Yauxej Txhais Yog Toog 

1 Tsis ntev tom qab, tus uas thiab cawv txiv hmab rau vajntxwv Iziv thiab tus uas ua ncuav rau vajntxwv ua txhaum rau nkawv Tus Tswv uas yog vajntxwv Iziv.

2 Mas Falaus chim rau ob tug tub teg tub taws ntawd, yog tus thawj uas thiab cawv txiv hmab thiab tus thawj uas ua ncuav.

3 Thiaj muab nkawv kaw rau hauv tus thawj rog uas zov vajntxwv lub tsev, yog nyob hauv lub nkuaj uas kaw Yahxej thiab.

4 Tus thawj rog uas kav cov tub rog zov vajntxwv muab nkawv rau Yahxej saib, mas Yahxej ua koom tu nkawv.  Nkawv raug kaw tau ib ntus.

5 Muaj ib hmos, nkawv puavleej ua yog toog, yog tus uas thiab cawv txiv hmab thiab tus uas ua ncuav rau vajntxwv Iziv, nyias ua nyias ib txoj yog toog, nyias txoj yog toog nyias muaj dua nyias ib lub ntsiab.

6 Thaum kaj ntug, Yahxej tuaj saib xyuas nkawv, mas pom tias nkawv txhawj heev.

7 Nws txawm nug Falaus ob tug tub teg tub taws uas nrog nws raug kaw rau hauv nws tus lospav lub tsev tias, ua cas hnub no neb ntsej muag ntshaus ntshaus li?

8 Nkawv teb tias, wb ob leeg ua yog toog, mas tsis muaj leejtwg txhais rau wb. Yahxej hais rau nkawv tias, qhov uas txhais tau yog toog, nyob ntawm (יחוח)Yahweh los tsis yog? Thov neb piav rau kuv mloog saib.

9 Tus thawj uas thiab cawv txiv hmab txawm piav nws txoj yog toog rau Yahxej mloog hais tias, kuv ua yog toog pom ib tsob txiv hmab nyob ntawm kuv xubntiag.  

10 Tsob txiv hmab ntawd muaj peb tug ceg. Thaum ua cos paj mas txawm tawg paj thiab txi txiv hmab ua tej tauv siav tamsim ntawd.  

11 Mas Falaus lub khob nyob hauv kuv txhais tes, kuv txawm de cov txiv hmab tso kua rau hauv Falaus lub khob thiab, thiab lub khob rau Falaus.

12 Yahxej hais rau nws tias, txoj yog toog txhais li no. Peb tug ceg ntawd yog peb hnub.

13 Tshuav peb hnub saum no, Falaus yuav tsa koj lub taubhau sawv thiab tsa koj los nyob koj lub qub chaw. Koj yuav rov tau thiab lub khob rau hauv Falaus txhais tes yam li yav tag los lawm uas koj ua tus thiab cawv txiv hmab rau nws.

14 Thaum koj tau zoo lawm, thov nco txog kuv thiab thov koj hlub kuv es pab hais txog kuv tej teeb meem no rau Falaus xwv kuv thiaj tawm tau hauv lub tsev no.

15 Qhov tseeb lawv nyiag kuv hauv cov Henplais lub tebchaws los. Thiab hauv lub tebchaws no los kuv kuj tsis tau ua txhaum abtsi uas txaus muab kaw rau hauv lub nkuaj av no.

16 Thaum tus thawj uas ua ncuav pom tias tej lus uas txhais yog toog ntawd zoo, nws txawm hais rau Yahxej tias, kuv kuj ua yog toog pom muaj peb lub choo ncuav txawb saum kuv taubhau.

17 Hauv lub choo uas txawb kiag txheej saud, muaj ob peb yam ncuav ci uas yuav muab rau Falaus, mas muaj noog tab tom noj tej ncuav hauv lub choo uas nyob saum kuv taubhau.

18 Yahxej thiaj teb nws tias, txoj yog toog txhais li no. Peb lub choo ntawd yog peb hnub.

19 Tshuav peb hnub Falaus yuav muab koj lub taubhau nqa kom nrug ntawm koj lub cev. Nws yuav muab koj lub cev dai rau ntawm ib tsob ntoo, mas noog yuav los noj koj cev nqaij.

20 Thaum puv peb hnub, yog hnub uas yug Falaus, nws npaj noj haus rau nws cov tub teg tub taws huvsi, ces txawm tso tus thawj uas thiab cawv txiv hmab thiab tus thawj uas ci ncuav los rau hauv nruab nrab nws cov tub teg tub taws huvsi.

21 Falaus pub tus thawj uas thiab cawv txiv hmab rov tau nyob lub qub chaw, nws rov thiab lub khob rau Falaus txhais tes yam li qub.

22 Hos Falaus muab tus thawj uas ci ncuav dai caj pas tuag raws li Yahxej tau txhais txoj yog toog.

23 Tiamsis tus thawj uas thiab cawv txiv hmab tsis nco txog Yahxej li, tsis nco qab li lawm.