus thiab muab khaub seev tsaj los hnav ib hmos kaj ntug, rau qhov tej qoob loo uas xyeem thiab tej cawv txiv hmab uas hliv xyeem tu ncua hauv (יחוח)Yahweh lub tuam tsev lawm. 14 Cia li tshaj tawm kom ua kevcai yoo mov, cia li hu kom tuaj txoos ua ke caiv so tiag tiag li, cia li sau zog cov kev txwj laug thiab tag nrho cov pejxeem hauv lub tebchaws sawvdaws tuaj rau hauv (יחוח)Yahweh lub tuam tsev thiab quaj thov (יחוח)Yahweh.

15 Hnub ntawd yuav txom nyem lauj! Hnub uas (יחוח)Yahweh teem cia los ze lawm, yog hnub uas tus uas muaj hwjchim loj kawg nkaus ua kom puam tsuaj. 16 Tej zaub mov tsis raug muab txiav tu nrho ntawm peb xubntiag lov? Txojkev zoo siab thiab kev xyiv fab tsis raug tu nrho ntawm (יחוח)Yahweh lub tuam tsev lov?

17 Tej noob qoob qhuav tag rau hauv av, tej txhab kuj khoob ntshuv. Tej txhab kuj piam tag vim tsis tau qoob kiag li.

18 Tej tsiaj txhu quaj zom zaws xwb lauj! Tej pab nyuj nkag sib chab sib chaws vim tsis muaj tshav zaub, txawm yog tej pab yaj los kuj qaug zog zuj zis.

19 Au (יחוח)Yahweh, kuv tsa suab thov koj, vim yog hluavtaws muab tej tshav zaub hauv tebchaws moj sab qhua kub tag, thiab nplaim taws kub tej ntoo hauv teb tag nrho huvsi.

20 Txawm yog tej tsiaj qus, los kuj quaj thov koj thiab, vim tej hav dej qhuav tag, thiab hluavtaws muab tej tshav zaub hauv tebchaws moj sab qhua kub tag.