Cawm Dim Hauv Cub Hluavtaws

1 Vajntxwv Nenpukhanexas ua ib tug dab mlom kub siab rau caum tshim dav rau tshim. Nws muab txawb rau hauv lub tiaj Dulas hauv lub xeev Npanpiloos.

2 Mas vajntxwv Nenpukhanexas hu cov thawj kav tej tebchaws, cov thawj uas kav lub xeev, cov thawj uas kav tej moos, cov tub sablaj, cov uas ceev txhab nyiaj, cov uas tu plaub, cov tub ceev xwm, thiab tej nom tswv huvsi hauv tej xeev kom tuaj txoos ua ke ua thawj zaug kevcai pe hawm tus dab mlom uas vajntxwv Nenpukhanexas muab txawb cia lawm.

3 Cov thawj kav tej tebchaws, cov thawj uas kav lub xeev, cov thawj uas kav tej moos, cov tub sablaj, cov uas ceev txhab nyiaj, cov uas tu plaub, cov tub ceev xwm, thiab tej nom tswv huvsi hauv tej xeev txawm tuaj txoos ua ke thawj zaug ua kevcai pe hawm tus dab mlom uas vajntxwv Nenpukhanexas muab txawb cia lawd. Lawv tuaj sawv ntsug rau ntawm tus dab mlom uas Nenpukhanexas muab txawb cia lub xubntiag. 4 Mas tus uas tshaj tawm kuj qw nrov hais tias, ib tsoom tibneeg, ib tsoom tebchaws thiab nej cov uas hais txhua yam lus, cia li mloog.

5 Thaum nej hnov lub suab raj kub yaj, raj ntsaws, nkauj nog ncas me, nkauj nog ncas tshiav, nkauj nog ncas loj, nruas npuaj thiab txhua yam cuab yeej suab nkauj nrov, nej sawvdaws yuav tsum khwb nkaus pe hawm tus dab mlom kub uas vajntxwv Nenpukhanexas ua txawb cia ntawd. 6 Leejtwg tsis khwb nkaus pe hawm, yuav muab tus ntawd pov tamsim ntawd rau hauv lub niag qhov hluavtaws uas tabtom cig. 7 Yog li no thaum cov tibneeg sawvdaws hnov suab raj kub yaj, raj ntsaws, nkauj nog ncas me, nkauj nog ncas tshiav, nkauj nog ncas loj, nruas npuaj thiab txhua yam cuab yeej suab nkauj nrov, mas ib tsoom tibneeg, ib tsoom tebchaws thiab cov uas hais txhua yam lus sawvdaws txawm khwb nkaus pe hawm tus dab mlom kub uas vajntxwv Nenpukhanexas ua txawb cia ntawd. 8 Thaum ntawd cov Kheedias qee leej txawm ua lub siab phem tuaj kom cov Yahdaim. 9 Lawv hais rau vajntxwv Nenpukhanexas tias, Au vajntxwv, thov koj muaj txojsia nyob mus ib txhis. 10 Au vajntxwv, koj twb tawm ib txoj kevcai tias txhua tus uas hnov suab raj kub yaj, raj ntsaws, nkauj nog ncas me, nkauj nog ncas tshiav, nkauj nog ncas loj, nruas npuaj thiab txhua yam cuab yeej suab nkauj nrov, lawv yuav tsum khwb nkaus pe hawm tus dab mlom kub.

11 Yog leejtwg tsis khwb nkaus pe hawm, yuav muab tus ntawd pov rau hauv cub hluavtaws uas tabtom cig. 12 Cov Yahdaim muaj qee leej uas koj muab tsa tu tej haujlwm hauv lub xeev Npanpiloos, yog Salab, Mesa‎s thiab Anpenekau‎s. Au vajntxwv, cov tibneeg no tsis quav ntsej koj. Lawv tsis ua koom tu koj tej dab thiab tsis pe hawm tus dab mlom kub uas koj ua txawb cia ntawd. 13 Mas Nenpukhanexas kuj chim heev thiaj hais kom coj Salab, Mesa‎s thiab Anpenekau‎s tuaj. Lawv thiaj coj peb leeg ntawd tuaj cuag vajntxwv. 14 Nenpukhanexas hais rau lawv tias, Salab, Mesa‎s thiab Anpenekau‎s es, qhov uas nej tsis ua koom tu kuv tej dab thiab tsis pe hawm tus dab mlom kub uas kuv ua txawb cia ntawd muaj tseeb los tsis muaj? 15 Yog nej kam mas thaum nej hnov suab raj kub yaj, raj ntsaws, nkauj nog ncas me, nkauj nog ncas tshiav, nkauj nog ncas loj, nruas npuaj thiab txhua yam cuab yeej suab nkauj nrov, nej cia li khwb nkaus pe hawm tus dab mlom uas kuv tau ua cia ntawd. Yog nej tsis pe hawm mas yuav muab nej pov tamsim ntawd rau hauv cub hluavtaws uas tabtom cig. Mas tus timtswv twg yuav pab nej dim hauv kuv txhais tes? 16 Ces Salab, Mesa‎s thiab Anpenekau‎s txawm teb vajntxwv tias, Au Nenpukhanexas, tsis txog peb yuav teb koj txog qhov no.

