Txhais Tes Ntawm Phab Ntsa

1 Vajntxwv Npeesaxa‎s npaj ib rooj noj loj rau nws cov thawj ib txhiab leej, thiab nws haus cawv txiv hmab tab meeg ib txhiab leej ntawd. 2 Thaum Npeesaxa‎s sim tej cawv txiv hmab ntawd lawm txawm hais kom coj tej tais nyiaj tais kub uas nws txiv Nenpu-khanexas tau coj hauv lub tuam tsev hauv lub nroog Yeluxalees los, xwb vajntxwv thiab nws cov thawj thiab nws tej pojniam thiab tej hluas nkauj thiaj siv haus cawv txiv hmab.

3 Lawv thiaj coj tej tais nyiaj tais kub uas coj hauv lub tuam tsev uas yog (יחוח)Yahweh lub tuam tsev hauv Yeluxalees los tuaj.

Mas vajntxwv thiab nws cov thawj thiab nws tej pojniam thiab nws tej hluas nkauj siv tej tais ntawd haus cawv txiv hmab. 4 Lawv haus cawv txiv hmab thiab qhuas tej dab mlom uas muab nyiaj muab kub muab tooj liab muab hlau muab ntoo thiab muab pob zeb ua. 5 Tamsim ntawd txawm muaj ntiv tes tibneeg tshwm plaws los sau rau ntawm vajntxwv phab ntsa tsev ncaj ntawm lub teeb. Mas vajntxwv pom txhais tes uas sau ntawd. 6 Vajntxwv ntshaus tag thiab tej uas nws xav ua rau nws poob siab tag. Nws txhais ceg tsaug tag, nws hauv caug tshee hnyo. 7 Vajntxwv txawm qw nrov kom coj cov txiv neeb txiv yaig thiab cov Kheedias thiab cov uas txawj saib caij saib nyoog. Vajntxwv hais rau cov tibneeg txawj ntse hauv Npanpiloos tias, Leejtwg nyeem tau tej lus uas sau no thiab txhais tau rau kuv, kuv yuav pub cev tsoos tsamxem rau nws hnav thiab pub txoj saw kub rau nws coj ntawm caj dab, thiab yuav muab nws tsa ua kuv tus tim xyoob uas ob kav lub tebchaws. 8 Mas vajntxwv cov tibneeg uas txawj ntse tuaj tag nrho tiamsis lawv nyeem tsis tau thiab txhais tsis tau lub ntsiab rau vajntxwv paub kiag li. 9 Mas vajntxwv Npeesaxa‎s kuj poob siab heev thiab nws ntsej muag thim xem tag, thiab nws cov thawj kuj ntxhov hnyo. 10 Thaum poj vaj hnov vajntxwv thiab cov thawj tej lus ntawd nws txawm nkag mus rau hauv chav tsev noj haus thiab hais tias, Au vajntxwv, thov kom koj muaj txojsia nyob mus ib txhis. Tsis txhob poob siab lossis ua ntsej muag thim xem tag. 11 Hauv koj lub tebchaws muaj ib yawg uas tej timtswv uas dawb huv tus ntsuj plig nyob hauv nws. Thaum koj txiv ua vajntxwv kav, mas pom muaj txojkev kaj thiab kev paub thiab tswvyim ib yam li tej timtswv li tswvyim nyob hauv nws, mas koj txiv vajntxwv Nenpukhanexas tau tsa nws ua cov uas ua khaws koob yees siv, cov txiv neeb txiv yaig, cov Kheedias thiab cov uas txawj saib caij saib nyoog tus thawj, 12 rau qhov pom tias Daniyl uas vajntxwv tis dua npe hu ua Npeethesaxa‎s muaj ntsuj plig zoo kawg thiab kev paub txawj txhais npau suav, txawj txhais txhiaj txhais thiab daws teeb meem. Nimno cia li hu Daniyl tuaj, nws yuav qhia lub ntsiab rau koj paub.

13 Lawv thiaj coj Daniyl tuaj cuag vajntxwv, mas vajntxwv hais rau Daniyl tias, koj yog tus Daniyl uas poob Yahdah tebchaws los uas tus vajntxwv uas yog kuv txiv coj hauv Yahdah tebchaws los lov? 14 Kuv hnov tias tej timtswv uas dawb huv tus ntsuj plig nyob hauv koj, thiab txojkev kaj thiab kev paub thiab tswvyim zoo muaj nyob hauv koj.

