Yauxej Cov Tijlaug Mus Yuav Mov Noj Hauv Iziv Tebchaws

1 Thaum Yakhauj paub tias hauv Iziv tebchaws muaj mog thiab qeb, nws thiaj hais rau nws cov tub tias, ua cas nej nyob sib zooj li kod?

2 Nws thiaj hais tias, kuv hnov xov tias, hauv Iziv tebchaws, muaj mog thiab qeb. Cia li mus yuav mog thiab qeb qhov ntawd los rau peb kom peb thiaj li muaj txoj sia nyob tsis tuag tshaib.

3 Yahxej kaum tus tijlaug thiaj li mus yuav mov noj hauv Iziv tebchaws.

4 Tiamsis Yakhauj tsis tso Yahxej tus kwv Npeeyamees nrog cov tijlaug mus, nws ntshai tsam ces muaj xwm li cas rau Npeeyamees.

5 Ua li no, Ixayees cov tub thiaj li nrog luag tej ua ke mus yuav mog thiab qeb, vim kev tshaib nqhis muaj thoob plaws Khana‑as tebchaws.

6 Yahxej yog tus thawj uas kav lub tebchaws. Nws yog tus uas muag qoob loo rau tej pejxeem sawvdaws. Yahxej cov tijlaug kuj tuaj pe nws khwb ti nkaus av.

7 Thaum Yahxej pom nws cov tijlaug, nws kuj paub lawv, tiamsis nws ua txuj tsis paub, mas hais nyaum nyaum rau lawv tias, nej tuaj qhovtwg tuaj? Lawv teb tias, peb tuaj hauv Khana‑as tebchaws tuaj, yog peb tuaj yuav mov noj.

8 Yahxej yeej paub cov tijlaug, tiam-sis cov tijlaug tsis paub nws li lawm.

9 Yahxej nco txog txoj yog toog uas nws tau ua pom lawv, nws thiaj hais rau lawv tias, nej yog tibneeg tshuaj tebchaws, nej tuaj saib peb

teb­chaws qaug zog qhov twg xwb.

10 Lawv teb tias, yawg hlob, tsis yog li ntawd. Peb uas yog koj cov tub qhe, tuaj yuav mov noj xwb.

11 Peb sawvdaws koom tib leej txiv, peb yog tibneeg ncaj ncees, peb uas yog koj cov tub qhe, tsis yog tuaj tshuaj teb­chaws.

12 Yahxej hais rau lawv tias, tsis tseeb, yeej yog nej tuaj saib lub tebchaws qaug zog qhov twg xwb.

13 Lawv teb nws tias, peb uas yog koj cov tub qhe, muaj kaum ob leeg kwvtij, koom tib leej txiv uas tseem nyob hauv Khana‑as teb­chaws. Hnub no tus kwv ntxawg tseem nrog txiv nyob, hos muaj ib tug kwv tsis nyob lawm.

14 Yahxej hais rau lawv tias, qhov uas kuv hais tias, nej tuaj tshuaj teb­chaws ntawd muaj tseeb tiag.

15 Kuv yuav sim nej li no. Muaj Falaus uas muaj txojsia nyob pom, nej yuav tawm tsis tau ntawm qhov chaw no mus li, mus txog thaum nej tus kwv ntxawg tuaj txog ntawm no tso.

16 Cia nej tso ib tug mus coj tus kwv ntxawg tuaj, tiamsis nej cov yuav nyob hauv tsev lojfaj xwv thiaj tshuaj tau nej tej lus saib nej hais tseeb los cuav. Yog tsis ua li ntawd, mas muaj Falaus uas muaj txojsia nyob pom, nej yeej yog tibneeg tshuaj teb­chaws xwb.

17 Yahxej txawm muab cov tijlaug kaw rau hauv tsev lojfaj tau peb hnub.

18 Hnub peb Yahxej hais rau lawv tias, ua li no mas nej thiaj dim txojsia, vim kuv paub ntshai (יחוח)Yahweh.

19 Yog tias nej yog tibneeg ncaj ncees tiag, mas cia nej ib tug nyob raug kaw rau hauv tsev lojfaj, es dua lwm tus cia li mus, es thauj mog thiab qeb mus rau nej tsev neeg uas tab tom tshaib plab tau noj.  

20 Thiab coj nej tus kwv ntxawg tuaj cuag kuv. Yog ua li no kuv thiaj paub tias nej hais tseeb tiag, mas nej thiaj tsis tuag. Lawv kuj ua li ntawd.

21 Cov tijlaug sib yws hais tias, qhov tseeb peb tau ua txhaum rau peb tus kwv. Thaum peb pom nws raug txom nyem nyuaj siab, nws thov thov peb los peb tsis mloog nws. Vim li no, txojkev txom nyem no thiaj li poob rov los raug peb ntag lauj.

