Exaleyah Los Txog Yeluxalees

1 Los rau tom qab no thaum Athaxawxes ua vajntxwv kav Pawxias tebchaws, mas muaj ib tug hu ua Exaleyah. Nws yog Xelayah tus tub, Xelayah yog Axaliyah tub, Axaliyah yog Hikhiyah tub,

2 Hikhiyah yog Salus tub, Salus yog Xadaus tub, Xadaus yog Ahithus tub, 

3 Ahithus yog Amaliyah tub, Amaliyah yog Axaliyah tub, Axaliyah yog Melayaus tub,

4 Melayaus yog Xelahiyah tub, Xelahiyah yog Uxis tub, Uxis yog Npukhis tub,

5 Npukhis yog Anpisuas tub, Anpisuas yog Finehas tub, Finehas yog Ele‑axas tub, Ele‑axas yog tus tuam pov thawj hlob Aloos tus tub.

6 Tus Exaleyah no tawm hauv Npanpiloos tebchaws los. Nws yog ib tug xibhwb uas paub Mauxes txoj kevcai uas (יחוח)Yahweh uas yog cov Ixayees Tus Tswv pub rau lawv.  Thiab vajntxwv pub txhua yam raws li Exaleyah thov, vim yog (יחוח)Yahweh uas yog nws Tus Tswv txhais tes roos rawv nws.  

7 Muaj cov Ixayees qee leej thiab cov pov thawj thiab cov Levis qee leej thiab cov tub hu nkauj thiab cov zov tej rooj loog thiab cov uas ua haujlwm hauv lub tuam tsev, kuj tau nrog nws los rau hauv Yeluxalees rau xyoo xya uas Athaxawxes ua vajntxwv.

8 Exaleyah los txog hauv Yeluxalees rau lub tsib hlis rau xyoo xya uas vajntxwv kav.

9 Hnub xiab ib, lub ib hlis, nws sawv kev tawm hauv Npanpiloos tebchaws, mas hnub xiab ib, lub tsib hlis, nws los txog hauv Yeluxalees, vim yog (יחוח)Yahweh uas yog nws Tus Tswv txhais tes zoo roos rawv nws.  

10 Exaleyah yog tus rau siab ntso kawm (יחוח)Yahweh txoj kevcai thiab ua raws nraim, thiab qhia (יחוח)Yahweh tej kab ke thiab tej kevcai rau cov Ixayees.

11 No yog tej lus hauv tsab ntawv uas vajntxwv Athaxawxes muab rau tus pov thawj Exaleyah uas yog tus xibhwb kawm paub txog (יחוח)Yahweh tej lus cob qhia thiab tej kab ke uas muab rau cov Ixayees.  

12 Athaxawxes uas yog tus tuam vajntxwv sau rau tus pov thawj Exaleyah uas yog xibhwb paub (יחוח)Yahweh txoj kevcai.

13 Nimno kuv tso cai tias cov pejxeem Ixayees leej twg lossis lawv cov pov thawj thiab cov Levis uas nyob hauv kuv lub tebchaws leej twg xav mus rau Yeluxalees, kuj nrog koj mus tau.

14 Rau qhov vajntxwv thiab nws xya tus tub tuav xam txib koj mus tshuaj saib Yahdah thiab Yeluxalees txog qhov uas ua raws li koj Tus Tswv txoj kevcai uas nyob hauv koj txhais tes ntawd,

15 thiab coj tej nyiaj tej kub uas vajntxwv thiab nws cov tub tuav xam zoo siab pub rau Ixayees Tus Tswv uas muaj chaw nyob hauv Yeluxalees mus,

16 thiab coj tej nyiaj tej kub huvsi uas koj sau tau hauv lub xeev Npanpiloos thiab tej uas cov pejxeem thiab cov pov thawj zoo siab pub, yog tej uas lawv zoo siab yeem lus yuav pub rau lawv Tus Tswv lub tuam tsev uas nyob hauv Yeluxalees.

