Yauxej Qhia Nws Rau Cov Kwvtij Paub

1 Yahxej tauv tsis taus nws lub kua muag tab meeg cov tibneeg sawv-daws uas sawv vij vog nws, nws txawm nthe tias, kom txhua tus cia li tawm ntawm kuv mus, thiaj tsis muaj leejtwg nyob ntawd rau thaum Yahxej qhia nws rau cov kwvtij paub.

2 Mas Yahxej quaj nrov nrov ua rau cov Iziv hnov thiab Falaus tsev neeg tau hnov.

3 Yahxej hais rau nws cov kwvtij tias, kuv yog Yahxej. Kuv txiv tseem muaj txojsia nyob lov? Tiamsis nws cov kwvtij ceeb nkaus tsis txawj teb li cas, vim paub tias yog Yahxej ntag.  

4 Yahxej thiaj hais rau nws cov kwvtij tias, txav los ze kuv maj. Lawv kuj txav los ze. Yahxej thiaj hais tias, kuv yog Yahxej, yog tus kwv uas nej muab muag los rau hauv Iziv tebchaws no.

5 Tiamsis nimno, tsis txhob poob siab, tsis txhob chim rau nej tus kheej, rau qhov uas muag kuv los rau ntawm no. Yog (יחוח)Yahweh xa kuv ua nej ntej los kom thiaj cawm tau txojsia.

6 Lub tebchaws twb tshaib nqhis tau ob xyoos lawm, tseem tshuav tsib xyoos ntxiv thiab uas yuav tsis laij teb tsis muaj qoob sau.

7 (יחוח)Yahweh xa kuv ua nej ntej los kom thiaj tuav tau nej tshuav nyob hauv ntiajteb thiab cawm tau nej cov tibneeg kom muaj txojsia nyob coob coob.

8 Yog li no, tsis yog nej xa kuv los rau ntawm no, tiamsis yog ()Yahweh xa kuv los.  (יחוח)Yahweh tsa kuv ua Falaus txiv, thiab ua Tus Tswv uas saib xyuas Falaus lub cuab huvsi thiab ua tus thawj kav Iziv tebchaws huvsi.  

9 Nej cia li maj nroos mus cuag kuv txiv thiab hais rau nws tias, koj tus tub Yahxej hais li no tias, (יחוח)Yahweh tsa kuv ua tus thawj kav tag nrho Iziv tebchaws lawm. Cia li tsiv los cuag kuv nram no, tsis txhob tos.

10 Koj yuav tau nyob hauv Kausees, koj thiab koj cov menyuam, koj cov xeeb ntxwv, koj tej yaj, tej tshis, tej nyuj, thiab txhua yam uas koj muaj huvsi yuav tau nyob ze kuv.

11 Kuv yuav tu koj qhov ntawd, rau qhov tseem yuav tshaib nqhis tsib xyoos ntxiv thiab. Tsis ua li no, ces koj tsev neeg thiab txhua yam uas koj muaj yuav pluag tag.

12 Nej thiab kuv tus kwv Npeeyamees lub qhov muag pom tias yog kuv lub qhov ncauj hais rau nej ntag.

13 Nej cia li piav rau txiv mloog txog kuv lub meej mom huvsi hauv Iziv tebchaws, thiab txhua yam uas nej pom. Nej cia li maj nroos mus coj kuv txiv los rau nram no.

14 Yahxej khawm nws tus kwv Npeeyamees caj qwb thiab quaj. Npeeyamees kuj khawm Yahxej caj qwb quaj thiab.

15 Yahxej nwj nws cov tijlaug sawvdaws thiab quaj. Dhau ntawd cov kwvtij nrog Yahxej sib tham.

16 Thaum muaj xov hais mus rau hauv Falaus lub vaj lub tsev tias, Yahxej cov kwvtij tuaj, Falaus thiab nws cov tub teg tub taws kuj zoo siab heev.

17 Falaus hais rau Yahxej tias, hais rau koj cov kwvtij tias, nej ua li no, muab nra rau tsiaj thauj thiab rov mus rau Khana‑as teb­chaws.

18 Coj koj txiv thiab nej tsev neeg los cuag kuv, kuv yuav pub thaj av uas zoo kawg hauv Iziv tebchaws rau nej, thiab nej yuav tau noj tej uas zoo tshaj plaws hauv lub tebchaws no.

19 Koj kuj hais rau lawv tias, ua li no, coj tsheb hauv Iziv tebchaws mus tos nej cov menyuam yaus thiab nej cov pojniam thiab coj nej txiv los.

20 Tsis txhob khuvxim nej tej qhov txhia chaw pev, rau qhov tej uas zoo kawg hauv Iziv tebchaws yog nej li lawm.

21 Ixayees cov tub kuj ua raws li ntawd. Yahxej npaj tsheb rau lawv raws li Falaus hais thiab muab mov rau lawv noj taug kev.

22 Nws muab tej tsoos tsho zoo zoo rau lawv ib leeg ib ce. Tiamsis nws muab peb puas Sekhees nyiaj thiab tsib ce tsoos zoo zoo rau Npeeyamees.

23 Yahxej xa tej no mus rau nws txiv, yog kaum tus nees luav thauj tej uas zoo kawg hauv Iziv tebchaws mus thiab kaum tus maum nees luav thauj mog thiab qeb thiab ncuav thiab zaub mov rau leej txiv noj taug kev.

24 Nws txawm xa nws cov kwvtij mus, mas thaum lawv sawv kev mus, nws hais rau lawv tias, tsis txhob sib cav taug kev.

25 Cov kwvtij thiaj tawm hauv Iziv tebchaws mus rau Khana‑as tebchaws mus cuag leej txiv Yakhauj.

26 Lawv hais rau nws tias, Yahxej tseem muaj txojsia nyob. Nws yog tus thawj uas kav tag nrho Iziv tebchaws. Yakhauj nyob hab nuv, vim nws tsis ntseeg tej uas lawv hais.

27 Thaum lawv piav tej lus uas Yahxej hais rau lawv huvsi rau leej txiv mloog thiab thaum Yakhauj pom tej tsheb uas Yahxej xa tuaj tos nws, nws thiaj zoo siab tuaj.

28 Ixayees thiaj hais tias, kuv txaus siab lawm lauj. Kuv tus tub Yahxej tseem muaj txojsia nyob. Kuv yuav mus pom nws ua ntej uas kuv tuag.