Yauxej Thiab Nws Cov Tijlaug

1 Yakhauj nyob hauv Khana‑as tebchaws uas nws txiv los ua qhua nyob.

2 Ntawm no mus yog hais txog Yakhauj tsev neeg. Thaum Yahxej hnub nyoog muaj kaum xya xyoo, nws nrog cov tijlaug yug yaj yug tshis. Nws nrog tus nkauj qhe Npihas thiab Xilapas cov tub nyob ua ke. Nkawv yog nws txiv ob tug niam yau. Yahxej coj tej uas cov tijlaug ua tsis zoo los piav rau leej txiv mloog.

3 Ixayees nyiam Yahxej heev dua nws cov menyuam huvsi, rau qhov Yahxej yug rau thaum leej txiv laus heev lawm. Ixayees ua ib lub tsho ntev muaj tes rau Yahxej.  

4 Thaum cov tijlaug pom tias leej txiv nyiam Yahxej heev dua lawv, ces lawv txawm ntxub Yahxej thiab tsis hais ib los zoo rau Yahxej kiag li.

5 Yahxej ua ib txoj yog toog, thaum nws piav rau cov tijlaug mloog tag, lawv yimhuab ntxub nws heev.

6 Yahxej hais rau lawv tias, cia li mloog txoj yog toog uas kuv pom maj.

7 Peb tab tom pav tes nplej tom teb, ua ciav kuv tes nplej sawv nres nroos, hos nej cov tes nplej los nyob vij ib ncig kuv tes nplej thiab pe kuv tes nplej.

8 Cov tijlaug txawm nug Yahxej tias, koj yuav kav peb tiag tiag li lov? Koj yuav muaj hwjchim tswjhwm peb no lov? Lawv yim huab ntxub nws heev, vim yog txoj yog toog thiab nws tej lus.

9 Yahxej kuj rov ua dua ib txoj yog toog, thiab piav rau cov tijlaug mloog hais tias, kuv ua dua ib txoj yog toog, ua ciav pom lub hnub, lub hli, thiab kaum ib lub hnub qub tab tom pe kuv.

10 Thaum nws piav rau leej txiv thiab cov tijlaug mloog, leej txiv yws Yahxej tias, koj txoj yog toog uas koj pom kod yog li cas? Kuv thiab koj niam thiab koj cov kwvtij yuav los txhos caug hauv av pe koj no lov?  

11 Nws cov tijlaug thiaj khib Yahxej hos leej txiv khaws tej no cia twjywm rau hauv nruab siab.

​

Cov Tijlaug Muag Yahxej Rau Iziv Tebchaws

12 Cov tijlaug mus yug leej txiv tej yaj, tej tshis, ze ntawm lub moos Sekhees.

13 Ixayees txawm hais rau Yahxej tias, koj cov tijlaug mus yug yaj yug tshis rau ntawm lub moos Sekhees los tsis yog? Los es kuv yuav txib koj mus saib lawv. Yahxej teb tias, kuv kam mus.

14 Leej txiv txawm hais rau nws tias, mus saib koj cov tijlaug thiab tej yaj, tej tshis, saib nyob zoo li cas, es rov los hais rau kuv paub. Leejtxiv txib nws tawm ntawm lub tiaj Henploos mus, nws thiaj mus rau lub moos Sekhees.

15 Muaj ib tug yawg ntsib Yahxej mus mus los los tom tshav zaub, thiaj nug tias, koj nrhiav abtsi?

16 Yahxej teb tias, kuv nrhiav kuv cov tijlaug. Thov qhia kuv saib lawv yug yaj yug tshis rau qhovtwg lawm.  

17 Tus yawg ntawd hais tias, lawv twb mus lawm, rau qhov kuv hnov lawv sib tham tias, cia peb mus rau lub moos Dauthas. Yahxej thiaj raws qab mus ntsib nws cov tijlaug ntawm lub moos Dau-thas.