17 Yog muaj li ntawd, (יחוח)Yahweh uas peb ua koom tu yuav cawm tau peb dim hauv cub hluavtaws. Au vajntxwv, nws kuj yuav cawm peb dim hauv koj txhais tes thiab. 18 Txawm yog tsis ua li ntawd los, Au vajntxwv, thov hais rau koj paub tias peb yuav tsis ua koom tu koj tej dab lossis pe hawm tus dab mlom kub uas koj ua txawb cia ntawd. 19 Ces Nenpukhanexas kuj npau taws kawg, nws lub ntsej muag txawv kiag rau Salab, Mesa‎s thiab Anpenekau‎s. Nws hais kom rauv cub hluavtaws kom cig hlob dua li uas txeev rauv xya npaug. 20 Nws hais kom nws cov tub rog qee leej uas muaj zog muab Salab, Mesa‎s thiab Anpenekau‎s khi thiab muab pov rau hauv cub hluavtaws uas tabtom cig. 21 Peb leeg no raug muab khi nrees tseem hnav tsho ntev thiab ris tsho thiab ntoo kaus mom thiab lwm yam tsoos, thiab lawv raug muab pov rau hauv cub hluavtaws uas tabtom cig. 22 Vim yog vajntxwv hais tawv kawg li thiab cub hluavtaws kuj kub heev mas tej nplaim taws thiaj hlawv cov tibneeg uas pov Salab, Mesa‎s thiab Anpenekau‎s ntawd kub hnyiab tag. 23 Mas peb tug no uas yog Salab, Mesa‎s thiab Anpenekau‎s lawv raug khi nrees poob rau hauv cub hluavtaws uas tabtom cig.

24 Thaum ntawm vajntwv Nenpukhanexas phimhwj thiaj maj nroos sawv tsees. Nws hais rau nws cov tub sablaj tias, peb muab peb leeg khi pov rau hauv cub hluavtaws xwb los tsis yog? Lawv teb vajntxwv tias, Au vajntxwv, muaj tseeb li koj hais. 25 Mas Vajntxwv teb tias, ciav kuv pom plaub leeg tsis khi li tabtom mus mus los los hauv cov hluavtaws thiab lawv tsis raug mob li. Tus uas plaub mas saib zoo yam li yog tej timtswv ib tug tub.

26 Nenpukhanexas txawm txav los ze ntawm lub qhov rooj cub tawg uas tabtom cig thiab hais tias, Salab, Mesa‎s thiab Anpenekau‎s uas yog (יחוח)Yahweh, Tus Tswv uas loj dua ntais cov tub qhe es, cia li tawm los, cia li los ntawm no. Salab, Mesa‎s thiab Anpenekau‎s txawm tawm hauv hluavtaws los. 27 Cov thawj kav tej tebchaws, cov thawj uas kav lub xeev, cov thawj uas kav tej moos, thiab vajntxwv cov tub sablaj kuj tuaj ua ke mas pom tias hluavtaws tsis ua li cas rau lawv peb leeg ntawd lub cev kiag li, lawv tej plaubhau twb tsis caws, lawv tej tsho twb tsis hiav thiab twb tsis hnov tsw pa hluavtaws ntawm lawv kiag li.

28 Nenpukhanexas hais tias, qhuas Salab, Mesa‎s thiab Anpenekau‎s lawv Tus Tswv, yog tus uas txib nws cov tubtxib saum ntuj tuaj tso nws cov tub qhe uas tso siab rau nws kom dim. Lawv rhuav vajntxwv tej lus pov tseg, thiab yeem tso lawv lub cev tseg zoo dua li ua koom tu thiab pe lwm tus dab uas tsis yog lawv Tus Tswv.

29 Vim li no kuv tawm ib tsab kevcai tias, haiv neeg twg thiab lub tebchaws twg thiab cov uas hais yam lus twg kuj xij, yog hais tawm tsam Salab, Mesa‎s thiab Anpenekau‎s Tus Tswv, mas nws tej tes taw yuav raug muab dua tu pov tseg, thiab nws lub tsev yuav raug muab rhuav pob tag, rau qhov tsis muaj dua ib tug timtswv uas yuav tso kom dim tau li no. 30 Vajntxwv txawm muab Salab, Mesa‎s thiab Anpenekau‎s lawv tsa ua loj dua qub rau hauv lub xeev Npanpiloos.