Tus Xibhwb Cev Lus Tes Haujlwm

1 Cov Ixayees es, cia li mloog tej lus uas (יחוח)Yahweh  hais tawm tsam nej, yog hais tawm tsam tag nrho haiv neeg uas kuv coj tawm hauv Iziv tebchaws los.

2 Tag nrho ib tsoom tibneeg hauv lub ntiajteb no, nej yog haiv neeg uas kuv xaiv cia, mas kuv yuav rau txim rau nej, vim tim nej tej kev txhaum huvsi.

3 Yog ob leeg tsis tau teem tseg cia, yuav mus taug kev ua ke tau thiab lov?

4 Tsov ntxhuav nyooj tom hav zoov rau thaum tsis tau qauv noj lov? Yog thav tsov ntxhuav tom tsis tau abtsi noj mas yuav quaj hauv nws lub chaw nkaum lov? 5 Tsis cuab hlua noog yuav los mag rooj hlua hauv av lov? Yog tsis muaj abtsi mus tsuj rooj hlua, rooj hlua yuav cia li txhais hauv av lov?

6 Tshuab raj kub yaj rau hauv lub moos, tej pejxeem tsis ras lov? Yog (יחוח)Yahweh  tsis ua, tej xwm txheej phem yuav poob los raug lub moos lov?

7 Qhov tseeb (יחוח)Yahweh  yeej tsis npog ib yam abtsi uas nws ua es tsis qhia rau nws cov qhev uas yog xibhwb cev nws li lus.

8 Tsov ntxhuav nyooj lawm, leejtwg yuav tsis ntshai? (יחוח)Yahweh  hais lawm, leejtwg yuav npog tsis cev nws tej lus?

​

Xamalis Yuav Puam Tsuaj

9 Cia li tshaj tawm rau tej chaw ruaj khov hauv lub moos Asadaus thiab tej chaw ruaj khov hauv Iziv tebchaws hais tias, cia li tuaj txoos ua ke rau saum Xamalis tej roob thiab tsa muag saib tej kev ntxhov hnyo ntau kawg thiab tej kev quab yuam hauv lub nroog ntawd.

10 (יחוח)Yahweh  hais tias, cov uas ua lim hiam ntais ntuj thiab ua tub sab thiaj tau nyiaj txiag los khaws cia rau hauv lawv tej chaw ruaj khov, lawv yeej tsis paub ua raws li uas raug cai.

11 Vim li no (יחוח)Yahweh  thiaj hais li no tias, Yeeb ncuab yuav tuaj vij lub tebch-aws no thiab ntaus nej tej chaw tiv thaiv kom pob tag, thiab lws nej tej chaw ruaj khov.

12 (יחוח)Yahweh  hais li no tias, tus uas yug yaj txeeb tau ob ceg lossis ib nplais nplooj ntseg ntawm tsov ntxhuav qhov ncauj li cas, mas cov Ixayees hauv Xamalis yuav tau ib nyuag ceg kaum rooj thiab ib sab chaw pw dim ib yam li ntawd.

13 (יחוח)Yahweh , uas yog Tus Tswv muaj hwjchim loj kawg nkaus hais tias, cia li mloog thiab ua timkhawv tshum Yakhauj caj ces.

14 Hnub uas kuv rau txim rau cov Ixayees tej kev fav xeeb, kuv yuav rau txim rau tej thaj xyeem dab hauv lub moos Npe-ees, thiab tej kub ntawm lub kaum thaj ntawd yuav raug muab txiav poob rau hauv av.

15 Kuv yuav rhuav tej tsev caij ntuj no thiab tej tsev caij ntuj so, kom pob tag ua ke, thiab tej tsev uas xuas kaus ntxhw ua, yuav puam tsuaj, thiab tej vaj tse uas loj zoo nkauj, yuav ploj tag huvsi. (יחוח)Yahweh  hais li no ntag.