Maudekhais Thov Hadassah Pab Lawv

1 Thaum Maudekhais paub txhua yam uas twb ua los lawd, nws txawm dua rhe nws lub tsho, hnav khaub seev tsaj pleev tshauv tawm mus rau hauv plawv lub nroog, nws quaj nrov lwj siab kawg.

2 Nws mus rau ntawm txojkev uas yuav nkag rau hauv vajntxwv lub rooj loog, rau qhov tsis muaj leejtwg hnav khaub seev tsaj nkag tau rau hauv vajntxwv lub rooj loog.

3 Thiab hauv txhua lub xeev uas vajntxwv tej lus thiab nws tsab kevcai mus txog muaj kev ntxhov siab loj heev rau hauv cov Yahdais.  Lawv yoo mov thiab quaj thiab quaj ntsuag thiab muaj tibneeg coob coob hnav khaub seev tsaj pw da pleev tshauv.

4 Thaum Hadassah cov nkauj qhe thiab nws cov nraug sam los qhia rau nws paub, poj vajntxwv kuj ntxhov siab heev.  Nws thiaj xa ris tsho rau Maudekhais hnav xwv nws thiaj hloov tej khaub seev tsaj tseg, tiamsis nws tsis kam txais tej ris tsho ntawd.

5 Ces Hadassah txawm hu vajntxwv ib tug nraug sam Hathas uas raug tsa tu Hadassah tuaj, thiab hais kom Hathas mus nug Maudekhais saib yog muaj abtsi thiab yog ua cas.

6 Hathas txawm mus cuag Maudekhais ntawm lub tshav puam hauv lub nroog uas nyob ntawm vajntxwv lub rooj loog sab nraud.

7 Maudekhais kuj piav txhua yam uas muaj tshwm los rau Hathas mloog, thiab qhia txog tej nyiaj uas Hamas yeem lus pub rau hauv vajntxwv tej txhab, muaj npaum li cas thiaj ua tau cov Yahdais puam tsuaj.

8 Maudekhais tseem muab tsab ntawv kevcai uas tshaj tawm hauv Xuxas kom muab cov Yahdais ua puam tsuaj rau Hathas coj mus rau Hadassah saib thiab qhia lub ntsiab rau nws thiab hais kom Hadassah mus cuag vajntxwv thiab thov vajntxwv thiab taij thov nws saib rau Hadassah haiv neeg.

9 Hathas thiaj rov mus qhia tej uas Maudekhais hais ntawd rau Hadassah mloog. 10 Mas Hadassah thiaj hais rau Hathas kom xa xov rau Maudekhais tias, 11 vajntxwv cov tub teg tub taws sawvdaws thiab cov pejxeem hauv vajntxwv tej xeev, yeej paub tias yog tus txivneej twg lossis tus pojniam twg, lam nkag mus cuag vajntxwv rau hauv lub tshav puam sab hauv uas tsis yog vajntxwv hu kom mus cuag, kuj muaj tib txoj kevcai nkaus xwb. Sawvdaws yuav raug muab tua pov tseg, tsuas yog tseg tus uas vajntxwv cev nws tus cwj kub tos txais ces tus ntawd thiaj li tsis tuag xwb.  Kuv twb tsis raug hu mus cuag vajntxwv tau peb caug hnub lawm.

12 Lawv thiaj los hais rau Maudekhais paub txog tej uas Hadassah hais ntawd.

13 Maudekhais thiaj hais kom lawv rov mus teb Hadassah tias, tsis txhob xav tias, vim koj nyob hauv vajntxwv lub tsev lawm ces koj nrog rau tag nrho cov Yahdais sawvdaws yuav dim.

14 Yog lub sijhawm no koj pheej nyob twjywm, tsis kam hais tawm, yuav muaj kev pab thiab kev cawm dim ntawm lwm qhov tuaj pab cov Yahdais, tiamsis koj thiab koj txiv tsev neeg yuav raug puam tsuaj. Leejtwg yuav paub tias qhov uas koj tau los ua poj vajntxwv no tej zaum twb yog koj yuav pab tau rau lub sijhawm zoo li no?

15 Ces Hadassah hais kom lawv mus hais rau Maudekhais tias,

16 cia li mus, sau zog cov Yahdais huvsi hauv lub nroog Xuxas uas nrhiav tau thiab yoo mov thov pab kuv, tsis txhob noj tsis txhob haus peb hnub, nruab hnub, hmo ntuj.  Kuv thiab kuv cov nkauj qhe kuj yuav yoo mov ib yam nkaus li nej thiab. Mas kuv yuav nkag mus cuag vajntxwv, txawm yog txhaum kevcai kuj xij.  Yog kuv raug puam tsuaj, kuj cia kuv puam tsuaj.

17 Maudekhais thiaj rov mus ua txhua yam raws li Hadassah hais rau nws.