Yahdah Thiab Thamas

1 Thaum ntawd Yahdah ncaim nws cov kwvtij, tsiv mus nrog ib tug tibneeg Adulas uas npe hu ua Hilas nyob lawm.

2 Yahdah txawm pom cov Khana‑as ib tug ntxhais qhov ntawd. Tus ntxhais ntawd txiv hu ua Sua. Yahdah txawm yuav tus ntxhais ntawd ua pojniam thiab mus nrog nws pw ua ke.

3 Tus pojniam ntawd thiaj xeeb tub mas yug tau ib tug tub muab tis npe hu ua Ws.

4 Nws rov qab xeeb tub mas yug tau ib tug tub muab tis npe hu ua Aunas.  

5 Nws yug tau dua ib tug tub muab tis npe hu ua Selas. Thaum yug tus tub no yog nws nyob ntawm lub moos Khexib.  

6 Yahdah thiaj yuav ib tug nyab hu ua Thamas rau Ws uas yog nws tus tub hlob.  

7 (יחוח)Yahweh pom tias Ws uas yog Yahdah tus tub hlob ua phem, (יחוח)Yahweh thiaj muab nws tua lawm.

8 Yahdah txawm hais rau Aunas tias, koj cia li yuav koj niam tij raws li txoj kev txojcai es mus nrog nws pw kom thiaj muaj tub ki rau koj tus tijlaug thiab.

9 Aunas paub hais tias, nws cov noob yuav tsis ua nws caj ces, ces nws nrog nws tus niam tij pw thaum twg los nws pheej muab cov noob ua poob rau pem teb. Nws txhob txwm ua li ntawd kom thiaj tsis muaj menyuam ua nws tus tijlaug feem.

10 (יחוח)Yahweh pom tias qhov uas Aunas ua li ntawd kuj yog ua txhaum, mas (יחוח)Yahweh thiaj muab nws tua pov tseg lawm thiab.

11 Ces Yahdah txawm hais rau Thamas uas yog nws tus nyab tias, koj cia li rov qab mus nyob ua poj ntsuam rau hauv koj txiv tsev mus txog thaum kuv tus tub Selas hlob tiav txiv tso, vim Yahdah ntshai tsam nws tus tub ntawd ho tuag li ob tug tijlaug thiab. Ces Thamas thiaj rov qab mus nrog nws niam nws txiv nyob lawm.

12 Nyob ntev loo ces Yahdah tus pojniam uas yog Sua tus ntxhais txawm tuag lawm. Thaum Yahdah rov zoo siab mentsis lawm, nws txawm nrog nws tus phoojywg Hilas uas yog tibneeg Adulas ua ke mus saib nws cov tub zog txiav plaub yaj pem lub zos Thinaj.

13 Muaj tibneeg hais rau Thamas tias, koj sim saib, koj txiv yawg tab tom tuaj mus txiav plaub yaj pem Thinaj.

14 Ces Thamas txawm hloov kiag cev tsoos poj ntsuam cia, txawm muab ib daim ntaub nyias nyias kauv kiag nws ntsej muag mus nyob ntawm kev tshuam uas yuav nkag rau hauv lub zos Ena‑is thiab yuav mus pem Thinaj, rau qhov nws yeej paub tias Selas hlob tiav txiv lawm, los nws tseem tsis tau mus ua Selas pojniam.

15 Thaum Yahdah pom Tha-mas mas xav hais tias yog ib tug poj muag cev xwb, vim yog Thamas muab ib daim ntaub kauv ntsej muag lawm.

16 Yahdah thiaj txav zog mus hais rau nws tom ntug kev tias, los es kuv yuav nrog koj pw ua ke, rau qhov nws twb tsis paub tias yog nws tus nyab. Thamas txawm hais tias, yog koj nrog kuv pw, saib koj yuav muab abtsi rau kuv.

17 Yahdah teb tias, kuv yuav xa kuv li ib tug menyuam tshis tuaj rau koj. Thamas txawm hais tias, muab ib yam abtsi ua puav pheej cia mus txog thaum koj xa tus menyuam tshis tuaj puas tau?

18 Yahdah txawm nug hais tias, yog li es koj xav yuav abtsi los ua puav pheej cia? Thamas teb tias, thov muab lub nplhaib nrog saw uas koj siv txam txwm, thiab koj tus pas nrig ua puav pheej cia. Yahdah kuj muab rau nws thiab mus nrog nws pw, ces Thamas txawm xeeb menyuam.

19 Nws sawv tsees rov mus tsev muab daim ntaub kauv ntsej muag yaws kiag cia, muab cev tsoos poj ntsuam los hnav kiag.

20 Yahdah muab tus menyuam tshis rau nws tus phoojywg uas yog tibneeg Adulas coj mus txhiv tej uas nws muab nias cia ntawm tus pojniam ntawd txhais tes los, tiamsis mus nrhiav tsis pom tus pojniam ntawd.

21 Nws thiaj nug cov txivneej uas nyob qhov ntawd tias, tus poj muag cev uas nyob ntawm ntug kev hauv Ena‑is no mus dua twg lawm? Lawv teb tias, ntawm no yeej tsis muaj ib tug poj muag cev li.

22 Yahdah tus phoojywg thiaj rov mus hais rau Yahdah tias, kuv nrhiav tsis pom li. Cov txivneej uas nyob ntawd hais tias, yeej tsis muaj ib tug poj muag cev nyob ntawd li.

23 Yahdah txawm hais tias, cia nws khaws tej qhov txhia chaw ntawd cia xwv luag thiaj tsis tau chaw luag wb. Kuv twb muab tus menyuam tshis no xa mus rau nws tiamsis koj nrhiav tsis tau nws xwb.

24 Kwvlam peb lub hlis tom qab, muaj tibneeg hais rau Yahdah tias, Thamas uas yog koj tus nyab mus ua poj muag cev muaj menyuam lawm. Yahdah thiaj hais tias, cia li coj nws tawm mus, muab nws hlawv pov tseg.

25 Thaum lawv tab tom coj Thamas tawm mus, Thamas txawm tso tib neeg mus hais rau txiv yawg hais tias, kuv plab menyuam no yog cov qhov txhia chaw no Tus Tswv tus menyuam. Thiab nws hais tias, thov koj sim ua tib zoo saib lub nplhaib nrog saw uas txam txwm thiab tus pas nrig no yog leejtwg li.

26 Yahdah paub kiag tias yog nws li, nws thiaj hais tias, tus pojniam no ua ncaj dua kuv, vim yog kuv tsis muab nws txis rau kuv tus tub Selas. Yahdah kuj tsis nrog Thamas pw ua ke dua li lawm.

27 Thaum txog caij yug menyuam ua ciav yog ib khub menyuam ntxaib nyob hauv plab.

28 Thaum tab tom yug mas ib tug menyuam txawm cev tes tshwm los ua ntej. Tus pojniam uas pab yug menyuam muab ib txoj xov liab khi txhais tes, mas hais tias, tus no xub yug.

29 Thaum uas tus menyuam ntawd nkaum tes lawm, txawm yug tau dua ib tug ua ntej. Tus pojniam uas pab yug menyuam txawm qw hais tias, Eb, txeem li cas los, mas thiaj muab tis npe hu ua Peles.

30 Dhau ntawd, tus uas khi txoj xov liab ntawm txhais tes li yug los, thiaj muab tis npe hu ua Xelag.