1 (יחוח)Yahweh  hais li no tias, qhov uas cov Mau-as ua txhaum peb zaug tag, los tseem ua zaum plaub thiab, kuv yuav tsis tso qhov uas rau txim tseg li, rau qhov lawv muab cov Edoos tus vajntxwv tej pob txha hlawv ua hmoov zeb sib.

2 Vim li no kuv yuav tso hluavtaws los rau saum cov Mau-as, mas hluavtaws yuav kub lub moos Khelis‑aus tej chaw ruaj khov, thiab cov Mau-as yuav tuag rau hauv tej suab ua nqaj ua nqug thiab rau thaum muaj suab qw ua rog thiab suab raj kub yaj nrov.

3 Kuv yuav muab tus uas ua thawj kav rhuav tshem tawm hauv lawv mus, thiab yuav tua cov thawj hauv lub tebchaws ntawd sawvdaws nrog nws ua ke. (יחוח)Yahweh  hais li no ntag.

4 (יחוח)Yahweh  hais li no tias, qhov uas cov Yahdah ua txhaum peb zaug tag, los tseem ua zaum plaub thiab, kuv yuav tsis tso qhov uas rau txim tseg li, rau qhov lawv muab (יחוח)Yahweh  txoj kevcai tso tseg, thiab lawv tsis tuav rawv nws tej kab ke. Lawv mloog tej lus dag mus yuam kev ib yam li lawv tej poj koob yawm txwv.

5 Vim li no kuv yuav tso hluavtaws los rau saum Yahdah, mas hluavtaws yuav kub Yeluxalees tej chaw ruaj khov.

​

Rau Txim Rau Cov Ixayees

6 (יחוח)Yahweh  hais li no tias, qhov uas cov Ixayees ua txhaum peb zaug tag, los tseem ua zaum plaub thiab, kuv yuav tsis tso qhov uas rau txim tseg li, rau qhov lawv muab cov tibneeg ncaj ncees muag yuav nyiaj, thiab muab cov tibneeg pluag muag yuav ib nkawg khau.

7 Lawv tsuj tej tibneeg pluag lub taubhau rau hauv cov hmoov av, thiab muab cov tib-neeg txom nyem nyuaj siab thawb pes ntiag mus. Ob txiv tub mus deev tib tug pojniam, ua qias puas tsuas kuv lub npe uas dawb huv.

8 Lawv pw ib sab ntawm txhua lub thaj xyeem dab pw rau saum tej tsoos tsho uas muab los yuam nqe. Hauv lawv tus timtswv lub tuam tsev mas lawv haus cawv txiv hmab uas yog muab ntawm cov uas raug nplua los.

9 Kuv kuj muab cov Amaulais ua puam tsuaj rau ntawm lawv hauv ntej, yog cov tibneeg uas siab yam li tej ntoo ciab, thiab khov yam li tej ntoo qheb. Kuv muab lawv tej txiv uas nyob saud thiab tej cag uas nyob hauv ua puam tsuaj tag huvsi.

10 Kuv kuj coj nej tawm hauv Iziv tebchaws los, thiab coj nej hauv tebchaws moj sab qhua tau plaub caug xyoo, kom nej thiaj tau cov Amaulais lub tebchaws ua nej teej nej tug.

11 Kuv tsa nej cov tub qee leej ua xibhwb cev kuv lus, thiab tsa nej cov tub hluas qee leej ua cov Naxis. Cov Ixayees es, tej no tsis muaj tseeb lov? (יחוח)Yahweh  hais li no ntag.

12 Tiamsis nej tseem yuam cov Naxis haus cawv txiv hmab, thiab txwv cov xibhwb cev lus tias, nej tsis txhob cev lus kiag li. 13 Saib maj, kuv yuav muab nej nias rau hauv nej lub chaw, ib yam li lub tsheb nyuj uas thauj tej qoob puv nkaus nias rau hauv av.

14 Tus tibneeg nrawm yuav tsis muaj peevxwm khiav dim lawm, tus tibneeg muaj zog los yuav tsis muaj zog lawm, tus uas siab loj siab tuab yuav cawm tsis tau nws txojsia.

15 Tus uas tuav rawv hneev yuav sawv tiv tsis tau, tus uas txhais taw nrawm yuav khiav tsis dim, tus uas caij nees yuav cawm tsis tau nws txojsia.

16 Tus uas siab loj siab tuab hauv cov tub rog, los hnub ntawd yuav khiav liab qab tsuas. (יחוח)Yahweh  hais li no ntag.