DANIYL 4

Nenpukhanexas Ua Npau Suav Zaum Ob

1 Kuv yog vajntxwv Nenpukhanexas tshaj tawm rau ib tsoom tibneeg thiab ib tsoom tebchaws thiab cov uas hais txhua yam lus uas nyob thoob qab ntuj hais tias, thov kom nej tsuas muaj noj qab nyob zoo heev zuj zus. 2 Kuv pom zoo uas yuav piav tej txujci tseem ceeb thiab tej txujci phimhwj uas (יחוח)Yahweh, Tus Tswv uas loj dua ntais tau ua rau kuv.

3 Nws tej txujci loj kawg li lauj! Nws tej haujlwm phimhwj muaj hwjchim kawg li lauj! Nws yuav kav mus ib txhis tsis kawg thiab nws muaj hwjchim kav. 4 Kuv yog Nenpukhanexas noj qab nyob zoo hauv kuv lub tsev thiab vam meej rau hauv kuv lub tsev vajntxwv. 5 Kuv ua npau suav pom yam uas ua rau kuv ntshai. Thaum kuv pw saum kuv lub txaj tej uas kuv xav thiab tej uas kuv ua yog toog tshwm rau hauv kuv lub taubhau ua rau kuv poob siab. 6 Kuv thiaj ua ntawv kom coj cov tibneeg txawj ntse hauv Npanpiloos saw-vdaws tuaj cuag kuv kom lawv thiaj txhais tau zaj npau suav rau kuv paub. 7 Cov txiv neeb txiv yaig thiab cov uas txawj ua khaws koob yees siv thiab cov Kheedias txawm nkag los. Kuv thiaj piav zaj npau suav rau lawv, tiamsis lawv txhais tsis tau lub ntsiab. 8 Thaum kawg Daniyl thiaj tuaj cuag kuv, nws muaj dua ib lub npe hu ua Npeethesaxa‎s raws li kuv tus dab lub npe, nws muaj tej timtswv uas dawb huv tus ntsuj plig, mas kuv piav zaj npau suav rau nws mloog tias, 9 Npeethesaxa‎s uas yog tej txiv neeb tus thawj es, vim yog kuv paub tias tej timtswv uas dawb huv tus ntsuj plig nyob hauv koj thiab tsis muaj ib yam abtsi uas tsis muaj leejtwg paub uas yuav ceeblaj dhau koj txhais tsis tau, zaj uas kuv ua npau suav pom yog li no. Mas thov koj txhais lub ntsiab rau kuv. 10 Zaj yog toog uas tshwm rau hauv kuv lub taubhau rau thaum kuv pw saum lub txaj yog li no. Kuv saib mas pom ib tsob ntoo nyob hauv plawv lub ntiajteb siab kawg li. 11 Tsob ntoo ntawd loj hlob thiab khov kawg li, lub ntsis siab mus nto ntuj, thiab thoob qab ntuj kawg puavleej pom tau. 12 Cov nplooj kuj zoo nkauj, cov txiv kuj ncw, sawvdaws noj tau tsob ntoo ntawd. Tej tsiaj qus los nraim hauv tus qab duab ntxoov ntxoo thiab tej nas noog saum nruab ntug los nyob saum tej ceg, thiab txhua yam uas muaj txojsia kuj noj tsob ntoo ntawd. 13 Zaj yog toog uas tshwm rau hauv kuv lub taubhau rau thaum kuv pw saum lub txaj, ua ciav kuv pom ib tug faj xwm dawb huv nqes saum ntuj los. 14 Nws qw nrov thiab hais tias, cia li ntov tsob ntoo no thiab txiav nws tej ceg huvsi, cia li muab tej nplooj lwg du lug thiab muab tej txiv w rau qhov txhia chaw. Cia tej tsiaj khiav hauv tsob qab ntoo mus thiab tej noog khiav saum tej ceg tag.

