Rau Txim Rau Tej Tebchaws Uas Nyob Ib Ncig Ixayees

No yog Amosyah uas yog ib tug yug yaj hauv lub moos Thekhau-as tej lus uas nws tau pom ntsig txog cov Ixayees rau thaum Uxiyas ua vajntxwv kav Yahdah tebchaws thiab Yau‑as tus tub Yelaunpau‑as ua vaj-ntxwv kav Ixayees tebchaws ua ntej uas ntuj qeeg ob xyoos.

2 Nws hais tias, (יחוח)Yahweh  lub suab nyooj laws hauv Xi‑oo tuaj, thiab nws tsa lub suab nrov hauv Yeluxalees tuaj. Cov uas yug yaj tej tshav zaub qhuav tag, lub ncov roob Khamees tuag tshav.

3 (יחוח)Yahweh  hais li no tias, qhov uas Damaxakas ua txhaum peb zaug tag, los tseem ua zaum plaub thiab, kuv yuav tsis tso qhov uas rau txim tseg li, rau qhov lawv tau muab thob log hlau luam Kile-as.

4 Vim li no kuv yuav tso hluavtaws los rau saum Haxa-ees lub tsev, mas hluavtaws yuav kub Npeehadas tej chaw ruaj khov.

5 Kuv yuav lov Damaxakas tej las rooj pov tseg, thiab rhuav tshem cov tibneeg tawm hauv lub hav Avees mus, thiab ntiab tus uas tuav rawv tus cwj kav hauv lub moos Npe-edees tawm mus. Cov pejxeem hauv Alas tebchaws yuav raug poob tebchaws mus rau lub moos Khis. (יחוח)Yahweh  hais li no ntag.

6 (יחוח)Yahweh  hais li no tias, qhov uas lub moos Kaxas ua txhaum peb zaug tag, los tseem ua zaum plaub thiab, kuv yuav tsis tso qhov uas rau txim tseg li, rau qhov lawv kuav cov pejxeem huvsi tawm tebchaws coj mus cob rau cov Edoos. 7 Vim li no kuv yuav tso hluavtaws los rau saum Kaxas tej ntsa loog, mas hluavtaws yuav kub Kaxas tej chaw ruaj khov. 8 Kuv yuav rhuav tshem cov tibneeg tawm hauv lub moos Asadaus mus thiab ntiab tus uas tuav rawv tus cwj kav hauv lub moos Akheloos tawm mus. Kuv yuav tig kiag kuv txhais tes tawm tsam lub moos Ekhoos, mas cov Filixatees uas tseem tshuav yuav puam tsuaj tag huvsi. (יחוח)Yahweh  hais li no ntag.

9 (יחוח)Yahweh  hais li no tias, qhov uas lub nroog Thailab ua txhaum peb zaug tag, los tseem ua zaum plaub thiab, kuv yuav tsis tso qhov uas rau txim tseg li, rau qhov lawv kuav cov pejxeem huvsi tawm tebchaws coj mus cob rau cov Edoos, lawv tsis nco txog tej lus cog tseg sib raug zoo.

10 Vim li no kuv yuav tso hluavtaws los rau saum Thailab tej ntsa loog, mas hluavtaws yuav kub Thailab tej chaw ruaj khov.

11 (יחוח)Yahweh  hais li no tias, qhov uas cov Edoos ua txhaum peb zaug tag, los tseem ua zaum plaub thiab, kuv yuav tsis tso qhov uas rau txim tseg li, rau qhov lawv tau xuas riam xuas ntaj raws caum lawv tus kwv, thiab tso plhuav txojkev khuvleej pov tseg, lawv txojkev chim muaj tsis tu li, thiab lawv tsis tso lawv tej kev npau taws tseg li.

12 Vim li no kuv yuav tso hluavtaws los rau saum lub moos Themas, thiab hluavtaws yuav kub lub moos Npauxas tej chaw ruaj khov.

13 (יחוח)Yahweh  hais li no tias, qhov uas cov Asmoos ua txhaum peb zaug tag, los tseem ua zaum plaub thiab, kuv yuav tsis tso qhov uas rau txim tseg li, rau qhov lawv tau muab tej pojniam uas suab menyuam tej plab phua hauv Kile-as, xwv lawv thiaj li nthuav lawv lub tebchaws dav tuaj.

14 Vim li no kuv yuav zes taws rau lub moos Lanpas tej ntsa loog, mas hluavtaws yuav kub lub moos ntawd tej chaw ruaj khov, thiab yuav muaj lub suab qw nrov rau hnub uas ua rog, thiab yuav muaj cua daj cuab dub ntsawj rau hnub uas muaj khaub zeeg cua.

15 Lawv tus vajntxwv thiab nws cov thawj yuav ua ke raug poob tebchaws. (יחוח)Yahweh  hais li no ntag.