Daniyl Nyob Hauv Qhov Tsov Ntxhuav

1 Dalias txaus siab yuav tsa ib puas nees nkaum leej ua thawj kav tej tebchaws huvsi uas nws tau kav lawd. 2 Thiab nws tsa peb tug tim xyoob kav cov ntawd, Daniyl yog ib tug hauv peb tug tim xyoob ntawd. Cov thawj uas kav tebchaws ntawd yuav tsum cev lus rau peb tug ntawd thiaj tsis muaj kev nyuaj rau vajntxwv. 3 Daniyl tau koob meej heev dua lwm tus tim xyoob thiab cov thawj uas kav tebchaws, vim nws muaj ntsuj plig zoo tshaj plaws, mas vajntxwv thiaj npaj siab yuav tsa nws kav tag nrho lub tebchaws huvsi. 4 Cov tim xyoob thiab cov thawj uas kav tej tebchaws txawm nrhiav plaub kom Daniyl txog tej kev kav tebchaws, tiamsis lawv nrhiav tsis tau plaub lossis ib qho txhaum kom nws, vim nws pheej ua ncaj, mas nrhiav tsis tau ib qho uas nws ua yuam kev lossis ib qho txhaum kiag li. 5 Lawv cov ntawd txawm hais tias, peb yuav nrhiav tsis tau ib qho plaub kom tus Daniyl no, tsuas yog peb nrhiav plaub ntsig txog nws Tus Tswv txoj kevcai xwb thiaj tau. 6 Mas cov tim xyoob thiab cov thawj ntawd thiaj ntaus tswvyim mus cuag vajntxwv thiab hais tias, Au vajntxwv Dalias, thov kom koj muaj txojsia nyob mus ib txhis. 7 Cov tim xyoob hauv lub tebchaws, cov thawj kav tej teb-chaws, cov thawj uas kav lub xeev, vajntxwv cov tub sablaj thiab cov thawj uas kav tej moos sawvdaws hais haum tias tsim nyog vajntxwv rhawv ib txoj kevcai rau sawvdaws coj thiab txwv tu nrho hais tias, hauv peb caug hnub no yog leejtwg thov tej dab lossis ib tug tibneeg twg uas tsis yog vajntxwv koj, mas cia muab tus ntawd pov rau hauv qhov tsov ntxhuav. 8 Au vajntxwv, nimno thov koj rhawv txoj kevcai txwv li no thiab sau koj npe rau hauv kom thiaj hloov tsis tau raws li cov Midias thiab cov Pawxias tej kevcai uas muab kho dua tsis tau li. 9 Vim li no vajntxwv Dalias thiaj nqes npe rau tsab ntawv uas rhawv kevcai txwv ntawd.

10 Thaum Daniyl paub tias vajntxwv nqes npe rau tsab ntawv kevcai ntawd lawm, nws mus rau hauv nws lub tsev txheej saud uas muaj qhov rais qheb tig mus rau lub nroog Yeluxalees. Mas nws txhos caug thov thiab ua (יחוח)Yahweh tsaug ib hnub peb zaug ib yam li nws txeev ua los lawd. 11 Cov tibneeg ntawd txawm ntaus tswvyim tuaj mas pom Daniyl thov thiab taij nws Tus Tswv. 12 Ces lawv txawm mus cuag vajntxwv thiab hais txog txoj kevcai uas txwv ntawd tias, Au vajntxwv, koj tsis tau nqes npe rau hauv tsab ntawv uas txwv hais tias, hauv peb caug hnub no yog leejtwg thov tej dab lossis ib tug tibneeg twg uas tsis yog vajntxwv koj, ces yuav muab tus ntawd pov rau hauv qhov tsov ntxhuav lov? Vajntxwv teb tias, zaj ntawd tseem ruaj khov, raws li cov Midias thiab cov Pawxias tej kev-cai uas muab kho dua tsis tau li.

13 Lawv thiaj teb vajntxwv tias, Au vaj-ntxwv, tus Daniyl uas nrog cov Yahdah uas poob tebchaws los no, tsis quav ntsej koj thiab tsab kevcai txwv uas koj twb nqes npe rau lawd, nws tseem thov (יחוח)Yahweh ib hnub peb zaug thiab.

