Yauxej Txhais Falaus Txoj Yog Toog

1 Dhau ntawd los tau ob xyoos, Fal-aus txawm ua yog toog tias nws sawv ntawm ntug dej Nais.

2 Ua ciav txawm muaj xya tus maum nyuj rog rog zoo zoo nkauj tawm hauv tus dej Nais los noj tej nplooj tauj deg.

3 Ces txawm muaj dua xya tus maum nyuj yuag yuag tshuav pob txha xwb tawm hauv tus dej Nais raws qab los, los sawv ntawm cov maum nyuj uas rog rog ntawm ntug dej Nais. 

4 Cov maum nyuj uas yuag yuag tshuav pob txha txawm muab xya tus maum nyuj rog rog zoo nkauj ntawd noj tag. Ces Falaus txawm tsim dheev los.

5 Nws rov tsaug zog ua dua ib txoj yog toog pom ib tsob nplej muaj xya hnab zoo thiab puv heev.

6 Ces txawm muaj xya hnab nplej npluag thiab qhuav qhawv tawm raws qab tuaj, vim yog raug cua sab hnub tuaj.

7 Tej hnab nplej npluag ntawd txawm muab xya hnab nplej uas puv zoo nqos huvsi lawm thiab. Ces Falaus txawm tsim dheev, thiab paub tias yog ua yog toog.

8 Thaum kaj ntug nws txhawj heev, nws txawm hais kom hu cov txiv neeb, txiv yaig huvsi thiab cov uas txawj ntse huvsi hauv Iziv tebchaws tuaj cuag nws, mas Falaus piav nws tej yog toog rau lawv mloog, tiamsis tsis muaj leejtwg txhais tau tej yog toog ntawd rau Falaus li.

9 Thaum ntawd tus thawj uas thiab cawv txiv hmab thiaj hais rau Falaus tias, hnub no kuv nco dheev txog kuv tej kev txhaum.

10 Falaus, thaum koj chim rau koj cov tub qhe es muab kuv thiab tus thawj uas ci ncuav kaw rau hauv tus thawj rog uas zov vajntxwv lub tsev.

11 Muaj ib hmos wb ob leeg ua yog toog, kuv thiab nws nyias ua nyias ib txoj yog toog thiab nyias muaj nyias lub ntsiab.

12 Muaj ib tug hluas He-nplais, yog tus thawj rog uas zov vajntxwv tus tub qhe, raug kaw ua ke. Thaum wb ob leeg piav yog toog rau nws mloog, nws kuj txhais tau wb li yog toog lub ntsiab, raws li nyias ua nyias txoj yog toog.

13 Nws txhais wb ob leeg tej yog toog li cas kuj muaj tseeb li ntawd.  Kuv thiaj raug tsa rov ua tes haujlwm qub, tiamsis tus uas ci ncuav raug muab dai tuag lawm.

14 Falaus thiaj hais kom hu Yahxej los, mas lawv thiaj maj nroos mus coj Yahxej tawm hauv lub nkuaj av los. Thaum Yahxej chais hwj txwv thiab hloov ris tsho lawm, nws txawm los cuag Falaus.

15 Falaus hais rau Yahxej tias, kuv ua yog toog tsis muaj leejtwg txhais tau li. Kuv hnov tias thaum koj hnov txoj yog toog lawm, koj kuj txhais tau.

16 Yahxej teb Falaus tias, qhov uas txhais yog toog tsis yog nyob ntawm kuv. Tiamsis (יחוח)Yahweh yog tus uas yuav txhais lub ntsiab zoo rau Falaus.

17 Falaus thiaj hais rau Yahxej tias, hauv kuv txoj yog toog ntawd kuv sawv ntawm ntug dej Nais.

18 Mas pom xya tus maum nyuj rog rog zoo nkauj tawm hauv tus dej Nais los noj nplooj tauj deg.

19 Ces txawm muaj dua xya tus maum nyuj yuag yuag tshuav pob txha tawm tom qab los, thoob Iziv teb­chaws kuv tsis tau pom dua nyuj yuag li no.  

20 Cov maum nyuj yuag yuag tshuav pob txha ntawd txawm muab xya tus maum nyuj rog rog noj tag.

21 Thaum noj tag lawm tsis muaj leejtwg yuav paub tias muab noj tag lawm rau qhov tseem yuag yuag li qub. Ces kuv txawm tsim dheev los.

