(יחוח)Yahweh Tus Tub Txib Saum Ntuj Los Tshwm Ntawm Npaukhis

1 (יחוח)Yahweh tus tubtxib saum ntuj tawm ntawm lub moos Kilakas mus txog lub moos Npaukhis, mas hais tias, kuv coj nej tawm hauv Iziv tebchaws los thiab coj nej los rau hauv lub tebchaws uas kuv cog lus ruaj khov tias kuv yuav pub rau nej tej poj koob yawm txwv. Kuv hais tias, kuv yuav tsis rhuav tej lus uas kuv cog tseg rau nej ib zaug li,

2 thiab nej yuav tau tsis txhob nrog cov tibneeg hauv lub tebchaws no sib cog lus kiag li.  Nej yuav tau muab lawv tej thaj teev dab rhuav pov tseg huvsi.  Tiamsis nej tsis mloog tej lus uas kuv hais.  Nej ua abtsi li no?

3 Yog li no, nimno kuv thiaj hais rau nej tias, kuv yuav tsis ntiab cov tibneeg ntawd khiav ntawm nej hauv ntej mus lawm. Lawv yuav ua yeeb ncuab rau nej thiab lawv tej dab yuav ua rooj hlua cuab nej.

4 Thaum (יחוח)Yahweh tus tubtxib saum ntuj hais tej lus no rau cov Ixayees tag lawd, cov pejxeem txawm tsa suab quaj.

 5Lawv thiaj hu lub chaw ntawd tias, Npaukhis thiab lawv tua tsiaj xyeem rau

(יחוח)Yahweh qhov ntawd.

​

Noos Tus Tub Yahshua Tuag

6 Thaum Noos tus tub Yahshua tso cov pej xeem mus lawd, cov Ixayees nyias rov mus rau nyias thaj teb thiaj txeeb tau ua qub txeeg qub teg.

7 Cov Ixayees ua koom tu (יחוח)Yahweh tag Yahshua sim neej thiab tag cov kev txwj laug uas nyob ntev dua Yahshua sim neej thiab pom txhua yam haujlwm loj uas (יחוח)Yahweh tau ua rau cov Ixayees.

8 Noos tus tub Yahshua uas yog (יחוח)Yahweh tus tub qhe txawm tuag rau thaum hnub nyoog muaj ib puas kaum xyoo.

9 Lawv muab nws faus rau hauv nws thaj teb uas yog nws qub txeeg qub teg ntawm lub moos Thinas Sawslas uas nyob pem toj siab Efa‑is tebchaws ntawm lub roob Ka‑as sab ped.

10 Cov tibneeg uas nyob tiam ntawd kuj dua tag mus nrog lawv tej poj koob yawm txwv nyob huvsi lawm, ho muaj dua ib tiam tshwm los uas tsis paub (יחוח)Yahweh thiab tsis paub tej uas (יחוח)Yahweh tau pab cov Ixayees lawd.

Cov Ixayees Tso (יחוח)Yahweh Tseg

11 Cov Ixayees kuj ua tej uas (יחוח)Yahweh pom tias phem thiab mus teev tej dab Npa‑as.

12 Lawv tso (יחוח)Yahweh tseg, yog lawv tej poj koob yawm txwv Tus Tswv uas coj lawv tawm hauv Iziv tebchaws los.  Lawv raws ncuj nciav luag tej dab uas yog cov tibneeg uas nyob ib ncig lawv tej dab, thiab pe tej dab ntawd mas ua rau (יחוח)Yahweh chim.

13 Lawv tso (יחוח)Yahweh tseg mus ua koom tu tej dab Npa‑as thiab tej dab Athalaus.

14 Vim li no, (יחוח)Yahweh thiaj npau taws rau cov Ixayees, nws thiaj muab lawv cob rau hauv cov uas lwg lawv txhais tes thiab muab lawv muag rau hauv lawv cov yeeb ncuab uas nyob ib ncig, lawv thiaj li tiv tsis taus lawv cov yeeb ncuab dua li lawm.

15 Lawv mus ntaus rog thaum twg los (יחוח)Yahweh txhais tes kuj tawm tsam lawv ua rau lawv swb kiag raws li (יחוח)Yahweh tau ntuas lawv thiab cog lus ruaj rau lawv lawm.  Mas lawv raug kev ceeblaj txom nyem heev.

16 Ces (יחוח)Yahweh txawm tsa kom muaj cov thawj uas cawm lawv dim ntawm cov uas lwg lawv txhais tes.

17 Los lawv kuj tsis mloog cov thawj ntawd tej lus. Lawv tseem mus deev luag tej dab thiab pe tej dab ntawd. Lawv tig hlo ntawm txojkev uas lawv tej poj koob yawm txwv taug sai kawg li lawm. Lawv tej poj koob yawm txwv ua raws li (יחוח)Yahweh txoj kevcai tiamsis lawv tsis ua raws li ntawd.

18 (יחוח)Yahweh tsa kom muaj tus thawj thaum twg (יחוח)Yahweh kuj nrog nraim tus thawj ntawd, thiab cawm lawv dim hauv lawv cov yeeb ncuab txhais tes mus tag tus thawj ntawd sim neej. Vim yog lawv raug kev tsim txom raug kev quab yuam, lawv lub suab quaj qw ntsaj laws ua rau (יחוח)Yahweh hlub lawv.  

19 Tiamsis thaum tus thawj ntawd tag txojsia, lawv kuj tig hlo rov qab ua phem heev dua lawv tej poj koob yawm txwv, mus raws ncuj nciav luag tej dab thiab ua koom tu thiab pe tej dab ntawd. Lawv tsis tso ib yam kev phem twg uas lawv ua tseg lossis tso txojkev tawv ncauj tseg.

20 Vim li no (יחוח)Yahweh txojkev npau taws thiaj tshwm plaws rau cov Ixayees thiab nws hais tias, vim haiv neeg no ntxeev siab rau kuv tej lus cog tseg uas kuv cog rau lawv tej poj koob yawm txwv thiab vim lawv tsis mloog kuv tej lus,

21 mas txij no mus kuv yuav tsis muab tej haiv neeg uas thaum Yahshua tuag tseem tshuav nyob ntiab tawm ntawm nej hauv ntej mus,

22 xwv kuv thiaj tau siv tej haiv neeg ntawd sim cov Ixayees saib lawv yuav ceev faj taug (יחוח)Yahweh txoj kev ib yam li lawv tej poj koob yawm txwv los tsis taug.

23 Vim li no (יחוח)Yahweh thiaj tso tej tibneeg ntawd nyob, tsis ntiab lawv tawm mus sai, thiab tsis muab cob rau hauv Yahshua txhais tes.