15 Nimno cov tibneeg txawj ntse thiab cov txiv neeb txiv yaig raug muab coj tuaj cuag kuv tuaj nyeem tej lus uas sau no thiab txhais lub ntsiab rau kuv paub, tiamsis lawv txhais tsis tau zaj no kiag li. 16 Kuv hnov tias koj txawj txhais lub ntsiab thiab daws tau teeb meem. Nimno yog koj nyeem tau tej lus uas sau no thiab txhais tau lub ntsiab rau kuv paub, kuv yuav pub cev tsoos tsamxem rau koj hnav thiab pub txoj saw kub rau koj coj ntawm caj dab, thiab koj yuav raug muab tsa ua kuv tus tim xyoob uas ob kav lub teb-chaws. 17 Mas Daniyl teb vajntxwv tias, thov khaws tej uas koj pub ntawd cia rov rau koj, thiab muab tej tshav ntuj ntawd rau lwm tus. Vajntxwv, txawm li cas los kuv yuav nyeem tej lus uas sau ntawd rau koj mloog thiab txhais lub ntsiab rau koj paub. 18 Au vajntxwv, (יחוח)Yahweh uas loj dua ntais pub koj txiv Nenpukhanexas tau ua vajntxwv kav thiab pub nws ua loj kawg thiab pub koob meej thiab hwjchim meej mom rau nws. 19 Vim nws pub koj txiv ua loj kawg mas ib tsoom tibneeg thiab ib tsoom tebchaws thiab cov uas hais txhua yam lus thiaj ntshai koj txiv ua tshee hnyo. Nws yuav tua leejtwg kuj tua kiag pov tseg, yuav tseg leejtwg txojsia kuj tseg, nws yuav tsa leejtwg kuj tsa, yuav qhau leejtwg kuj qhau. 20 Tiamsis thaum koj txiv lub siab tsab ua loj thiab nws ua lub siab tawv nws thiaj khav ntxhias, mas nws thiaj raug muab hle ntawm lub zwm txwv vajntxwv, thiab nws lub koob meej raug muab rho ntawm nws mus. 21 Nws raug muab ntiab tawm hauv tej tibneeg mus thiab nws lub siab hloov zoo li tsiaj qus lub. Nws nrog nees luav qus nyob, muab zaub rau nws noj yam li nyuj thiab nws lub cev ntub lwg saum ntuj, mus txog thaum nws lees paub tias (יחוח)Yahweh, Tus Tswv uas loj dua ntais kav tibneeg tej tebchaws thiab tsa tus uas nws xav kom kav tej teb-chaws ntawd.

22 Npeesaxa‎s, koj uas yog nws tus tub, txawm yog koj paub tej no huvsi lawm los koj tsis txo koj lub siab, 23 koj txawm tsa koj tus kheej tawm tsam Tus Tswv ntuj. Koj tseem coj tej tais hauv Tus Tswv lub tuam tsev los rau ntawm koj xubntiag, mas koj thiab koj cov thawj thiab koj cov pojniam thiab koj cov hluas nkauj muab tej tais ntawd haus cawv txiv hmab, thiab koj qhuas tej dab mlom uas muab nyiaj muab kub muab tooj liab muab hlau muab ntoo thiab muab pob zeb ua uas tsis pom kev tsis hnov lus thiab tsis paub abtsi. Tiamsis koj tsis muab koob meej rau (יחוח)Yahweh, Tus Tswv uas tuav koj txojsia rau hauv nws txhais tes thiab koj txhua txojkev nyob ntawm nws coj. 24 Nws thiaj txib txhais tes ntawm nws xubntiag mus sau tej lus no. 25 No yog tej lus uas sau cia ntawd. MENE‎S, MENE‎S, TEKHEE‎S thiab PAXIS.

26 No yog tej ntsiab lus ntawd. MENE‎S txhais tias (יחוח)Yahweh twb teem caij nyoog rau qhov uas koj ua vajntxwv thiab coj los txog qhov kawg lawm.

27 TEKHEE‎S txhais tias koj raug muab luj hauv rab teev mas pom tias muaj tsis txwm.

28 PELES txhais tias koj lub tebchaws raug muab faib thiab muab rau cov Midias thiab cov Pawxias.

29 Npeesaxa‎s txawm hais kom lawv muab cev tsoos tsamxem rau Daniyl hnav, thiab muab txoj saw kub rau nws coj ntawm caj dab, thiab tshaj tawm txog nws tias nws yuav ua tus tim xyoob uas ob kav lub tebchaws. 30 Ces hmo ntawd Npeesaxa‎s uas yog tibneeg Kheedias txawm raug muab tua pov tseg. 31 Mas Dalias uas yog tibneeg Midias txeeb kav lub tebchaws, nws hnub nyoog muaj rau caum ob xyoos.