1 Nyob muaj ib hnub cov tubtxib saum ntuj los cuag (יחוח)Yahweh, Xatas kuj nrog lawv los rau ntawm (יחוח)Yahweh xub ntiag thiab.

2 (יחוח)Yahweh hais rau Xatas tias, koj mus abtsi los? Xatas teb (יחוח)Yahweh tias, kuv mus mus los los saum lub ntiajteb thiab ncig thoob lub ntiajteb los.

3 Mas (יחוח)Yahweh hais rau Xatas tias, koj twb tshuaj saib Yauj uas yog kuv tus qhev los tsis tau? Tag nrho lub ntiajteb tsis muaj leejtwg zoo cuag li nws, nws yog tus tibneeg zoo, tsis muaj chaw thuam li thiab ua ncaj ncees, nws hwm thiab paub ntshai (יחוח)Yahweh thiab tseg tsis ua txojkev phem.  Txawm yog koj tshum kom kuv tawm tsam nws, ua kom nws puam tsuaj, twb tsis tim li abtsi, los nws kuj tseem tuav rawv nws txojkev ncaj ncees.

4 Mas Xatas teb (יחוח)Yahweh tias, tawv nqaij pauv tawv nqaij. Tibneeg yeem muab txhua yam uas nws muaj pauv nws txojsia.

5 Nimno koj cia li cev tes kov nws tej pob txha thiab nws cev nqaij, mas nws yuav tsawm foom koj tab meeg koj.

6 (יחוח)Yahweh hais rau Xatas tias, saib nawj, nws nyob hauv koj lub hwjchim, tsuas yog tseg nws txojsia xwb.

7 Xatas txawm tawm ntawm (יחוח)Yahweh xubntiag mus lawm, thiab ua rau Yauj mob rwj ua kiav txhab txij ntawm nws xib taws nto plaws saum tiaj taubhau. 8 Yauj muab tej txhais laujkaub av los kuam nws lub cev thiab nws zaum hauv cub tshau.  

9 Mas nws tus pojniam hais rau nws tias, koj tseem tuav rawv koj txojkev ncaj ncees lov? Cia li tsawm foom (יחוח)Yahweh thiab tuag los maj.  

10 Yauj hais rau nws tias, koj hais lus yam li tej pojniam ruam hais.  Peb yuav txais tej uas zoo ntawm (יחוח)Yahweh txhais tes xwb es tsis txais tej uas tsis zoo thiab lov? Tej xwm txheej no huvsi Yauj lub qhov ncauj tsis hais ib los txhaum li.

​

Yauj Peb Tug Kwvluag Tuaj 

11 Thaum Elifas uas yog tibneeg Themas, thiab Npidas uas yog tibneeg Su‑as thiab Xaufas uas yog tibneeg Na‑amas, uas yog Yauj peb tug kwvluag tau hnov txog tej xwm txheej phem uas los raug Yauj huvsi, lawv nyias tawm hauv nyias lub tsev sib teem caij tuaj hlub Yauj thiab nplij nws lub siab.

12 Thaum lawv tuaj deb deb pom nws, lawv cim tsis tau nws.  Lawv tsa suab quaj qw thiab dua rhe lawv lub tsho thiab tsuab hmoov av w ntawm lawv taubhau rau saum nruab ntug.

13 Lawv nrog Yauj zaum hauv av tau xya hnub xya hmo, tsis muaj ib tug hais ib lo lus rau nws, rau qhov lawv pom tias nws tej kev txom nyem ntawd loj kawg li.