22 Lunpees hais rau lawv tias, kuv twb hais kom nej tsis txhob ua txhaum rau tus metub ntawd los tsis yog? Tiamsis nej tsis mloog kuv hais li. Yog li no peb thiaj tau ris nws cov ntshav lawm.

23 Lawv tsis paub tias Yahxej nkag siab lawv tej lus, rau qhov thaum lawv hais lus muaj ib tug txhais rau Yahxej. 

24 Yahxej txawm tawm mus quaj quaj, li rov los nrog lawv hais lus. Nws coj Xime‑oos mus khi kiag tab meeg ntawm lawv xubntiag.

25 Yahxej hais kom ntim mog thiab qeb puv nkaus lawv tej seev thiab muab txhua tus tej nyiaj rov qab ntsaws rau hauv txhua tus lub seev, thiab ntim zaub mov rau lawv noj taug kev. Cov qhev kuj ua li ntawd.

​

Cov Tijlaug Rov Mus Khana‑as

26 Cov tijlaug txawm nog nra tsaws rau nees luav thiab tawm mus.

27 Thaum lawv mus txog chaw so, muaj ib tug qheb nws lub ncauj seev yuav muab qeb rau nws tus nees luav noj, ua ciav pom nws cov nyiaj nyob hauv lub ncauj seev.

28 Nws thiaj hais rau nws cov kwvtij tias, nej saib kuv cov nyiaj luag muab thim rov rau kuv lawm, nyob ntawm ncauj seev. Cov kwvtij poob siab nthav, lawv sib nug ntshai tshee hnyo hais tias, (יחוח)Yahweh ua abtsi li no rau peb?

29 Thaum lawv los cuag lawv txiv Yakhauj hauv Khana‑as teb­chaws lawm, lawv piav txhua yam uas muaj tshwm los ntawd rau leej txiv mloog hais tias,

30 tus yawg uas ua tus thawj kav lub tebchaws ntawd hais nyaum kawg rau peb, thiab hais tias peb yog tibneeg tshuaj tebchaws xwb.

31 Tiamsis peb hais rau nws tias, peb yog tibneeg ncaj ncees, peb tsis yog tuaj tshuaj tebchaws.

32 Peb muaj kaum ob leeg kwvtij koom tib leej txiv, tiamsis ib tug tsis nyob lawm thiab tus kwv ntxawg tseem nrog peb txiv nyob hauv Khana‑as tebchaws.

33 Tus yawg uas kav lub tebchaws ntawd hais rau peb tias, ua li no, kuv thiaj paub tias nej yog tibneeg ncaj ncees. Nej cia li tso ib tug kwvtij nrog kuv nyob es dua lwm tus cia li thauj mog thiab qeb mus rau nej tsev neeg uas tab tom tshaib plab tau noj, es cia li mus.

34 Cia li coj nej tus kwv ntxawg tuaj cuag kuv, kuv thiaj paub tseeb tias nej yog tibneeg ncaj ncees tsis yog tibneeg tshuaj tebchaws, mas kuv mam li muab tus kwvtij no tso dim rau nej, thiab nej yuav tau ua lag ua luam hauv lub tebchaws no.

35 Thaum lawv sawvdaws nchuav lawv tej seev, txhua tus kuj pom nyias hnab nyiaj nyob hauv nyias lub seev. Thaum lawv thiab leej txiv pom tej hnab nyiaj ntawd, lawv kuj poob siab nthav.

36 Yakhauj uas yog lawv leej txiv hais rau lawv tias, nej ua rau kuv ncaim kuv tej menyuam. Yahxej kuj tsis nyob lawm, Xime‑oos kuj tsis nyob lawm, mas nimno tseem yuav coj Npeeyamees mus thiab. Kuv raug tej xwm txheej no huvsi lawm lauj!

37 Lunpees thiaj hais rau leej txiv tias, yog kuv tsis coj Npeeyamees rov los rau koj, koj cia li muab kuv ob tug tub tua pov tseg. Koj cia li muab Npeeyamees rau hauv kuv txhais tes, kuv yuav coj nws rov los rau koj kom tau.

38 Yakhauj hais tias, kuv tus tub yuav tsis nrog koj mus nram Iziv tebchaws, rau qhov nws tus tijlaug kuj tuag lawm, tsuas yog tshuav Npeeyamees tib leeg xwb. Yog nws raug xwm li cas rau thaum nws nrog nej taug kev mus, nej yuav ua rau kuv tus dawb hau no mus ua lwj siab kawg li rau hauv tub tuag teb.