14 Thaum vajntxwv hnov tej lus ntawd lawm, nws txawm nyuaj siab heev thiab nws muaj siab nrhiav kev tso Daniyl dim. Nws yooj xeeb nrhiav kev cawm Daniyl mus txog thaum hnub poob qho. 15 Ces cov tibneeg ntawd txawm ua ke rov tuaj cuag vajntxwv thiab hais rau vajntxwv tias, Au vajntxwv, koj yeej paub tias cov Midias thiab cov Pawxias txoj kevcai hais tias tsab ntawv kevcai txwv lossis txoj kevcai twg uas vaj-ntxwv rhawv cia lawd yeej hloov tsis tau li. 16 Ces vajntxwv txawm hais kom coj Daniyl mus pov rau hauv qhov tsov ntxhuav. Vaj-ntxwv thiaj hais rau Daniyl tias, thov koj Tus Tswv uas koj ib txwm ua koom tu tso koj dim lauj! 17 Thiab lawv coj ib txhib zeb los kaw lub rooj qho, thiab vajntxwv ntaus nws lub cim rau thiab ntaus nws cov thawj li cim rau, kom thiaj hloov tsis tau tej uas ua rau Daniyl kiag li. 18 Ces vajntxwv txawm rov mus tsev thiab yoo mov ib hmos, tsis kheev coj ib yam kev lomzem los rau nws, thiab nws pw tsis tsaug zog. 19 Thaum kaj ntug vajntxwv sawv tsees maj nroos mus rau tom qhov tsov ntxhuav. 20 Thaum nws tuaj ze lub qhov tsov uas Daniyl nyob, nws txawm qw nyuaj siab kawg hu Daniyl tias, Au Daniyl uas yog (יחוח)Yahweh uas muaj txojsia nyob tus qhev, koj Tus Tswv uas koj ib txwm ua koom tu tso tau koj dim hauv cov tsov ntxhuav los lawm lov? 21 Daniyl teb vajntxwv tias, Au vajntxwv, thov kom koj muaj txojsia nyob mus ib txhis. 22 Kuv Tus Tswv txib nws tus tubtxib saum ntuj tuaj kaw tsov ntxhuav qhov ncauj, tsov thiaj tsis ua li cas rau kuv, vim (יחוח)Yahweh pom tias kuv tsis txhaum. Au vajntxwv, kuv tsis tau ua ib qho txhaum rau koj. 23 Mas Vajntxwv zoo siab heev kawg, nws txawm hais kom rho Daniyl tawm hauv lub qhov los. Daniyl thiaj raug muab rho tawm los mas tsis pom nws raug ib qho mob kiag li vim nws tso siab rau nws Tus Tswv. 24 Ces vajntxwv hais kom coj cov tib-neeg uas kom Daniyl ntawd tuaj pov rau hauv qhov tsov ntxhuav, tsis hais lawv thiab lawv tej pojniam menyuam huvsi. Thaum lawv poob tsis tau ti qab thu cov tsov ntxhuav twb muab lawv tom dua noj tag ua rau lawv tej pob txha tawg ua tej dwb daim. 25 Vajntxwv Dalias txawm xa ntawv mus rau ib tsoom tibneeg thiab ib tsoom tebchaws thiab cov uas hais txhua yam lus uas nyob thoob plaws lub ntiajteb sawvdaws hais tias, thov kom nej muaj noj qab nyob zoo heev zuj zus. 26 Kuv rhawv ib tsab kevcai tias thoob plaws tej tebchaws uas kuv kav tej tibneeg cia li ntshai Daniyl Tus Tswv ua ib ce tshee hnyo, rau qhov nws yog (יחוח)Yahweh uas muaj txojsia nyob, nws nyob mus ib txhis, nws lub tebchaws yuav tsis raug kev puam tsuaj, thiab nws lub hwjchim tswjhwm yuav muaj nyob mus txog thaum kawg. 27 Nws cawm thiab tso kom dim, nws ua tej txujci tseem ceeb thiab txujci phimhwj rau saum ntuj thiab hauv lub ntiajteb, nws yog tus uas cawm Daniyl dim hauv tsov ntxhuav lub hwjchim. 28 Tus Daniyl no thiaj li vam meej rau thaum Dalias ua vajntxwv kav thiab thaum Xailab uas yog tibneeg Pawxias kav.