Yauxej Thiab Pautifas Tus Pojniam

(Tubtxib Tes Haujlwm 7:9-10)

1 Yahxej raug coj mus rau nram Iziv tebchaws lawm, mas Pautifas uas yog tibneeg Iziv, uas yog Falaus ib tug thawj rog, yog tus thawj rog uas kav cov tub rog uas zov vajntxwv, yuav Yahxej ntawm cov tibneeg Yisama‑ees uas coj nws tuaj.

2 (יחוח)Yahweh nrog nraim Yahxej nyob, Yahxej tej haujlwm thiaj vam meej. Nws nyob hauv nws tus lospav uas yog tibneeg Iziv lub tsev.

3 Tus lospav pom tias (יחוח)Yahweh nrog nraim Yahxej thiab pom tias (יחוח)Yahweh pub txhua yam uas Yahxej txhais tes ua vam meej tuaj.

4 Yahxej yog tus uas tiam tus lospav, mas nws txaus siab rau Yahxej, nws thiaj tsa Yahxej ua tus uas saib xyuas tag nrho lub cuab lub yig thiab nws tej qhov txhia chaw huvsi.

5 Txij thaum nws tsa Yahxej ua tus uas saib xyuas nws lub cuab lub yig thiab nws tej qhov txhia chaw huvsi, (יחוח)Yahweh kuj foom koob hmoov rau tus tibneeg Iziv ntawd tsev neeg vim yog saib rau Yahxej. (יחוח)Yahweh foom koob hmoov rau nws tej qhov txhia chaw huvsi hauv nws lub vaj lub tsev thiab hauv tej liaj teb.

6 Nws muab txhua yam uas nws muaj tso rau Yahxej saib xyuas. Txij thaum muaj Yahxej lawm, nws tsis txhawj txog ib yam abtsi li, tsuas yog pluas mov uas nws noj xwb. Yahxej yog ib tug ntsej muag zuag plias zoo nraug ntxiag.

7 Nyob tsis ntev, lospav tus pojniam pheej saib saib Yahxej ces txawm thab tias, cia li los nrog kuv pw.

8 Tiamsis Yahxej tsis kam, txawm teb lospav tus pojniam tias, sim xav saib maj, thaum muaj kuv lawm, lospav kuj tsis txhawj txog ib yam abtsi hauv lub vaj lub tsev li, nws muab txhua yam uas nws muaj tso plhuav rau hauv kuv txhais tes.

9 Hauv lub tsev no, nws kuj tsis ua loj dua kuv, nws tsis tseg ib yam abtsi uas tsis muab tso rau kuv li, tsuas yog tseg koj tus kheej xwb, vim koj yog nws tus pojniam.  Kuv yuav ua qhov phem loj no thiab ua txhaum rau (יחוח)Yahweh tau li cas?

10 Txawm yog nws thab Yahxej ib hnub tag ib hnub thiab los Yahxej kuj tsis quav ntsej li, tsis kam nrog nws pw thiab nrog nws nyob.

11 Muaj ib hnub, Yahxej nkag mus ua haujlwm hauv lub tsev, tsis muaj ib tug tub qhe nyob hauv tsev li.

12 Tus pojniam ntawd txawm ntsiab nkaus Yahxej lub tsho thiab hais tias, los nrog kuv pw. Yahxej txawm nti ua lub tsho hle kiag rau hauv tus pojniam ntawd txhais tes thiab khiav tawm rau nraum zoov lawm.

13 Thaum tus pojniam pom tias Yahxej tso plhuav lub tsho tseg rau hauv nws txhais tes khiav rau nraum zoov lawm.

14 Nws txawm qw hu cov tub qhe uas zov tsev los hais tias, saib maj, lospav coj tus tibneeg Henplais los, cia ua saib tsis taus peb. Nws nkag los yuav nrog kuv pw, tiamsis kuv qw nrov.

15 Thaum nws hnov kuv lub suab qw, nws txawm tso plhuav nws lub tsho tseg rau ntawm kuv, khiav tawm rau nraum zoov lawm.

16 Ces tus pojniam ntawd txawm khaws lub tsho ntawd cia mus txog thaum nws tus txiv los tsev. 

17 Ces nws txawm hais tej ntawd rau nws tus txiv tias, tus tub qhe uas yog tibneeg Henplais uas koj coj los nrog peb nyob ntawd, nkag los ua saib tsis taus kuv.

18 Thaum kuv tsa suab qw nrov, nws txawm tso plhuav lub tsho tseg rau ntawm kuv thiab khiav tawm rau nraum zoov lawm.

19 Thaum tus lospav hnov tej lus uas tus pojniam hais rau nws tias, koj tus tub qhe ua li no rau kuv, nws kuj npau taws heev.

20 Tus lospav thiaj muab Yahxej kaw rau hauv lub nkuaj uas kaw cov tib­neeg uas vajntxwv rau txim. Yahxej thiaj raug kaw rau qhov ntawd.

21 Tiamsis (יחוח)Yahweh kuj nrog nraim Yahxej nyob thiab ua txojkev hlub uas ruaj khov tshwm los rau nws, thiab pub kom tus uas saib lub nkuaj txaus siab rau nws. 

22 Tus uas saib lub nkuaj thiaj muab cov uas raug kaw huvsi hauv lub nkuaj tso rau Yahxej saib xyuas. Tej haujlwm huvsi uas ua hauv lub nkuaj, Yahxej yog tus uas yuav tau saib.

23 Mas tus uas saib lub nkuaj tsis saib tej haujlwm uas muab tso rau Yahxej saib xyuas lawm, vim yog (יחוח)Yahweh nrog nraim Yahxej nyob. Txhua yam haujlwm uas nws ua, (יחוח)Yahweh kuj pub kom ua tau tiav zoo heev.