1 Efa-is haus cua xwb, thiab raws cua sab hnub tuaj tas hnub tas hmo. Lawv ua rau kev dag thiab kev ua nruj ua tsiv nthuav dav zuj zus. Lawv nrog Axilias cog lus sib raug zoo thiab thauj roj mus rau Iziv tebchaws.

2 (יחוח)Yahweh muaj plaub rau Yahdah, thiab yuav rau txim rau Yakhauj raws li nws lub neej, thiab ua pauj rau nws raws li nws tau ua.

3 Thaum Yakhauj tseem nyob hauv nws niam lub plab, nws tuav rawv nws tus tijlaug luj taws, thiab thaum nws hlob lawd, nws kuj nrog (יחוח)Yahweh sib ntsuas zog.

4 Nws nrog tus tubtxib saum ntuj sib ntsuas zog thiab kov yeej, nws quaj thiab thov kev hlub. Nws ntsib (יחוח)Yahweh ntawm Npe‑ees thiab (יחוח)Yahweh nrog nws hais lus qhov ntawd, 5 yog (יחוח)Yahweh, Tus Tswv uas muaj hwjchim loj kawg nkaus, (יחוח)Yahweh yog nws lub npe ntag.

6 Nej cia li rov los cuag nej Tus Tswv, thiab tuav rawv txojkev hlub thiab txojkev ua ncaj, thiab tos rawv (יחוח)Yahweh tsis tu li.

7 Tus tub luam uas txhais tes muaj rab teev tsis ncaj, nws nyiam ntxo luag.

8 Efa-is tau hais tias, kuv yeej nplua nuj, kuv muaj nyiaj txiag ntau. Kuv tau tej nyiaj txiag huvsi los tsis muaj leejtwg nrhiav tau kuv ua txhaum muaj txim.

9 Kuv yog (יחוח)Yahweh uas yog nej Tus Tswv, txij thaum nyob hauv Iziv tebchaws los. Kuv yuav ua rau nej nyob hauv tej tsev ntaub dua ib zaug, ib yam li lub sijhawm uas nej ua tej kevcai uas teem cia.

10 Kuv hais rau cov xibhwb cev lus, kuv ua rau lawv ua yog toog ntau zuj zus, thiab kom cov xibhwb cev lus ua paj lug hais rau lawv.

11 Muaj kev phem kev qias hauv Kile‑as mas lawv yuav ploj ntais tag. Lawv muab txiv nyuj xyeem rau hauv Kilakas, mas lawv tej thaj xyeem yuav zoo yam li tej pawg pob zeb uas nyob ntawm tej hniav khais laij teb.

12 Yakhauj khiav mus rau Alas tebchaws, nws ua haujlwm qhov ntawd thiaj yuav tau pojniam, thiab nws yug yaj thiaj tau pojniam.

13 (יחוח)Yahweh siv ib tug xibhwb cev lus coj Ixayees tawm hauv Iziv tebchaws los, thiab siv tus xibhwb cev lus tsom kwm lawv.

14 Efa-is ua rau (יחוח)Yahweh mob siab kawg, (יחוח)Yahweh thiaj cia lawv ris lawv lub txim uas tua tibneeg, thiab yuav ua pauj rau tej uas lawv saib tsis taus nws.