Cov Ixayees Tsis Yeem Rov Los Cuag (יחוח)Yahweh

1 Nej cov maum nyuj Npasas uas nyob saum lub roob Xamalis, cia li mloog tej lus no. Nej quab yuam cov tibneeg pluag thiab zuaj cov tibneeg txom nyem, thiab hais rau nej tus txiv tias, cia li muab cawv los rau peb haus.

2 (יחוח)Yahweh  tuav nws txojkev dawb huv cog lus twv hais tias, saib nawj, lub caij lub nyoog uas luag yuav muab nqe lauj los nqe nej mus yeej yuav los, mas nej txhua tus yuav raug luag muab nuv ntses nqe mus tag nrho huvsi.

3 Nej txhua tus yuav tawm hauv tej qhov ntsa loog uas pob ncaj nraim mus, thiab yuav raug muab laim pov tseg rau ntawm Hamoos. (יחוח)Yahweh  hais li no ntag.

4 Nej cia li los rau ntawm Npe-ees thiab ua kev txhaum los maj, cia li los rau ntawm Kilakas thiab ua tej kev fav xeeb ntau zuj zus tuaj los maj, cia li coj tej tsiaj tuaj xyeem txhua tagkis, thiab coj ib feem kaum tuaj txhua txhia peb hnub.

5 Cia li muab tej ncuav xyaw keeb los hlawv xyeem ua tsaug, thiab tshaj tawm txog tej uas nej zoo siab pub thiab khav txog tej ntawd. Cov Ixayees es, nej yeej nyiam ua li no. (יחוח)Yahweh  hais li no ntag.

6 Thoob plaws hauv nej txhua lub moos kuv cia nej tej kaus hniav tau so, thiab cia nej tu ncua tsis muaj mov noj rau hauv nej txhua lub chaw,los nej tseem tsis rov los cuag kuv. (יחוח)Yahweh  hais li no ntag.

7 Tseem tshuav peb lub hlis mam li txog caij hlais qoob, tiamsis kuv tav tsis pub nag los rau nej tej teb. Kuv tso kom nag los rau ib moos, hos tav tsis pub nag los rau lwm lub moos, kom nej tej qoob qhuav tag.

8 Kom ob peb lub moos uas tsis muaj nag los thiaj li tuaj mus nrhiav dej haus rau hauv lub moos uas muaj nag los, tiamsis li ntawd los kuj tsis tau dej txaus nej haus kom nej thiaj li los cuag kuv, los nej tseem tsis rov los cuag kuv thiab.  (יחוח)Yahweh  hais li no ntag.

9 Kuv ua rau nej tej qoob ua npluag thiab tuaj pwm, kuv ua rau nej tej vaj thiab nej tej vaj txiv hmab puam tsuaj tag, kooj txig noj nej tej txiv cev tej txiv aulib tag, los nej tseem tsis rov los cuag kuv. (יחוח)Yahweh  hais li no ntag.

10 Kuv tso tej mob kis uas muaj rau hauv Iziv tebchaws los raug nej, kuv xuas hniav ntaj tua nej tej tub hluas pov tseg, thiab coj nej tej nees mus, kuv ua rau nej tej yeej ua rog tsw lwj ntxiag rau hauv nej qhov ntswg, los nej tseem tsis rov los cuag kuv. (יחוח)Yahweh  hais li no ntag.

11 Kuv muab nej ib txhia rhuav tshem ib yam li (יחוח)Yahweh  rhuav tshem lub moos Xaudoos thiab lub moos Kaumaulas, mas nej zoo li tus tw taws uas luag thau hauv cub tawg los, los nej tseem tsis rov los cuag kuv.(יחוח)Yahweh  hais li no ntag.

12 Cov Ixayees es, vim li no, kuv yuav ua li no rau nej. Cov Ixayees es, vim kuv yuav ua li no rau nej, cia li npaj ntsib nej tus timtswv.

13 Tus uas puab tej roob thiab tsim tej cua, thiab hais tej uas nws xav tseg rau tibneeg paub, yog tus uas muab kaj ntug ua qhov tsaus ntuj lawm, thiab mus los saum tej chaw siab hauv lub ntiajteb, nws lub npe hu ua (יחוח)Yahweh , yog Tus Tswv uas muaj hwjchim loj kawg nkaus.