17 Tej nyiaj no koj yuav tau rau siab ntso yuav tej txiv nyuj, tej txiv yaj thiab tej menyuam yaj thiab tej uas ua kevcai xyeem qoob loo thiab tej uas hliv xyeem ua ke, mas koj yuav tau muab tej no xyeem rau saum lub thaj ntawm (יחוח)Yahweh lub tuam tsev hauv Yeluxalees.

18 Tej nyiaj tej kub uas tseem tshuav, koj thiab koj cov kwvtij pom zoo ua yam twg, kuj ua tau raws li koj Tus Tswv lub siab nyiam.

19 Tej twj siv uas muab cob rau koj siv ua haujlwm rau koj Tus Tswv lub tuam tsev, koj yuav tau cob rau ntawm Yeluxalees Tus Tswv lub xubntiag.

20 Yog tu ncua yam twg ntxiv rau koj Tus Tswv lub tuam tsev uas koj yuav tau nrhiav, cia li muab nyiaj hauv vajntxwv lub txhab mus yuav.

21 Thiab kuv uas yog vajntxwv Athaxawxes tso cai mus rau txhua tus uas saib txhab nyiaj hauv lub xeev sab dej Yufetis hnub poob hais tias, yam twg uas tus pov thawj Exaleyah uas yog xibhwb qhia (יחוח)Yahweh txoj kevcai thov ntawm nej, nej cia li ua tib zoo pub rau nws,

22 txog li ib puas talas nyiaj thiab ib puas khuas mog, ib puas npas cawv txiv hmab thiab ib puas npas roj, thiab ntsev mas pub tsis txhob xam tias npaum cas.  

23 Yam twg uas (יחוח)Yahweh hais lawd, kuj ua raws li ntawd puv npo rau (יחוח)Yahweh lub tuam tsev, xwv (יחוח)Yahweh txojkev npau taws thiaj tsis tshwm rau vajntxwv thiab nws tej tub lub tebchaws.

24 Kuv kuj qhia rau nej tias, tsis raug cai uas yuav sau se qoob loo, se lag luam, se liaj teb ntawm cov pov thawj thiab cov Levis thiab cov tub hu nkauj thiab cov uas zov tej rooj loog thiab cov tub teg tub taws uas ua haujlwm hauv lub tuam tsev thiab lwm tus uas ua haujlwm hauv (יחוח)Yahweh lub tuam tsev no ib tug li.

25 Exaleyah, koj cia li siv koj Tus Tswv lub tswvyim uas nyob hauv koj txhais tes tsa cov nom tswv thiab cov uas tu plaub rau cov pejxeem sawvdaws uas nyob hauv lub xeev sab dej Yufetis hnub poob, yog txhua tus uas paub (יחוח)Yahweh txoj kevcai. Cov uas tsis tau paub, nej yuav tau qhia.

26 Yog leejtwg tsis mloog koj Tus Tswv txoj kevcai thiab vajntxwv txoj kevcai, mas cia li txiav txim nruj rau tus ntawd, yog txim tuag lossis ntiab tawm tebchaws lossis txeeb kiag nws cuab txhiaj cuab tam lossis muab kaw kuj tau.

27 Qhuas (יחוח)Yahweh uas yog peb tej poj koob yawm txwv Tus Tswv, yog tus uas muab tej kev txawj no rau hauv vajntxwv lub siab kom nws tsim kho (יחוח)Yahweh lub tuam tsev hauv Yeluxalees kom tau koob meej,

28 thiab ua rau vajntxwv thiab nws cov tub tuav xam thiab nws cov thawj uas muaj hwjchim loj sawvdaws muab kuv saib hlob. Kuv thiaj muaj siab tuab, vim yog (יחוח)Yahweh uas yog kuv Tus Tswv txhais tes roos rawv kuv, kuv thiaj sau tau Ixayees cov thawj nrog kuv mus.