HADASSAH 2

Tsa Hadassah Ua Poj Vajntxwv

1 Dhau tej xwm txheej no lawd, thaum vajntxwv Xawxes txojkev npau taws nqeg lawm, nws nco txog Vasatis thiab tej uas Vasatis tau ua thiab tej lus tawv uas tshaj tawm hais txog Vasatis.

2 Cov tub teg tub taws uas tu vajntxwv txawm hais tias, cia li nrhiav tej hluas nkauj dawb huv uas zoo nkauj los rau vajntxwv.

3 Thiab cia vajntxwv tsa cov nom tswv hauv txhua lub xeev uas nws kav kom coj cov hluas nkauj dawb huv uas zoo nkauj ntawd sawvdaws los rau hauv lub tsev pojniam hauv lub nroog Xuxas. Thiab muab cob rau vajntxwv tus nraug sam Hekais uas saib cov pojniam uas saib xyuas tej ntxhais ntawd. Thiab muab tshuaj rau cov ntxhais ntawd pleev.

4 Yog tus ntxhais twg txaus vajntxwv lub siab, cia tus ntawd ua poj vajntxwv nyob Vasatis chaw. Qhov no haum vajntxwv lub siab, vajntxwv thiaj ua li ntawd.

5 Muaj ib tug Yahdais nyob hauv lub nroog Xuxas npe hu ua Maudekhais.  Nws txiv yog Ya‑is, nws yawg yog Sime‑is, nws yawg koob yog Khij, yog xeem Npeeyamees,

6 yog cov uas vajntxwv Nenpukhanexas hauv Npanpiloos kuav nrog Yahdah tus vajntxwv Yahyakhees tawm hauv Yeluxalees los.

7 Maudekhais tu Hadassah, yog nws tus

ntxhais kwvtij, rau qhov nws tsis muaj niam tsis muaj txiv lawm. Tus ntxhais no lub cev ntaj ntsug zoo nkauj, mas thaum nws niam nws txiv tuag tag lawd, Maudekhais coj nws los tu ua nws tus ntxhais.

8 Mas thaum vajntxwv tej lus thiab nws txoj kevcai tshaj tawm lawm, thiab thaum lawv coj tej ntxhais hluas coob los rau hauv lub nroog Xuxas muab cob rau Hekais saib xyuas, Hadassah kuj raug coj los rau hauv vajntxwv lub tsev thiab muab cob rau Hekais uas saib xyuas cov pojniam thiab.

9 Tus ntxhais ntawd txaus Hekais lub siab thiab ntxim hlub, Hekais thiaj maj nroos muab tshuaj rau Hadassah pleev thiab tu tej zaub mov zoo rau nws noj thiab pub xya tus nkauj qhe uas xaiv hauv vajntxwv lub tsev rau nws thiab muab nws thiab nws cov nkauj qhe tshais mus nyob lub chaw uas zoo kawg nkaus hauv lub tsev pojniam.

10 Hadassah tsis qhia tias nws yog haiv neeg twg thiab yog leejtwg tsev neeg, vim yog Maudekhais txwv tsis kheev nws qhia rau leejtwg paub.

11 Maudekhais niaj hnub hla tuaj mus nraum lub tshav puam ntawm lub tsev pojniam, mloog xov saib Hadassah zoo li cas thiab muaj abtsi tshwm rau nws.

12 Cov hluas nkauj txhua tus yuav tau nyob raws li tej kevcai uas teem cia rau cov pojniam kaum ob lub hlis tso li mus cuag tau vajntxwv Xawxes. No yog lub sijhawm uas teem cia rau lawv tu cev kom zoo nkauj, muab rau lub hli pleev roj tsw qab thiab rau lub hli pleev txuj lom thiab tshuaj tsw qab.  

13 Thaum tus hluas nkauj mus cuag vajntxwv li no, nws xav coj abtsi ntawm vajntxwv lub tsev pojniam mus lawv kuj muab rau nws coj.

14 Nws mus cuag vajntxwv rau yav tsaus ntuj, mas tagkis sawv ntxov, nws rov los rau hauv lub tsev pojniam uas ob, muab cob rau vajntxwv tus nraug sam Sa‑akas saib, yog tus uas saib xyuas cov hluas nkauj uas vajntxwv kav.  Nws yuav tsis tau rov los cuag vajntxwv dua li lawm, yuav yog vajntxwv txaus siab rau nws thiab hu nws lub npe mas nws thiaj yuav tau rov los.

15 Thaum txog lub sijhawm uas Anpiha‑is tus ntxhais Hadassah uas Anpiha‑is tus kwvtij Maudekhais coj los tu, mus cuag vajntxwv, Hadassah tsis thov ib yam abtsi li, tsuas yog tej uas vajntxwv tus nraug sam Hekais uas saib xyuas cov pojniam qhia kom nws yuav xwb. Txhua tus uas pom Hadassah kuj txaus siab rau nws.

16 Thaum lawv coj Hadassah mus cuag vajntxwv Xawxes rau hauv vajntxwv lub tsev, yog lub kaum hli uas yog lub hli Thenpes, yog xyoo xya uas nws ua vajntxwv.  

17 Vajntxwv nyiam Hadassah heev dua lwm tus pojniam huvsi thiab Hadassah tau vajntxwv txojkev hlub, txojkev txaus siab ntau dua lwm tus hluas nkauj dawb huv huvsi, nws thiaj muab lub mom poj vajntxwv rau Hadassah ntoo saum taubhau thiab tsa nws ua poj vajntxwv nyob Vasatis chaw.

18 Mas vajntxwv npaj noj haus loj rau nws cov thawj thiab nws cov tub teg tub taws sawvdaws, yog noj Hadassah rooj mov. Vajntxwv kuj so tsis sau se ntawm txhua lub xeev ib ntus, thiab nws ua siab dav pub tshav ntuj raws li uas tsim nyog vajntxwv pub.

​

Maudekhais Cawm Vajntxwv

19 Thaum sau cov hluas nkauj dawb huv rov tuaj zaum ob, Maudekhais zaum ntawm vaj ntxwv lub rooj loog.  

20 Hadassah tsis tau qhia nws tsev neeg thiab nws haiv neeg rau leejtwg paub, raws li Maudekhais txwv nws cia, rau qhov Hadassah mloog Maudekhais lus ib yam nkaus li thaum Maudekhais tu nws.

21 Lub sijhawm ntawd Maudekhais pheej zaum ntawm vajntxwv lub rooj loog, mas Npithas thiab Theles uas yog vajntxwv ob tug nraug sam uas zov qhov rooj txawm chim thiab nrhiav kev yuav txov vajntxwv Xawxes.

22 Mas Maudekhais hnov txog tej no, nws thiaj qhia rau poj vajntxwv Hadassah, Hadassah thiaj tuav txog Maudekhais lub npe qhia rau vajntxwv.

23 Thaum muab tej no tshuaj saib mas pom tias muaj tseeb, ces ob tug ntawd txawm raug muab dai caj pas tuag lawm.  Luag twb muab tej no sau cia rau hauv phau ntawv keeb kwm tab meeg vajntxwv.