EXALEYAH 5

Rov Ua Lub Tuam Tsev

1 Tshakhiyah thiab Idaus tus xeebntxwv Xekhaliyah uas yog xibhwb cev lus tau tuav Tus Tswv uas kav cov Ixayees lub npe cev lus rau cov Yahdah uas nyob hauv Yahdah thiab hauv Yeluxalees.

2 Ces Se‑athi‑ees tus tub Xelunpanpees thiab Yahxadas tus tub Yahshua thiaj sawv tsees rov ua (יחוח)Yahweh lub tuam tsev hauv Yeluxalees dua tshiab.  Thiab cov xibhwb cev (יחוח)Yahweh lus kuj pab nkawv.  

3 Thaum ntawd Thathenais uas yog tus tswv xeev sab dej Yufetis hnub poob thiab Sethas Npauxenais thiab cov uas koom nrog nkawv tuaj hais rau cov Yahdah tias, leejtwg tso cai rau nej ua lub tuam tsev no thiab tsim kho kom tiav?

4 Thiab lawv kuj nug hais tias, cov uas tab tom ua lub tuam tsev no cov npe hu li cas?

5 Tiamsis (יחוח)Yahweh lub qhov muag saib ntsoov Yahdah cov kev txwj laug, mas luag thiaj tav tsis tau lawv mus txog thaum luag qhia tej no rau Dali‑as paub thiab muaj lus teb hauv ntawv txog tej no rov tuaj.

6 No yog tej lus hauv ntawv uas Thathenais uas yog tus tswv xeev sab dej Yufetis hnub poob thiab Sethas Npauxenais thiab cov uas koom nrog nkawv uas yog cov thawj uas kav tej moos hauv lub xeev sab dej Yufetis hnub poob xa mus rau vajntxwv Dali‑as.

7 Lawv xa tsab ntawv mus rau nws hais li no tias, thov kom vajntxwv Dali‑as noj qab nyob zoo.

8 Thov hais rau vajntxwv paub tias, peb tau mus rau hauv lub xeev Yahdah, thiab mus rau ntawm (יחוח)Yahweh uas loj kawg lub tuam tsev, uas tab tom muab tej txhib zeb los tsim kho thiab muab ntoo los ntsia rau tej phab ntsa. Lawv rau siab ntso ua haujlwm thiab lawv txhais tes ua tau sai.

9 Peb nug cov kev txwj laug ntawd tias, leejtwg tso cai rau nej ua lub tuam tsev no thiab tsim kho kom tiav?

10 Thiab peb kuj nug lawv cov npe lawm thiaj qhia tau rau koj paub, peb thiaj sau lawv cov uas ua thawj tej npe cia.

11 No yog tej lus uas lawv teb peb, peb yog (יחוח)Yahweh uas kav saum ntuj thiab ntiajteb cov tub qhe. Peb tab tom ua lub tuam tsev uas ua tau ntau xyoo lawd dua tshiab, yog cov Ixayees tus vaj-ntxwv uas loj kawg ua thiab ua kom tiav.

12 Tiamsis vim peb tej poj koob yawm txwv ua rau (יחוח)Yahweh chim, nws thiaj muab lawv cob rau hauv Npanpiloos tus vajntxwv Nenpukhanexas uas yog tibneeg Kheedias txhais tes, yog tus uas rhuav tshem lub tuam tsev no thiab kuav cov pejxeem mus rau Npanpiloos tebchaws.  

13 Txawm li ntawd los xyoo uas Xailab ua vajntxwv kav Npanpiloos, vajntxwv Xailab twb tso cai kom rov ua (יחוח)Yahweh lub tuam tsev no dua tshiab.

14 Thiab tej twj siv uas yog kub thiab nyiaj hauv (יחוח)Yahweh lub tuam tsev, uas Nenpukhanexas twb rho tawm hauv lub tuam tsev uas nyob hauv Yeluxalees thiab coj mus cia rau hauv lub tsev dab uas nyob hauv Npanpiloos, mas vajntxwv Xailab muab tej no rho tawm hauv lub tsev dab uas nyob hauv Npanpiloos thiab muab cob rau ib tug uas npe hu ua Senpaxas uas vajntxwv muab tsa ua tus kav lub xeev.

15 Xailab hais rau nws tias, cia li coj tej twj siv no mus khaws cia rau lub tuam tsev hauv Yeluxalees, thiab ua (יחוח)Yahweh lub tuam tsev dua tshiab rau hauv qhov qub chaw.

16 Mas tus Senpaxas no thiaj tau los thiab ua tej taw tiag (יחוח)Yahweh lub tuam tsev uas nyob hauv Yeluxalees.  Txij thaum ntawd los txog nimno mas tseem tab tom ua xwb tsis tau tiav.

17 Vim li no, yog vajntxwv pom zoo, mas cia tshawb nrhiav tej ntawv keeb kwm hauv Npanpiloos saib vajntxwv Xailab puas tau tso cai kom tsim kho (יחוח)Yahweh lub tuam tsev no hauv Yeluxalees dua tshiab. Thov vaj ntxwv hais rau peb paub tias vajntxwv pom zoo li cas txog tej no.