15 Tiamsis tseg lub hauv paus thiab cov cag nyob hauv av, muab ib daim hlau thiab tooj liab khwb lub hauv paus cia nyob hauv nruab nrab tej nroj mos tom teb. Cia nws ntub tej lwg saum ntuj, cia nws nrog tsiaj qus nyob hauv nruab nrab tej nroj tsuag hauv lub ntiajteb. 16 Cia nws lub siab hloov tsis thooj li tibneeg lub thiab muab tsiaj qus lub siab rau nws. Tso nws nyob li ntawd kom puv xya xyoo.

17 Tej lus txiav txim ntawd yog cov faj xwm txiav, yog cov uas dawb huv tej lus txiav txim siab kom cov uas muaj txojsia nyob thiaj paub tias (יחוח)Yahweh, Tus Tswv uas loj dua ntais kav tibneeg tej tebchaws thiab pub tebchaws rau tus uas nws xav pub, thiab tsa tus uas qes kawg ua tus uas kav.

18 Zaj npau suav no yog kuv, vajntxwv Nenpu-khanexas pom. Npeethesaxa‎s es, koj cia li hais lub ntsiab rau kuv, rau qhov cov tibneeg txawj ntse hauv kuv lub tebchaws sawvdaws txhais tsis tau zaj npau suav rau kuv, tiamsis koj yuav txhais tau vim tej timtswv dawb huv tus ntsuj plig nyob hauv koj. 19 Ces Daniyl uas muaj dua npe hu ua Npeethesaxa‎s txawm nyuaj siab ib nyuag pliag thiab tej uas nws xav ua rau nws poob siab. Vajntxwv thiaj hais tias, npeethesaxa‎s, tsis txhob cia zaj npau suav lossis lub ntsiab ua rau koj poob siab. Npee-thesaxa‎s teb tias, Yawg hlob, thov cia zaj npau suav ntawd poob rau cov uas ntxub koj thiab lub ntsiab poob rau koj cov yeeb ncuab.

20 Tsob ntoo uas koj pom, uas loj hlob thiab khov kawg li, lub ntsis siab mus nto ntuj, thiab thoob qab ntuj kawg puavleej pom tau, 21 cov nplooj kuj zoo nkauj, cov txiv kuj ncw, sawv-daws noj tau tsob ntoo ntawd, thiab tej tsiaj qus los nraim hauv tus qab duab ntxoov ntxoo thiab tej nas noog saum nruab ntug los nyob saum tej ceg, 22 Au vajntxwv, tsob ntoo ntawd yog koj ntag. Koj loj hlob thiab khov, qhov uas koj tau ua loj kuj loj zuj zus tuaj thiab siab mus nto ntuj, thiab koj muaj hwjchim kav mus thoob qab ntuj kawg. 23 Koj pom ib tug faj xwm dawb huv nqes saum ntuj los thiab hais tias, cia li ntov tsob ntoo no thiab ua kom puam tsuaj, tiamsis tseg lub hauv paus thiab cov cag nyob hauv av, muab ib daim hlau thiab tooj liab khwb lub hauv paus cia nyob hauv nruab nrab tej nroj mos tom teb. Cia nws ntub tej lwg saum ntuj, cia nws nrog tsiaj qus nyob, mus txog thaum puv xya xyoo.

24 Au vajntxwv, tej uas koj pom ntawd lub ntsiab yog li no. (יחוח)Yahweh, Tus Tswv uas loj dua ntais hais lus tuaj rau vajntxwv uas yog kuv Tus Tswv tias,

25 koj yuav raug muab ntiab tawm hauv tej tibneeg mus thiab koj yuav nrog tej tsiaj qus nyob, thiab koj yuav tsum noj zaub ib yam li nyuj, thiab koj yuav ntub cov lwg saum ntuj, thiab koj yuav nyob li ntawd kom puv xya xyoo, mus txog thaum koj paub tias tus uas loj dua ntais kav tibneeg tej tebchaws thiab pub tebchaws rau tus uas nws xav pub.

