Ixayees Yuav Puam Tsuaj

1 Thaum Efa-is hais lus, luag tej tshee hnyo, mas nws tau koob meej loj rau hauv cov Ixayees, tiamsis nws teev dab Npa‑as thiaj muaj txim thiab tuag.

2 Nimno lawv tseem ua txhaum ntau zuj zus tuaj, thiab lawv nchuav dab mlom rau lawv pe, yog tej dab mlom nyiaj uas lawv siv lawv lub tswvyim ua, txhua tus yog tej Kws nyiaj li haujlwm. Lawv hais tias, cia li xyeem tsiaj rau tej dab mlom no. Tibneeg nwj tej dab mlom thav nyuj lawm lauj! 

3 Vim li no lawv yuav zoo yam li tej huab pw hav thaum kaj ntug, thiab zoo li tej dej lwg uas ploj tag thaum sawv ntxov, thiab zoo li tej npluag qoob uas cua ntsawj ya tag hauv lub tshav mus, thiab zoo li tej pa ncho uas tawm hauv lub qhov tsev.

4 Kuv yog (יחוח)Yahweh, yog nej Tus Tswv txij thaum nyob hauv Iziv tebchaws los. Nej tsis paub lwm tus timtswv tsuas yog paub kuv xwb, dhau kuv lawm tsis muaj dua ib tug cawmseej li.

5 Kuv yog tus uas saib nej hauv tebchaws moj sab qhua, yog lub tebchaws uas tsis muaj dej haus.

6 Thaum kuv pub rau lawv noj, lawv tau noj tsau. Thaum lawv noj tsau npo lawm, lawv lub siab txawm khav theeb thiab tsis nco qab kuv lawm.

7 Yog li no kuv yuav ua li tus tsov ntxhuav rau lawv, kuv yuav zov kev tos lawv yam li tus tsov pom txwv.

8 Kuv yuav mos lawv yam li tus maum dais uas cov menyuam ploj lawm, kuv yuav dua lawv lub hauv nrob, thiab yuav muab lawv noj rau qhov ntawd ib yam li tsov ntxhuav thiab yam li tsiaj qus dua lawv.

9 Cov Ixayees es, kuv yuav ua kom nej puam tsuaj. Leejtwg yuav pab tau nej?

10 Nimno nej tus vajntxwv nyob qhovtwg uas yuav los cawm nej? Nej cov thawj hauv nej txhua lub moos dua twg tag lawm? Lawv yog cov uas nej hais tias, Thov tsa ib tug vajntxwv thiab cov thawj los kav peb.

11 Vim yog kuv chim kuv thiaj pub nej muaj vajntxwv. Vim yog kuv npau taws kuv thiaj muab tej vajntxwv coj mus.

12 Efa-is tej kev txhaum twb muab qhwv cia lawm, nws lub txim muab khaws cia lawm.

13 Twb mob plab txog caij yug nws lawm tiamsis nws yog menyuam tsis paub tab, rau qhov nws tsis kam tawm hauv plab los raws li lub caij.

14 Kuv yuav txhiv lawv dim hauv tub tuag teb li hwjchim lov? Kuv yuav txhiv lawv dim hauv txojkev tuag lov? Txojkev tuag es, koj tej ua siv ua npog dua twg lawm? Tub tuag teb es, koj tej vij sub vij sw dua twg lawm? Kuv lub qhov muag tsis khuvleej lawm.

15 Txawm yog Efa-is hlob zoo rau hauv nruab nrab nws cov kwvtij, los tej cua sab hnub tuaj yuav tuaj ntawm (יחוח)Yahweh tuaj, thiab ntsawj hauv tebchaws moj sab qhua tuaj. Efa-is lub qhov dej txhawv yuav qhuav thiab nws lub hauv dej cag yuav qhuav qhawv. Tej cua ntawd yuav nplawm tej qhov txhia chaw tsim txiaj huvsi hauv nws tej txhab ya du lug mus.

16 Xamalis yuav ris nws lub txim vim yog nws fav xeeb rau (יחוח)Yahweh, uas yog nws Tus Tswv. Lawv yuav raug hniav ntaj tuag tag. Lawv tej menyuam mos yuav raug muab ntsawm ntuag dhia ua tej dwb daim. Lawv tej pojniam uas suab menyuam yuav raug muab phua plab.