Sim Yauj Txojkev Ntseeg

1 Muaj ib tug yawg nyob hauv Us teb chaws npe hu ua Yauj. Nws yog ib tug tibneeg zoo, tsis muaj chaw thuam li thiab ua ncaj ncees, yog ib tug uas hwm thiab paub ntshai (יחוח)Yahweh thiab tseg tsis ua txojkev phem kiag li.

2 Nws muaj xya leej tub thiab peb leeg ntxhais.

3 Nws muaj xya txhiab tus yaj, peb txhiab tus ntxhuav, tsib puas nkawm nyuj, thiab tsib puas tus maum nees luav, thiab muaj tub qhe coob heev. Tus yawg no thiaj yog tus loj kawg nkaus hauv cov tibneeg sawvdaws uas nyob sab hnub tuaj.

4 Nws cov tub pheej npaj ib pluag noj rau hauv nyias lub tsev raws li hnub uas nyias teem tseg. Lawv kuj hu peb tug muam tuaj nrog lawv noj lawv haus thiab.

5 Thaum lawv noj haus puv ib ncig lawm, Yauj yuav kom lawv ua kevcai tu lawv tus kheej kom dawb huv, thiab nws yuav sawv ntxov ntxov tua tsiaj hlawv xyeem ua cov me nyuam feem ib leeg ib tug, rau qhov Yauj hais tias, tej zaum kuv cov menyuam tau ua txhaum thiab tsawm foom (יחוח)Yahweh hauv lawv lub siab. Yauj thiaj ua li no tsis tu ncua li.

6 Muaj ib hnub (יחוח)Yahweh cov tub txib saum ntuj los cuag (יחוח)Yahweh, Xatas kuj nrog lawv los thiab.

7 (יחוח)Yahweh hais rau Xatas tias, koj mus abtsi los? Xatas teb (יחוח)Yahweh tias, mus mus los los saum lub ntiajteb thiab ncig thoob lub ntiajteb los.

8 Mas (יחוח)Yahweh hais rau Xatas tias, koj twb tshuaj saib Yauj uas yog kuv tus qhev los tsis tau? Tag nrho lub ntiajteb tsis muaj leejtwg zoo cuag li nws, nws yog tus tibneeg zoo tsis muaj chaw thuam li thiab ua ncaj ncees, nws hwm thiab paub ntshai (יחוח)Yahweh thiab tseg tsis ua txojkev phem.

9 Xatas thiaj teb (יחוח)Yahweh tias, Yauj hwm thiab paub ntshai koj dawb dawb xwb lov?

10 Koj tsis tau xov laj kab puag ncig nws thiab nws tsev neeg thiab txhua yam uas nws muaj lov? Koj twb foom koob hmoov rau tej haujlwm uas nws txhais tes ua thiab nws tej tsiaj txhu huaj vam coob kawg rau hauv lub tebchaws.

11 Nimno cia li cev kiag koj txhais tes thiab kov txhua yam uas nws muaj, mas nws yeej yuav tsawm foom koj tab meeg koj.

12 (יחוח)Yahweh hais rau Xatas tias, saib nawj, txhua yam uas nws muaj nyob hauv koj lub hwjchim, tiamsis tsis txhob cev tes kov Yauj.  Xatas txawm tawm ntawm (יחוח)Yahweh xubntiag mus lawm.

13 Muaj ib hnub thaum Yauj tej tub tej ntxhais tab tom noj mov thiab haus cawv txiv hmab hauv lawv tus tijlaug hlob lub tsev,

14 txawm muaj ib tug xa xov los hais rau Yauj tias, cov nyuj tab tom laij teb thiab cov nees luav tab tom noj zaub ntawm ib sab,

15 mas cov tibneeg Xenpas txawm tuaj ntaus raws cov tsiaj ntawd mus thiab xuas ntaj tua cov tub qhe tuag tag, kuv tib leeg khiav dim los hais rau koj xwb.

16 Thaum nws tab tom hais, txawm muaj dua ib tug los hais tias, (יחוח)Yahweh li hluavtaws poob saum ntuj los kub cov yaj thiab cov tub qhe puam tsuaj tag huvsi lawm, kuv tib leeg khiav dim los hais rau koj xwb.

17 Thaum tus ntawd tab tom hais, txawm muaj dua ib tug los hais tias, cov tibneeg Kheedias ua peb pab tuaj lws kiag cov ntxhuav mus thiab xuas ntaj tua cov tub qhe tuag tag, kuv tib leeg khiav dim los hais rau koj xwb.

18 Thaum tus ntawd tab tom hais, txawm muaj dua ib tug los hais tias, koj cov tub ntxhais tab tom noj mov thiab haus cawv txiv hmab hauv lawv tus tijlaug hlob lub tsev,

19 txawm muaj cua daj cua dub hlob kawg ntsawj hauv tebchaws moj sab qhua tuaj nplawm lub tsev plaub fab ua rau lub tsev vau tsuam tej tub ntxhais mas lawv tuag tag, kuv tib leeg khiav dim los hais rau koj xwb.

20 Ces Yauj txawm sawv tsees dua rhe nws lub tsho ntev chais plaubhau thiab khwb nkaus rau hauv av pe hawm,

21 thiab nws hais tias, kuv tawm hauv kuv niam lub plab los liab qab tsuas, ces kuv yuav rov qab mus liab qab tsuas. (יחוח)Yahweh pub thiab (יחוח)Yahweh coj mus lawm. Cia li qhuas (יחוח)Yahweh lub npe.

22 Tej xwm txheej no huvsi, Yauj yeej tsis tau ua txhaum lossis hais tias (יחוח)Yahweh ua txhaum li.