26 Qhov uas hais kom tseg lub hauv paus ntoo thiab tej cag nyob ntawd, lub ntsiab yog hais tias koj lub tebchaws tseem tseg rau koj kav, txij thaum koj lees tias (יחוח)Yahweh kav rawv. 27 Au vajntxwv, vim li no thov koj yuav tej lus uas kuv hais. Muab koj tej kev txhaum pov tseg es ua ncaj ncees, thiab tseg koj tej kev phem kev qias es muaj lub siab khuvleej cov uas raug quab yuam, xwv koj thiaj noj qab nyob zoo ntev mus. 28 Tej xwm txheej no huvsi tshwm los raug vajntxwv Nenpukhanexas. 29 Dhau kaum ob lub hlis nws mus ncig saum vajntxwv txheej tsev las tshav hauv Npanpi-loos, 30 thiab vajntxwv hais tias, no yog lub tuam nroog Npanpiloos los tsis yog, uas kuv siv lub hwjchim loj kawg tsim los ua lub chaw rau vajntxwv nyob thiab ua rau kuv lub hwj-chim meej mom nto moo lug? 31 Thaum tej lus ntawd tseem nyob hauv vajntxwv lub qhov ncauj txawm muaj ib lub suab hais saum ntuj tuaj hais tias, Au vajntxwv Nenpukhanexas, tej lus no yog hais rau koj tias, lub tebchaws ncaim ntawm koj lawm, 32 thiab koj yuav raug muab ntiab tawm hauv tej tibneeg mus thiab koj yuav nrog tej tsiaj qus nyob, thiab koj yuav tsum noj zaub ib yam li nyuj, thiab koj yuav nyob li ntawd kom puv xya xyoo, mus txog thaum koj lees paub tias tus uas loj dua ntais kav tibneeg tej tebchaws thiab pub tebchaws rau tus uas nws xav pub.

33 Ces tamsim ntawd tej lus ntawd txawm tiav rau Nenpukhanexas. Nws raug muab ntiab tawm hauv tej tibneeg mus thiab nws noj zaub ib yam li nyuj, nws lub cev ntub lwg saum ntuj mus txog thaum cov plaubhau ntev li plaub dav thiab nws tej rau tes ntev li rau noog.

34 Dhau lub sijhawm ntawd lawm, kuv, Nenpukhanexas, tsa muag saib saum ntuj mas kuv rov feeb meej li qub, kuv thiaj qhuas

(יחוח)Yahweh, Tus Tswv uas loj dua ntais thiab kuv qhuas thiab ua rau tus uas nyob mus ib txhis tau koob meej, rau qhov nws muaj hwjchim kav mus ib txhis thiab nws lub tebchaws yuav nyob ruaj ib tiam dhau ib tiam mus li. 35 Nws pom tias ib tsoom tibneeg hauv ntiajteb sawvdaws tsis tseem ceeb abtsi, nws ua raws li nws lub siab nyiam rau cov tibneeg qaum ntuj thiab rau cov uas nyob ntiajteb, tsis muaj leejtwg tav tau (יחוח)Yahweh txhais tes lossis hais rau nws tias, koj ua abtsi ne? 36 Lub sijhawm ntawd kuv lub siab thiaj li feeb rov los, thiab kuv lub hwjchim meej mom thiab kuv lub meej nthawb thiaj li rov los rau kuv ua rau kuv lub tebchaws tau koob meej. Kuv cov tub sablaj thiab kuv cov thawj tuaj cuag kuv, thiab kuv thiaj rov raug muab tsa kav lub tebchaws ruaj thiab tau koob meej loj tsav ntxiv rau. 37 Nimno kuv, Nenpukhanexas, qhuas thiab txhawb nqa thiab muab koob meej rau tus tuam vajntxwv saum ntuj, rau qhov txhua yam uas nws ua kuj raug cai thiab nws tej kev kuj ncaj. Cov uas ua lub neej khav theeb nws muab txo tau kom qes.