Thov Cov Ixayees Rov Los Cuag (יחוח)Yahweh

1 Ixayees es, cia li rov los cuag (יחוח)Yahweh uas yog nej Tus Tswv, nej dawm vim yog tim nej tej kev txhaum txim.

2 Cia li coj tej lus los, thiab rov los cuag (יחוח)Yahweh, cia li hais rau nws tias, thov daws peb tej kev txhaum txim huvsi pov tseg. Thov txais yuav yam uas zoo, mas peb yuav coj tej lus ntawm peb lub qhov ncauj tuaj xyeem.

3 Axilias cawm tsis tau peb lawm, peb yuav tsis caij nees. Peb yuav tsis hu tej uas peb txhais tes ua tias yog peb Tus Tswv dua li lawm. Nyob hauv (יחוח)Yahweh mas tej menyuam ntsuag tau ntsib kev khuvleej.

4 Kuv yuav kho qhov uas lawv fav xeeb kom zoo, kuv yuav ua siab dawb paug hlub lawv kawg nkaus li, rau qhov kuv txojkev chim twb thim ntawm lawv lawm.

5 Kuv yuav zoo li dej lwg rau cov Ixayees, lawv yuav tawg paj li lub paj lilij, lawv yuav nrhau cag tob yam li ntoo ciab  Lenpanoos,

6 lawv yuav ncau ceg nthuav dav, lawv yuav zoo nkauj li tsob ntoo aulib, thiab yuav tsw qab yam li ntoo ciab Lenpanoos.

7 Lawv yuav rov los nyob hauv kuv tus qab duab ntxoov ntxoo, lawv yuav hlob zoo yam li mog thiab qeb, lawv yuav tawg paj yam li tsob txiv hmab, lawv yuav tsw qab zib yam li cawv txiv hmab hauv Lenpanoos.

8 Efa-is es, kuv ntsig txog dab mlom li cas? Kuv yog tus uas teb lawv thiab tsom kwm lawv. Kuv zoo yam li tsob ntoo ciab nplooj suab uas ntsuab tsaus nti thawm xyoo, lawv tawg paj txi txiv yog los ntawm kuv los.

9 Leejtwg ntse, cia nws nkag siab tej no, leejtwg txawj tshuaj saib, cia nws paub tej no, rau qhov (יחוח)Yahweh tej kev yeej raug cai. Cov tibneeg siab ncaj kuj taug txojkev ntawd, cov tibneeg fav xeeb kuj dawm ntog hauv txojkev ntawd.