22 Kuv rov ua dua ib txoj yog toog pom ib tsob nplej muaj xya hnab zoo thiab puv zoo.

23 Thiab muaj dua xya hnab nplej npluag qhuav qhawv nkig nkuav tawm raws qab tuaj, vim yog raug cua sab hnub tuaj.

24 Cov hnab nplej npluag ntawd txawm muab xya hnab nplej puv zoo ntawd nqos tag lawm. Kuv piav tej yog toog no rau cov txiv neeb, txiv yaig mloog, tiamsis tsis muaj leejtwg txhais tau.

25 Yahxej txawm hais rau Falaus tias, koj ob txoj yog toog yog tib txoj xwb. Twb yog (יחוח)Yahweh qhia rau Falaus paub txog tej uas (יחוח)Yahweh yuav ua.

26 Xya tus maum nyuj uas zoo ntawd yog xya xyoo, thiab xya hnab nplej puv zoo ntawd kuj yog xya xyoo. Yeej yog tib txoj yog toog xwb.  

27 Xya tus maum nyuj yuag yuag tshuav pob txha uas tawm raws qab tuaj ntaw kuj yog xya xyoo, thiab xya hnab nplej npluag uas raug cua sab hnub tuaj ntsawj qhuav qhawv, kuj yog xya xyoo uas raug kev tshaib nqhis.

28 Muaj tseeb raws li kuv hais rau Falaus no, yog (יחוח)Yahweh qhia rau Falaus paub txog tej uas (יחוח)Yahweh yuav ua.

29 Yuav muaj mov noj nplua mias thoob plaws Iziv teb­chaws xya xyoo.

30 Dhau ntawd yuav raug kev tshaib nqhis xya xyoo, yuav ua rau sawvdaws tsis nco qab txog xya lub xyoo uas muaj noj nplua mias hauv Iziv tebchaws. Txojkev tshaib nqhis ntawd yuav rhuav tshem lub tebchaws.

31 Yuav tsis paub tej kev noj nplua mias, vim tias tej kev tshaib nqhis uas yuav tshwm tuaj no, yuav txom nyem kawg nkaus.

32 Qhov uas Falaus ua ob txoj yog toog no, lub ntsiab txhais hais tias (יחוח)Yahweh twb npaj tej no cia lawm, (יחוח)Yahweh yuav ua kom tshwm los sai sai no.

33 Vim li no, cia Falaus xaiv ib tug uas txawj xav thiab muaj tswvyim, muab tsa ua tus saib xyuas tag nrho Iziv tebchaws.

34 Cia Falaus npaj ib co tibneeg ua tub teg tub taws saib thoob plaws lub tebchaws thiab sau tej qoob loo hauv Iziv tebchaws, ib feem hauv tsib feem rau ncua sijhawm xya xyoo uas qoob loo zoo ntau nplua mias no cia.

35 Mas cia cov tibneeg ntawd sau tej qoob loo hauv xya xyoo zoo zoo uas tab tom yuav los ntawd cia, thiab muab tej qoob loo ntawd khaws cia hauv Falaus lub hwjchim rau hauv tej moos thiab muab ceev cia.

36 Tej qoob loo no yuav muab khaws cia rau xya xyoo uas yuav muaj kev tshaib nqhis tshwm los rau Iziv tebchaws. Ua li no mas lub tebchaws thiaj tsis raug kev tshaib nqhis puam tsuaj tag.

​

Tsa Yahxej Saib Xyuas Tag Nrho Iziv Tebchaws

37 Falaus thiab nws cov tub teg tub taws sawvdaws pom zoo li uas Yahxej hais.

38 Falaus thiaj hais rau nws cov tub teg tub taws tias, peb yuav nrhiav ib tug uas muaj (יחוח)Yahweh tus Ntsuj Plig nrog nraim nws ib yam li tus no tau thiab lov?

39 Falaus thiaj hais rau Yahxej tias, vim (יחוח)Yahweh qhia tej xwm txheej no huvsi rau koj, mas tsis muaj ib tug uas txawj xav thiab muaj tswvyim zoo li koj.

