HADASSAH 3

Hamas Npaj Tswvyim Phem Txov Cov Yahdais

1 Dhau tej xwm txheej no lawm, vajntxwv Xawxes muab Hamedathas tus tub Hamas uas yog tibneeg Akas tsa ua loj tuaj, thiab muab koob meej rau thiab muab nws lub rooj txawb kom nyob siab dua cov thawj uas nrog nws nyob sawvdaws.

2 Vajntxwv cov tub teg tub taws uas nyob ntawm vajntxwv lub rooj loog sawvdaws txhos caug hawm Hamas, vim yog vajntxwv hais kom hawm nws li ntawd. Tiamsis Maudekhais tsis txhos caug lossis hawm Hamas.

3 Vajntxwv cov tub teg tub taws ntawm vajntxwv lub rooj loog hais rau Maudekhais tias, ua cas koj tsis ua raws li vajntxwv hais?

4 Lawv pheej niaj hnub hais rau Maudekhais los nws kuj tsis mloog lawv hais, lawv txawm mus hais rau Hamas, saib Maudekhais tej lus yuav kov yeej los tsis yeej, vim yog nws hais tias nws yog tibneeg Yahdais.

5 Thaum Hamas pom tias Maudekhais tsis txhos caug thiab tsis pe nws, Hamas txawm npau taws heev.

6 Tiamsis nws pom tias qhov uas ntes Maudekhais ib leeg xwb tsis txaus nws siab.  Vim muaj tibneeg hais rau nws tias Maudekhais haiv neeg yog haiv twg, Hamas thiaj nrhiav kev txov cov Yahdais sawvdaws uas yog Maudekhais haiv neeg, thoob plaws lub tebchaws uas Xawxes kav.  

7 Lub ib hlis uas yog lub hli Nixas, yog Xyoo kaum ob uas Xawxes ua vajntxwv mas lawv khov kuam Phus (lub npe uas siv khov kuam) tab meeg Hamas saib hnub twg thiab lub hli twg thiaj zoo tua cov Yahdais, mas saib tau hnub kaum peb, lub kaum ob hlis uas yog lub hli Adas.

8 Thaum khov kuam tag, paub tias hnub twg thiab hli twg lawm, ces Hamas txawm hais rau vajntxwv Xawxes tias, muaj ib haiv neeg nyob thoob plaws txhua qhov thiab faib mus nyob txuam rau hauv tej tibneeg hauv txhua lub xeev uas koj kav. Lawv tej kevcai txawv ib tsoom tibneeg sawvdaws tej kevcai, thiab lawv tsis ua raws li vajntxwv tej kevcai, qhov uas tso lawv nyob li no, tsis muaj qabhau abtsi rau vajntxwv li.

9 Yog vajntxwv pom zoo, thov tso cai kom muab cov tibneeg no ua kom puam tsuaj tag, mas kuv yuav pub ib vam talas nyiaj rau hauv vajntxwv tej txhab nyiaj es muab rau cov uas ua vajntxwv haujlwm.

10 Vajntxwv txawm hle nws lub nplhaib txam txwm ntawm nws txhais tes muab rau Hamedathas tus tub Hamas uas yog tibneeg Akas thiab yog cov Yahdais tus yeeb ncuab.  

11 Vajntxwv hais rau Hamas tias, kuv muab cov tibneeg ntawd thiab lawv tej nyiaj txiag cob nkaus rau koj, koj ua rau lawv raws li koj pom zoo.

12 Mas hu vajntxwv cov tub sau ntawv tuaj rau hnub xiab kaum peb, lub ib hlis, mas lawv sau tsab kevcai raws li uas Hamas hais txhua yam xa mus rau cov thawj uas vajntxwv tsa kav tebchaws thiab rau cov uas kav txhua lub xeev huvsi thiab mus rau txhua haiv neeg cov thawj, yog xa mus rau txhua lub xeev, ua txhua lub xeev li npe ntawv thiab txhua haiv neeg li lus, sau ua vajntxwv Xawxes npe thiab ntaus cim uas yog vajntxwv lub nplhaib txam txwm rau.

13 Muaj tibneeg xa tej ntawv no mus tseb rau txhua lub xeev uas vajntxwv kav, kom tua ntxuav cov Yahdais tej laus, tej hluas, pojniam thiab menyuam sawvdaws tag nrho rau ib hnub, yog hnub xiab kaum peb, lub kaum ob hlis uas yog lub hli Adas, thiab txeeb kiag lawv cuab txhiaj cuab tam huvsi.

14 Tsab kevcai no yuav muab tshaj tawm rau hauv txhua lub xeev kom ib tsoom tibneeg sawvdaws npaj txhij rau hnub ntawd.

15 Cov tibneeg xa xov ntawd maj nroos mus raws li vajntxwv hais, thiab tsab kevcai kuj tshaj tawm rau hauv lub nroog Xuxas. Vajntxwv thiab Hamas zaum haus cawv txiv hmab, tiamsis lub nroog Xuxas kub ntxhov heev.