18 Thaum cov tijlaug pom Yahxej deb deb tuaj tsis tau txog, lawv txawm ntaus tswvyim yuav muab Yahxej tua pov tseg.

19 Lawv hais tias, tus nyuag kws yog toog tuaj ntawm no lawm lauj!  

20 Cia li los es peb muab nws tua thiab muab pov rau hauv ib lub qhov tob tob. Peb hais tias, ib tug tsiaj nyaum muab nws tom noj lawm, es peb sim saib nws tej nyuag yog toog yuav tiav tau li cas.   

21 Thaum Lunpees hnov tej lus ntawd, nws xav pab Yahxej dim hauv lawv txhais tes, nws thiaj hais tias, peb tsis txhob muab nws tua.

22 Lunpees kuj hais rau lawv tias, tsis txhob ua rau nws nqaij ntuag ntshav nrog, cia muab nws pov rau hauv lub qhov tob tob hauv tebchaws moj sab qhua no, tiamsis tsis txhob kov nws kiag li. Nws hais li ntawd kom nws thiaj pab tau Yahxej dim hauv lawv txhais tes es yuav muab xa rov qab rau leej txiv.

23 Thaum Yahxej tuaj txog ntawm cov tij-laug, lawv txawm muab nws lub tsho hle, yog lub tsho ntev muaj tes.  

24 Lawv muab nws pov rau hauv ib lub qhov, yog ib lub qhov dej qhuav.

25 Thaum lawv tab tom noj mov, lawv tsa muag saib pom ib pab tibneeg Yisama‑ees tuaj ntawm Kile-as tuaj. Lawv xuas ntxhuav thauj roj ntoos thiab roj ntoos ua tshuaj, thiab roj tsw qab taug kev mus lawm nram Iziv tebchaws.

26 Ces Yahdah txawm hais rau cov kwvtij tias, yog peb muab peb tus kwv tua thiab muab nws cov ntshav zais los peb yuav tau qabhau abtsi?

27 Cia peb muab nws muag rau cov tibneeg Yisama‑ees, peb tsis txhob kov nws kiag li, rau qhov nws yog peb tus kwv thiab nrog peb koom nqaij koom ntshav. Cov kwvtij sawv daws pom zoo li nws hais.  

28 Mas thaum cov tub luam Midees tuaj txog, lawv txawm rho Yahxej hauv lub qhov los muag rau cov tibneeg Yisama‑ees, nees nkaum Sekhees nyiaj. Cov tibneeg Yisama‑ees txawm coj Yahxej mus rau Iziv tebchaws.

29 Thaum Lunpees rov los txog ntawm lub qhov tsis pom Yahxej nyob hauv lub qhov lawm, nws txawm dua rhe nws lub tsho,

30 thiab rov mus rau ntawm nws cov kwv thiab hais tias, tus kwv ntawd ploj lawm, es kuv yuav ua li cas?

31 Ces lawv txawm muab Yahxej lub tsho los, thiab tua ib tug tshis, thiab muab lub tsho raus rau hauv cov ntshav ntawd.

32 Lawv txawm xa lub tsho ntev uas muaj tes ntawd mus rau leej txiv thiab hais tias, peb pom lub tsho no. Koj sim saib, yog koj tus tub lub los tsis yog.

33 Leejtxiv paub lub tsho ntawd thiab hais tias, yog kuv tus tub lub tsho tiag, muaj ib tug tsiaj nyaum muab nws tom noj lawm lauj. Yahxej raug dua ua tej dwb daim tag lawm lauj!

34 Yakhauj dua rhe nws lub tsho muab khaub seev tsaj los hnav thiab quaj quaj nws tus tub tau ntau hnub. 

35 Mas nws tej tub tej ntxhais sawvdaws tuaj nplij nws lub siab, tiamsis nws tsis yuav lawv tej lus nplij li. Nws hais tias, tsis yuav li, kuv yuav quaj ntsuag mus rau hauv tub tuag teb kom ntsib kuv leej tub qhov ntawd. Nws txiv quaj nws li no ntag.

36 Lub sijhawm ntawd cov tibneeg Midees kuj muab Yahxej muag rau Pautifas hauv Iziv tebchaws. Nws yog Falaus ib tug thawj rog, yog tus thawj rog uas kav cov tub rog uas zov vajntxwv.