40 Koj yuav saib xyuas tag nrho kuv lub vaj tse, thiab kuv tej pejxeem sawvdaws yuav tau ua raws li koj hais kom lawv ua. Yog hais txog kuv lub zwm txwv, kuv thiaj ua loj dua koj xwb.

41 Falaus hais rau Yahxej tias, kuv tsa koj ua tus uas kav tag nrho Iziv tebchaws.

42 Falaus thiaj hle nws lub nplhaib ntaus cim ntawm nws txhais tes rau Yahxej coj thiab muab ris tsho ntaub mag zoo zoo rau Yahxej hnav, thiab muab saw kub rau Yahxej coj.

43 Thiab kom Yahxej caij vajntxwv lub tsheb uas ob. Muaj tibneeg qw ua nws ntej hais tias, cia li txhos caug. Falaus twb tsa nws kav tag nrho Iziv teb­chaws li no.

44 Tsis tag li ntawd xwb, Falaus kuj hais rau Yahxej tias, kuv yog Falaus, tag nrho Iziv tebchaws yuav tsis muaj ib tug twg tsa tes, tsa taw tau, yuav tau yog koj tso ncauj tso.

45 Falaus thiaj muab Yahxej tis npe hu ua Xafenas Pane‑as, thiab nws muab tus pov thawj Pautifelas hauv lub moos Oo tus ntxhais Axenas rau Yahxej yuav ua pojniam. Yahxej thiaj tawm mus saib thoob plaws Iziv tebchaws.

46 Thaum Yahxej pib ua haujlwm rau Falaus uas ua vajntxwv hauv Iziv tebchaws ntawd, nws hnub nyoog muaj peb caug xyoo. Yahxej txawm tawm ntawm Falaus xubntiag mus mus los los thoob plaws Iziv tebchaws.

47 Xya xyoo uas qoob zoo zoo ntawd, tej teb tau qoob loo ntau nplua mias.  

48 Xya xyoo ntawd Yahxej sau tej qoob loo huvsi ntau nplua mias thoob plaws Iziv tebchaws, thiab muab khaws cia rau hauv tej moos. Tej qoob loo uas tau ntawm lub moos twg kuj muab khaws cia rau hauv lub moos ntawd.

49 Yahxej sau tau qoob loo ntau nplua mias yam li tej xuab zeb ntawm ntug hiavtxwv, ntau heev thiaj tseg tsis suav lawm, vim yog suav tsis txheeb.

50 Thaum tsis tau txog xyoo uas tshaib nqhis, tus pov thawj Pautifelas hauv lub moos Oo tus ntxhais Axenas yug ob tug tub rau Yahxej.

51 Yahxej tis npe rau tus hlob hu ua Manaxes rau qhov nws hais tias, (יחוח)Yahweh ua rau kuv tsis nco qab tej kev txom nyem huvsi thiab tsis nco qab kuv txiv tsev neeg sawvdaws.

52 Nws tis npe rau tus tub yau hu ua Efa‑is. Vim (יחוח)Yahweh pub kuv muaj tub ki huaj vam coob rau hauv lub tebchaws uas kuv raug txom nyem nyuaj siab.

53 Xya xyoo uas qoob loo zoo ntau nplua mias hauv Iziv tebchaws kuj dhau lawm.

54 Xya xyoo uas muaj kev tshaib nqhis txawm pib tshwm los raws li Yahxej tau hais tseg lawm. Tej kev tshaib nqhis ntawd muaj thoob plaws rau hauv txhua lub tebchaws, tiamsis hauv Iziv tebchaws tseem muaj mov noj.

55 Thaum Iziv tebchaws sawvdaws tshaib plab, tej pejxeem kuj qw hu rau Falaus thov mov noj, mas Falaus hais rau cov tib­neeg Iziv sawvdaws tias, cia li mus cuag Yahxej, nws hais li cas, nej ua li ntawd.

56 Thaum kev tshaib nqhis muaj thoob plaws tebchaws, Yahxej txawm qheb txhua lub txhab muag qoob rau cov Iziv, vim muaj kev tshaib nqhis loj heev rau hauv Iziv tebchaws.

57 Tsis yog li ntawd xwb, tag nrho lub ntiajteb kuj tuaj cuag Yahxej hauv Iziv teb­chaws thiaj yuav tau qoob, rau qhov muaj kev tshaib nqhis loj heev thoob plaws lub ntiajteb.