Lub Khob Nyiaj Ploj

1 Yahxej hais rau tus saib nws lub tsev tias, cia li ntim mog thiab qeb kom puv cov tibneeg no tej seev npaum li uas      

lawv thauj taus, thiab muab lawv cov nyiaj ntsaws rau hauv lawv txhua tus lub ncauj seev.

2 Thiab muab kuv lub khob nyiaj ntsaws rau hauv tus kwv ntxawg lub seev ua ke nrog cov nyiaj yuav tej mog thiab qeb. Nws txawm ua raws nraim li Yahxej hais.

3 Thaum kaj ntug, nws thiaj tso lawv cov tibneeg ntawd thiab tej nees luav rov mus tsev.

4 Thaum lawv tawm hauv nroog mus tsis tau deb heev, Yahxej hais rau tus uas saib xyuas tsev tias, cia li sawv tsees mus caum cov tibneeg ntawd, thaum mus caum cuag, cia li nug tias, ua cas nej yuav ua kev phem pauj kev zoo? Ua cas nej nyiag kuv lub khob nyiaj los lawm?

5 Lub khob ntawd yog kuv Tus Tswv lub khob haus thiab siv twv txog tom hauv ntej. Nej ua li no mas yog ua txhaum.

6 Thaum nws caum cuag lawv nws hais tej lus ntawd rau lawv.

7 Lawv txawm teb tias, yawg hlob, ua cas koj hais li kod? Peb uas yog koj cov tub qhe, peb yeej tsis tau ua li kod.

8 Sim xav saib maj, cov nyiaj uas peb pom hauv peb tej ncauj seev, peb tseem coj hauv Khana‑as tebchaws rov qab tuaj rau koj. Peb yuav nyiag tej nyiaj tej kub hauv koj Tus Tswv lub tsev tau li cas?

9 Yog koj pom lub khob ntawd nyob hauv peb cov uas yog koj tub qhe no leejtwg, koj kuj muab tus ntawd tua, thiab peb tseem yuav mus ua koj uas yog peb Tus Tswv li qhev thiab.

10 Nws hais tias, cia ua raws li uas nej hais. Yog kuv pom lub khob ntawd nyob ntawm leejtwg mas tus ntawd yuav tau ua kuv tus qhev, hos nej cov mas tsis txhaum.

11 Lawv sawvdaws maj nroos nyias tsaws nyias tej seev rau hauv pem teb, thiab qheb tej ncauj seev.

12 Tus uas saib tsev thiaj tshawb saib tus tub hlob li mus txog ntua tus tub ntxawg li, mas pom lub khob nyob hauv Npeeyamees lub seev.

13 Lawv txawm dua rhe lawv tej tsho thiab txhua tus tsaws tej nra rau nees luav thauj rov los rau hauv lub nroog.

14 Thaum Yahdah thiab cov kwvtij los txog Yahxej lub tsev, Yahxej tseem nyob hauv tsev. Lawv thiaj khwb nkaus rau hauv av ntawm Yahxej xubntiag.

15 Yahxej thiaj hais rau lawv tias, nej ua abtsi li no? Nej tsis paub tias tibneeg zoo li kuv no mas paub tau tej uas yuav muaj tshwm los rau tom hauv ntej lov?

16 Yahdah teb tias, peb yuav teb li cas rau kuv Tus Tswv? Peb yuav hais li cas? Peb yuav hais daws tej no li cas? (יחוח)Yahweh muab peb uas yog koj cov tub qhe tej kev txhaum nthuav los lawm. Yawg hlob, peb txhua tus thiab tus uas pom lub khob nyob hauv nws txhais tes yuav ua koj qhev.

17 Tiamsis Yahxej hais tias, kuv yeej los yuav tsis ua li ntawd. Tsuas yog tus uas pom lub khob nyob hauv nws txhais tes ua kuv tus qhev xwb. Tiamsis dua li nej cov mas cia li rov qab mus kom txog nej txiv yam kaj siab lug.

