Dali‑as Tso Cai

1 Ces vajntxwv Dali‑as txawm tso cai kom tshawb nrhiav hauv lub tsev uas khaws tej ntawv keeb kwm hauv lub nroog Npanpiloos.

2 Hauv lub nroog Enpathanas uas yog lub nroog loj hauv lub xeev Midias mas lawv nrhiav tau ib thooj ntawv uas muaj tej lus no sau cia hais tias, tej lus tso cai. 3 Thawj xyoo uas Xailab ua vajntxwv, Xailab tso cai hais tias, hais txog (יחוח)Yahweh lub tuam tsev hauv Yeluxalees, mas cia lawv tsim lub tuam tsev dua tshiab, yog lub chaw uas lawv xyeem qhov txhia chaw thiab coj tsiaj tuaj ua kevcai hlawv xyeem.  Yuav tau ua lub tuam tsev siab rau caum tshim, dav rau caum tshim.

4 Yuav tib txhib zeb peb txheej mam ua ib txheej ntoo, thiab muab nyiaj hauv vajntxwv lub txhab los them tej nqi ntawd.

5 Tej twj siv uas yog kub thiab nyiaj hauv (יחוח)Yahweh lub tuam tsev uas Nenpukhanexas coj tawm hauv lub tuam tsev hauv Yeluxalees los rau hauv Npanpiloos lawd, mas muab thim coj rov qab mus rau lub tuam tsev uas nyob hauv Yeluxalees, thiab muab txawb cia rau tej qub chaw. Nej yuav tau muab khaws cia rau hauv (יחוח)Yahweh lub tuam tsev.

6 Yog li no, Thathenais uas kav lub xeev sab dej Yufetis hnub poob thiab Sethas Npauxenais thiab cov uas yog cov kav tej moos hauv lub xeev sab dej Yufetis hnub poob uas koom nrog neb, nej cia li txav deb.

7 Cia tej haujlwm uas ua (יחוח)Yahweh lub tuam tsev no ua mus. Cia cov Yahdah tus thawj thiab cov Yahdah cov kev txwj laug ua (יחוח)Yahweh lub tuam tsev no dua tshiab rau lub qub chaw.

8 Dua li ntawd kuv tso cai txog tej uas nej yuav tau ua pab Yahdah cov kev txwj laug ua (יחוח)Yahweh lub tuam tsev no dua tshiab.  Yuav them nqi ua tsev rau cov tibneeg no kom txwm nkaus, tsis txhob sej li. Yuav muab tej nyiaj hauv vajntxwv lub txhab uas sau se hauv lub xeev sab dej Yufetis hnub poob los them.

9 Thiab yog lawv tu ncua abtsi, tsis hais thav txiv nyuj, txiv tshis lossis tej yaj ua kevcai hlawv xyeem rau (יחוח)Yahweh, thiab mog, ntsev, cawv txiv hmab lossis roj, raws li uas cov pov thawj hauv Yeluxalees thov, mas niaj hnub pub rau lawv tsis txhob tu ncua,

10 xwv lawv thiaj li tau tsiaj xyeem kom haum (יחוח)Yahweh lub siab thiab lawv thov (יחוח)Yahweh pab vajntxwv thiab nws tej tub txojsia.

11 Thiab kuv tso cai hais tias, yog leejtwg hloov tej uas tshaj tawm no, kuj yuav rho ib tug ntoo tawm hauv nws lub tsev thiab muab nws chob rau tus ntoo ntawd thiab nws lub tsev yuav ua ib lub chaw uas pov tej khoom qias rau hauv, vim qho uas nws yuam txoj cai no.

12 Thov cia (יחוח)Yahweh uas ua rau nws lub npe nyob qhov ntawd rhuav tshem tus vajntxwv twg lossis haiv neeg twg uas cev tes hloov tej nqes hais no lossis ua rau (יחוח)Yahweh lub tuam tsev hauv Yeluxalees puam tsuaj.  Kuv yog Dali‑as tso txojcai li no.  Nej yuav tau rau siab ntso ua tej no.  

13 Thathenais uas kav lub xeev sab dej Yufetis hnub poob thiab Sethas Npauxenais thiab cov uas koom nrog nkawv kuj rau siab ntso ua tej uas vajntxwv Dali‑as hais.

14 Mas Yahdah cov kev txwj laug kuj ua lub tuam tsev tiav raws li uas xibhwb Tshakhiyah uas hais pom tom hauv ntej thiab cev (יחוח)Yahweh lus thiab Xekhaliyah uas yog Idaus tus xeeb ntxwv uas cev (יחוח)Yahweh lus hais rau lawv. Lawv thiaj ua tau tiav raws li Ixayees Tus Tswv hais kom lawv ua thiab raws li Pawxias tej vajntxwv uas yog Xailab thiab Dali‑as thiab Athaxawxes tso cai rau lawv ua.

15 Lub tuam tsev no ua tiav rau lub hli Adas, hnub xiab peb, rau xyoo rau uas Dali‑as ua vajntxwv kav.

16 Mas cov Ixayees thiab cov pov thawj thiab cov Levis thiab lwm tus uas raug kuav mus poob tebchaws rov los, ua kevcai zoo siab xyiv fab xyeem pub lub tuam tsev no rau (יחוח)Yahweh.

17 Thaum lawv ua kevcai xyeem pub lub tuam tsev no rau (יחוח)Yahweh, lawv xyeem ib puas tus txiv nyuj, ob puas tus txiv yaj, plaub puas tus menyuam yaj thiab muab kaum ob tug txiv tshis los ua kevcai xyeem daws cov Ixayees lub txim, raws li cov Ixayees tej xeem.

18 Thiab lawv tu cov pov thawj nyob ua pab ua pawg thiab tu cov Levis ua pab ua pawg ua koom tu (יחוח)Yahweh hauv Yeluxalees raws li uas sau cia rau hauv Mauxes phau ntawv.

19 Hnub xiab kaum plaub, lub ib hlis, cov uas poob tebchaws rov los kuj ua kevcai Hla Dhau.  

20 Cov pov thawj thiab cov Levis twb ua kevcai tu lawv tus kheej kom dawb huv txhij lawm, lawv thiaj tua tej menyuam yaj ua kevcai Hla Dhau rau cov uas poob tebchaws rov los sawvdaws thiab rau lawv cov kwvtij uas ua pov thawj thiab rau lawv tus kheej.

21 Cov Ixayees uas poob tebchaws rov los thiab txhua tus uas koom nrog lawv thiab cais ntawm lwm haiv neeg tej kev qias vuab tsuab es yuav pe hawm (יחוח)Yahweh uas yog cov Ixayees Tus Tswv kuj tau noj kevcai Hla Dhau.

22 Thiab lawv ua kevcai noj ncuav tsis xyaw keeb xya hnub zoo siab xyiv fab, vim yog (יחוח)Yahweh ua rau lawv zoo siab xyiv fab thiab hloov Axilias tus vajntxwv lub siab tig los thiaj pab lawv tej haujlwm uas ua

(יחוח)Yahweh lub tuam tsev uas yog Ixayees Tus Tswv.