Rov Muaj Kev Pe Hawm (יחוח)Yahweh

1 Thaum txog lub xya hli, cov Ixayees los nyob rau hauv lawv tej moos lawm, mas cov pejxeem sawvdaws tuaj txoos ua ke rau hauv Yeluxalees.

2 Ces Yahxadas tus tub Yahshua thiab nws cov kwvtij uas ua pov thawj, thiab Se‑athi‑ees tus tub Xelunpanpees thiab nws cov kwvtij, lawv sawvdaws nqis tes ua Ixayees Tus Tswv lub thaj xwv thiaj tau ua kevcai hlawv xyeem rau sauv raws li sau cia rau hauv (יחוח)Yahweh tus tibneeg Mauxes txoj kevcai.

3 Lawv ua lub thaj rau saum lub qub chaw, vim yog lawv ntshai tej tibneeg uas nyob ib ncig, thiab lawv ua kevcai hlawv xyeem thaum sawv ntxov thiab thaum yuav tsaus ntuj rau saum lub thaj ntawd rau (יחוח)Yahweh.  

4 Lawv ua kevcai nyob tsev pheeb suab raws li uas sau cia lawd, thiab niaj hnub tua tsiaj ua kevcai hlawv xyeem npaum li uas hais cia rau hauv txoj kevcai uas niaj hnub yuav tau ua.

5 Dhau ntawd lawv kuj xyeem tej uas niaj hnub ua kevcai hlawv xyeem mus li, thiab tej uas xyeem rau hnub hli xiab thiab xyeem rau txhua lub sijhawm uas (יחוח)Yahweh teem tseg, thiab lawv xyeem tej uas txhua tus zoo siab pub rau (יחוח)Yahweh.

6 Lawv pib ua kevcai hlawv xyeem rau (יחוח)Yahweh txij hnub xiab ib, lub xya hli.  Tiamsis lawv tsis tau tiag tej taw uas ua (יחוח)Yahweh lub tuam tsev.

7 Lawv muab nyiaj rau cov Kws txhwm zeb thiab cov Kws ntoo, thiab muab zaub mov thiab dej haus thiab roj rau cov tibneeg Xaidoos thiab Thailab kom lawv coj ntoo ciab hauv Lenpanoos mus txog ntawm hiavtxwv thiab xa mus txog lub moos Yafaus raws li Pawxias tus vajntxwv Xailab tso cai rau lawv lawd.

​

Pib Ua Lub Tuam Tsev

8 Thaum lawv rov los rau hauv Yeluxalees lawd, mas xyoo uas ob lub ob hlis, Se‑athi‑ees tus tub Xelunpanpees thiab Yahxadas tus tub Yahshua thiab nkawv cov kwvtij uas yog cov pov thawj thiab cov Levis, thiab txhua tus uas poob tebchaws es rov los rau hauv Yeluxalees, pib ua lub tuam tsev.  Lawv tsa cov Levis uas hnub nyoog nees nkaum xyoo rov saud saib xyuas tej haujlwm ua (יחוח)Yahweh lub tuam tsev.

9 Yahshua thiab nws cov tub thiab nws cov kwvtij thiab Khami‑ees thiab nws cov tub uas yog Haudayah caj ces, thiab Henadas cov tub thiab lawv cov tub thiab lawv cov kwvtij uas yog cov Levis, sib koom saib xyuas tej tub zog uas ua (יחוח)Yahweh lub tuam tsev.

10 Thaum cov Kws ua tsev tiag tej taw rau (יחוח)Yahweh lub tuam tsev, mas cov pov thawj hnav tsoos meej mom tawm los tuav rawv raj xyu thiab cov Levis uas yog Axas caj ces, tuav rawv nruas npuaj tooj liab tawm los qhuas (יחוח)Yahweh raws li cov Ixayees tus vajntxwv Daviv tu tseg.

11 Mas lawv hu nkauj sib quas qhuas thiab ua (יחוח)Yahweh tsaug hais tias, nws yog tus zoo, nws txojkev hlub uas ruaj khov nyob mus ib txhis rau cov Ixayees. Cov pejxeem sawvdaws kuj tsa suab hu nrov nrov rau thaum lawv qhuas (יחוח)Yahweh, rau qhov twb tiag (יחוח)Yahweh lub tuam tsev tej taw tiav lawm.

12 Tiamsis cov pov thawj thiab cov Levis uas ua thawj hauv tej cum, yog cov laus uas twb pom lub tuam tsev qub lawm, mas thaum lawv pom luag tab tom ua tej taw tiag lub tuam tsev tshiab no, lawv kuj quaj nrov heev, tiamsis tseem muaj ntau leej hu zoo siab xyiv fab.

13 Cov pejxeem thiaj tsis paub tias qhov twg yog suab zoo siab xyiv fab, qhov twg yog suab quaj, vim yog cov pejxeem qw nrov heev thiab tej suab ntawd nrov mus deb kawg.