Yeeb Ncuab Tab Kaum Haujlwm

1 Thaum Yahdah thiab Npeeyamees cov yeeb ncuab hnov tias cov uas poob tebchaws rov qab los, tab tom ua lub tuam tsev rau (יחוח)Yahweh uas yog cov Ixayees Tus Tswv,

2 lawv txawm tuaj cuag Xelunpanpees thiab cov uas ua thawj hauv txhua cum thiab hais rau lawv tias, cia peb nrog nej ua thiab, rau qhov peb yeej pe hawm nej Tus Tswv ib yam li nej, thiab txij thaum Axilias tus vajntxwv Exahadoos coj peb los nyob ntawm no, peb twb xyeem tsiaj rau (יחוח)Yahweh los li lawm.

3 Tiamsis Xelunpanpees thiab Yahshua thiab lwm tus uas ua thawj hauv Ixayees txhua cum hais rau lawv tias, nej tsis muaj feem nrog peb ua lub tuam tsev rau peb Tus Tswv. Cia peb ua peb rau (יחוח)Yahweh uas yog cov Ixayees Tus Tswv, raws li Pawxias tus vajntxwv Xailab hais cia rau peb lawd.

4 Cov tibneeg uas nyob hauv lub tebchaws ntawd ua rau cov Yahdah qaug zog thiab ua rau lawv ntshai qhov uas ua lub tuam tsev,

5 thiab tseem ntiav tibneeg mus tshum tab kaum kom ua tsis tau raws li cov Yahdah npaj siab cia lawd mus tag Pawxias tus vajntxwv Xailab sim neej, mus txog thaum Dali‑as ua vajntxwv kav Pawxias tebchaws.

6 Thaum Xawxes pib ua vajntxwv kav, lawv tseem sau ntawv mus tshum cov Yahdah thiab cov hauv Yeluxalees.  

7 Thaum Athaxawxes ua vajntxwv kav mas Npilas thiab Miledas thiab Thanpe‑ees thiab tag nrho lawv pab pawg sawvdaws sau ntawv mus rau Athaxaw-xes uas ua vajntxwv kav Pawxias tebchaws.  Tsab ntawv ntawd lawv sau npe ntawv Alas thiab hais ua lus Hinplus.  

8 Lehoos uas ua thawj thiab Sisais uas yog tus tub sau ntawv, sau tsab ntawv tshum Yeluxalees xa mus rau vajntxwv Athaxawxes li no.

9 Ces Lehoos uas ua thawj thiab Sisais uas yog tus tub sau ntawv thiab lwm tus uas koom nrog nkawv, yog cov uas tu plaub, cov uas kav tej moos thiab cov nom tswv, lawv yog cov Pawxias thiab cov tibneeg Elej thiab cov Npanpiloos thiab cov tibneeg Xuxas uas yog tibneeg Elas,

10 thiab lwm haiv neeg uas tus thawj Aunapas uas muaj koob meej xa tuaj nyob hauv Xamalis tej moos thiab lwm qhov hauv lub xeev uas nyob sab dej Yufetis hnub poob, lawv sawvdaws koom sau tsab ntawv no.  

11 Tsab ntawv uas lawv sau ntawd hais li no: Hwm txog vajntxwv Athaxawxes. Koj cov tub qhe uas yog cov tibneeg nyob sab dej Yufetis hnub poob, xa lus noj qab nyob zoo txog koj.

12 Thov hais rau vajntxwv paub tias, cov Yahdah uas los ntawm koj los, twb los txog rau hauv Yeluxalees lawm. Lawv tab tom tsim lub nroog uas pheej ntxeev siab thiab phem kawg ntawd dua tshiab.  Lawv tab tom kho tej ntsa loog thiab tsim kho tej taw tiag.

13 Nimno thov vajntxwv paub hais tias, yog ua tau lub nroog no dua tshiab thiab ua tej ntsa loog tiav, lawv yuav tsis them se qoob loo, se lag luam, se liaj teb, ces vajntxwv tej nyiaj yuav tsawg zuj zus.

14 Vim peb tau noj koj tej roj tej ntsev mas tsis tsim nyog peb pom koj poob koob. Vim li no peb thiaj xa lus tuaj hais rau vajntxwv,

15 thov koj tshawb nrhiav phau ntawv keeb kwm uas koj tej poj koob yawm txwv sau cia. Koj yuav pom hauv phau ntawv keeb kwm ntawd thiab paub tias lub nroog no yog lub nroog uas pheej ntxeev siab thiab tsim kev kub ntxhov rau tej vajntxwv thiab rau tej xeev, thiab txij yav thaum ub los pheej muaj kev ntaus tswvyim ntxeev siab tshwm los rau hauv. Vim li no lub nroog no thiaj raug muab tso tseg piam tag.

16 Peb thov qhia rau vaj-ntxwv paub tias, yog tsim lub nroog no dua tshiab thiab ua tej ntsa loog tiav mas koj yuav tsis muaj feem ib yam abtsi rau hauv lub xeev uas nyob sab ntug dej hnub poob.

17 Vajntxwv xa ntawv teb mus hais tias, nyob zoo txog tus thawj Lehoos thiab Sisais uas yog tus tub sau ntawv thiab lwm tus uas koom nrog nkawv uas nyob hauv lub xeev Xamalis thiab nyob lwm qhov hauv lub xeev sab dej Yufetis hnub poob.

18 Tsab ntawv uas nej xa tuaj rau peb, twb muab nyeem thiab txhais rau kuv mloog lawm.

19 Thiab kuv twb hais kom mus tshawb nrhiav, mas thiaj pom tias lub nroog no txij thaum ub los, pheej sawv tiv tej vajntxwv thiab muaj kev ntxeev siab, muaj kev tuav tswvyim phem tshwm hauv lub nroog no los.

20 Txeev muaj tej vajntxwv uas muaj hwj chim kav Yeluxalees. Lawv kav tag nrho lub xeev sab dej Yufetis hnub poob, thiab luag them se qoob loo, se lag luam, se liaj teb rau lawv.

21 Vim li no nej cia li hais kom cov tibneeg ntawd tseg tsis txhob ua haujlwm, thiab tsis txhob ua lub nroog no dua tshiab mus txog thaum kuv tso cai tso.

22 Nej cia li ceev faj tsis txhob muab qhov no sej cia.  Ua cas nej yuav cia tej xwm txheej phem no nthuav loj zuj zus ua rau vajntxwv poob koob?

23 Mas thaum nyeem vajntxwv Athaxawxes tsab ntawv rau Lehoos thiab Sisais uas ua tus tub sau ntawv thiab cov uas koom nrog nkawv mloog, ces lawv maj nroos mus cuag cov Yahdah hauv Yeluxalees thiab siv hwjchim siv zog yuam kom lawv tseg tsis txhob ua haujlwm lawm.

24 Ces lawv thiaj tseg tsis ua (יחוח)Yahweh lub tuam tsev uas nyob hauv Yeluxalees. Lawv tseg tsis ua mus txog xyoo ob uas Dali‑as ua vajntxwv kav Pawxias tebchaws.