Hadassah Npaj Ib Pluag Mov Rau Vajntxwv Thiab Hamas Noj

1 Mas hnub uas peb, Hadassah hnav nws cev tsoos poj vajntxwv thiab mus sawv hauv vajntxwv lub tsev ntawm lub tshav puam sab hauv ncaj ntawm chav uas vajntxwv nyob. Vajntxwv zaum saum nws lub zwm txwv hauv vajtntxiv lub tsev ncaj ntawm txojkev uas nkag los.

2 Thaum vajntxwv pom poj vajntxwv Hadassah sawv ntsug hauv lub tshav puam, nws kuj txaus siab rau Hadassah thiab cev nws tus cwj kub uas nyob hauv nws txhais tes rau Hadassah. Hadassah txawm txav los kov tus hauv cwj.

3 Vajntxwv hais rau nws tias, poj vajntxwv Hadassah, muaj abtsi? Koj thov yam twg? Kuv yuav pub rau koj, txawm yog pub kuv lub tebchaws ib nrab kuj tau.

4 Hadassah thiaj hais tias, yog txaus vajntxwv lub siab, hmo no thov vajntxwv thiab Hamas los noj pluas mov uas kuv npaj rau vajntxwv lawd.

5 Ces vajntxwv txawm hais tias, coj Hamas maj nroos tuaj, wb yuav ua raws li Hadassah lub siab xav.  Vajntxwv thiab Hamas thiaj mus rau ntawm rooj mov uas Hadassah npaj cia.

6 Thaum lawv tab tom haus cawv txiv hmab, vajntxwv rov hais dua rau Hadassah tias, koj thov abtsi? Kuv yuav pub rau koj. Txawm yog yuav kuv lub tebchaws ib nrab los kuj tau.

7 Mas Hadassah hais tias, kuv tej lus taij thiab kuv tej lus thov yog li no.

8 Yog vajntxwv hlub kuv thiab txaus siab pub raws li kuv tej lus taij thiab kuv tej lus thov no kom tiav, mas tagkis thov vajntxwv thiab Hamas rov los noj pluas mov uas kuv yuav npaj rau neb thiab, mas tagkis kuv mam hais tej uas kuv xav thov rau vajntxwv paub.

9 Mas hnub ntawd Hamas tawm mus zoo siab xyiv fab kawg li. Tiamsis thaum Hamas pom Maudekhais ntawm vajntxwv lub rooj loog, nws tsis sawv lossis tsis ntshai Hamas ua tshee hnyo, Hamas kuj npau taws heev rau Maudekhais.

10 Txawm li ntawd los Hamas ua ib siab uv rov mus tsev. Nws txib tibneeg mus coj nws cov phoojywg thiab nws tus pojniam Xelev los.

11 Hamas khav txog nws tej nyiaj txiag nplua mias thiab piav txog nws muaj pes tsawg tus menyuam thiab tej koob meej uas vajntxwv pub rau nws thiab piav txog qhov uas vajntxwv tsa nws ua loj dua cov thawj thiab vajntxwv cov tub teg tub taws huvsi.  

12 Thiab Hamas hais ntxiv tias, txawm yog poj vajntxwv Hadassah los twb tsis caw leejtwg mus nrog vajntxwv noj pluas mov uas nws npaj, tsuas yog caw kuv xwb. Thiab tagkis nws tseem caw kuv thiab vajntxwv rov mus dua.

13 Tiamsis tej no tsis muaj qabhau rau kuv li, rau ncua sijhawm uas kuv tseem pom Maudekhais uas yog tibneeg Yahdais zaum ntawm vajntxwv lub rooj loog.

14 Nws tus pojniam Xelev thiab nws cov phoojywg sawvdaws hais rau nws tias, cia li mus txhos ib tug ncej uas dai tibneeg, siab tsib caug tshim, es tagkis sawv ntxov kuj thov vajntxwv kom muab Maudekhais dai caj pas rau tus ncej ntawd tso mam mus nrog vajntxwv noj haus zoo siab hlo.  Tej lus no haum Hamas lub siab heev, nws thiaj hais kom ua tus ncej dai caj pas ntawd.