​

Yahdah Thov Kom Tso Npeeyamees

18 Yahdah thiaj nkag mus cuag Yahxej hais tias, yawg hlob es, kuv uas yog koj tus tub qhe thov hais ib lo lus rau koj. Thov koj tsis txhob chim rau kuv uas yog koj tus tub qhe, rau qhov koj zoo tam li Falaus ntag.

19 Koj nug peb uas yog koj cov tub qhe tias, nej tseem muaj txiv thiab muaj kwv thiab lov?

20 Peb thiaj teb kuv Tus Tswv tias, peb muaj txiv, nws laus laus li lawm thiab muaj ib tug kwv yau uas yug rau thaum txiv laus lawm. Tus kwv yau ntawd tus tijlaug kuj tuag lawm, cov uas nrog nws koom niam tshuav nws ib leeg xwb. Txiv hlub tus ntawd heev.

21 Koj txawm hais rau peb uas yog koj cov tub qhe tias, coj tus kwv ntawd tuaj rau kuv saib ntawm no.

22 Peb thiaj hais rau yawg hlob tias, tus tub hluas no yuav ncaim tsis tau leej txiv kiag li. Yog nws ncaim txiv mus lawm mas txiv yuav tuag xwb.

23 Koj txawm hais rau peb uas yog koj cov tub qhe tias, yog nej tus kwv ntxawg tsis nrog nej tuaj mas nej yuav tsis pom kuv lub ntsej muag dua li lawm.

24 Thaum peb rov mus txog kuv txiv uas yog koj tus tub qhe lawm, peb kuj piav koj tej lus rau nws mloog.

25 Mas thaum peb txiv hais tias, nej rov mus yuav mentsis mov rau peb noj,

26 peb thiaj hais tias, peb mus tsis tau. Yog tus kwv ntxawg nrog peb mus, peb li mus, rau qhov peb yuav tsis pom tus yawg hlob ntawd lub ntsej muag kiag li, yuav yog tus kwv ntxawg nrog peb mus xwb.

27 Kuv txiv uas yog koj tus tub qhe thiaj hais rau peb tias, nej paub tias kuv tus pojniam yug tau ob tug tub rau kuv.

28 Ib tug ncaim kuv lawm mas kuv xav tias tsiaj nyaum muab nws dua noj tag lawm, kuv tsis pom nws los txog niaj hnub nimno li.

29 Yog nej tseem coj tus no ncaim kuv mus es yog nws raug xwm txheej li cas lawm, nej yuav ua rau kuv tus dawb hau no mus ua lwj siab kawg li rau hauv tub tuag teb.

30 Vim li no, yog kuv rov qab mus txog kuv txiv uas yog koj tus tub qhe es tus tub hluas no tsis nrog peb mus, mas thaum kuv txiv uas nws txojsia cog nkaus rau tus tub hluas no,

31 pom tias tus tub hluas no tsis nrog peb rov mus tsev, txiv yuav tuag.  Peb uas yog koj cov tub qhe, yuav ua rau peb txiv tus dawb hau uas yog koj tus tub qhe, mus rau hauv tub tuag teb ua lwj siab kawg li xwb.

32 Kuv uas yog koj tus tub qhe, qhwv kiag tus kwv no rau txiv hais tias, yog kuv tsis coj nws rov los rau koj, kuv yuav ris txojkev txhaum no rau ntawm koj xubntiag mus ib txhis li.

33 Vim li no, thov cia kuv uas yog koj tus tub qhe, nyob tus tub hluas chaw ua koj tus qhev, es thov tso tus kwv nrog cov tijlaug mus.

34 Yog tus tub hluas tsis nrog kuv ua ke, kuv yuav ua li cas rov mus cuag tau kuv txiv? Ntshai tsam yuav pom xwm txheej phem los raug kuv txiv.