Poj Vajntxwv Tsis Mloog Vajntxwv Xawxes Lus

1 Tej xwm txheej no muaj rau thaum Xawxes ua vajntxwv, yog tus Xawxes uas kav txij ntua Idias tebchaws mus txog ntua Ithi-aupiam tebchaws, huvsi yog ib puas nees nkaum xya lub xeev.

2 Thaum ntawd vajntxwv Xawxes nyob hauv lub nroog loj Xuxas kav.  

3 Xyoo peb uas nws ua vajntxwv, nws npaj ib zaug noj haus rau nws cov thawj thiab nws cov tub teg tub taws huvsi, mas cov thawj rog hauv Pawxias thiab Midias tebchaws thiab cov uas ua hlob thiab cov thawj uas kav txhua lub xeev kuj tuaj nrog nws koom ua ke.

4 Nws qhia nws tej nyiaj txiag ntau kawg hauv tej tebchaws uas nws kav thiab nws lub meej mom thiab nws lub hwjchim tau ntau hnub mus txog thaum tau ib puas yim caum hnub.

5 Thaum dhau lub sijhawm ntawd lawm, vajntxwv npaj ib rooj noj haus rau txhua tus uas nyob hauv lub nroog Xuxas, tsis hais tus hlob tus yau li, sawvdaws noj tau xya hnub hauv lub tshav puam ntawm lub vaj uas nyob hauv vajntxwv lub tsev.

6 Muaj ntaub pag dawb thiab ntaub xiav tis rau txoj hlua maj thiab txoj hlua ntaub tsamxem dai rau tej ntsej nyiaj ntawm tej ncej zeb mos, thiab muaj tej rooj kub, rooj nyiaj, nyob saum lub plag tsev tshav puam uas pua tej txiag zeb liab tsim tseb, tej txiag zeb mos, tej plhaub qwj thiab tej qe zeb hlaws sib quas.

7 Thiab muab cawv txiv hmab hliv rau hauv ntau yam khob kub thiab hliv vajntxwv tej cawv txiv hmab nplua mias raws li vajntxwv lub siab dav.

8 Lawv haus raws li txoj kevcai tsis txwv tsis yuam, rau qhov vajntxwv hais kom cov tub qhe sawvdaws hauv vajntxwv lub tsev muab rau txhua tus haus raws li lub siab nyiam.

9 Poj vajntxwv Vasatis kuj npaj noj haus rau cov niam tsev noj rau hauv vajntxwv Xawxes lub tsev thiab.

10 Hnub uas xya, thaum vajntxwv haus cawv txiv hmab zoo siab lawm, nws txawm hais rau Mehumas, Npixathas, Hanpaunas, Npithas, Anpathas, Xethias thiab Khakas, uas yog xya tus nraug sam uas tu vajntxwv Xawxes,

11 kom mus coj poj vajntxwv Vasatis ntoo lub mom poj vajntxwv los cuag vajntxwv, xwv nws thiaj qhia tau qhov uas poj vajntxwv zoo nkauj ci nplas rau cov pejxeem thiab cov thawj saib, vim poj vajntxwv zoo nkauj heev.

12 Tiamsis poj vajntxwv Vasatis tsis kam los raws li vajntxwv txib cov nraug sam mus hais rau nws.  Mas qhov no ua rau vajntxwv npau taws heev, nws chim rau hauv lub siab kawg li.

13 Vajntxwv txawm hu cov uas txawj ntse paub caij paub nyoog tuaj rau qhov no, yog txojkev uas vajntxwv pheej nrog cov uas paub cai thiab txawj tu plaub sawvdaws sablaj,

14 yog cov uas yau vajntxwv, yog Khasenas, Sethas, Amathas, Thasis, Meles, Maxenas thiab Memukhas. No yog Pawxias thiab Midias tebchaws xya tus thawj uas pheej los cuag tau vajntxwv thiab yog cov thawj hauv vajntxwv lub tebchaws.

15 Vajntxwv hais tias, raws li txoj kevcai, yuav ua li cas rau poj vajntxwv Vasatis, rau qhov nws tsis ua raws li vajntxwv Xawxes kom cov nraug sam hais rau nws?

16 Ces Memukhas txawm hais tab meeg rau vajntxwv thiab cov thawj tias, poj vajntxwv tsis yog ua txhaum rau vajntxwv xwb, tiamsis yog ua txhaum rau cov thawj sawvdaws thiab cov pejxeem sawvdaws uas nyob hauv txhua lub xeev uas vajntxwv Xawxes kav,

17 vim tej uas poj vajntxwv ua no yuav paub thoob plaws rau hauv ib tsoom pojniam, ua rau lawv saib tsis taus lawv tej txiv.  Rau qhov lawv yuav hais tias, Vajntxwv Xawxes hais kom coj poj vajntxwv Vasatis los cuag nws, tiamsis poj vajntxwv kuj tsis los.

18 Mas hnub no vajntxwv cov thawj hauv Pawxias thiab hauv Midias tej pojniam txhua tus uas hnov txog tej uas poj vajntxwv ua no lawm, yuav piav rau vajntxwv cov thawj sawvdaws paub mas yuav ua rau muaj kev saib tsis taus thiab kev npau taws heev.

19 Yog vajntxwv pom zoo, mas cia vajntxwv tawm ib tsab kevcai thiab muab sau tseg rau hauv Pawxias thiab Midias tej kevcai kom thiaj thim tsis tau tej lus hais tias, Vasatis yuav los cuag tsis tau vajntxwv Xawxes dua li lawm. Thiab cia vajntxwv muab lub rooj uas ua poj vajntxwv pub rau lwm tus uas zoo dua nws.

20 Thaum tshaj tawm vajntxwv tej lus no thoob plaws vajntxwv lub tebchaws uas dav thiab loj no, mas ib tsoom pojniam thiaj li hwm lawv tus txiv, tsis hais tus ua loj ua yau.

21 Tej lus taw qhia no txaus vajntxwv thiab cov thawj sawvdaws lub siab, vajntxwv thiaj ua raws li Memukhas tej lus.

22 Vajntxwv thiaj xa tsab ntawv tseb mus thoob plaws txhua lub xeev uas nws kav, ua txhua lub xeev li npe ntawv thiab txhua haiv neeg li lus, hais kom txhua tus txivneej ua tus tswv uas tswjhwm nws tsev neeg thiab hais nws yam lus.