Nehemyah Tsim Kho Dua Tshiab

1 Hnub ntawd lawv nyeem Mauxes phau ntawv rau cov pejxeem mloog mas lawv pom qhov uas sau cia hais tias, tsis txhob kheev cov Asmoos thiab cov Mau‑as koom nrog (יחוח)Yahweh haiv neeg mus ib txhis,

2 rau qhov lawv tsis tau muab mov thiab dej los tos txais cov Ixayees, tiamsis lawv tseem ntiav Npala‑as tuaj tsawm foom cov Ixayees.  Tiamsis peb Tus Tswv muab tej lus foom ntawd ntxeev ua koob hmoov.

3 Thaum cov pejxeem hnov txoj kevcai ntawd, lawv txawm muab txhua tus uas yog lwm haiv neeg li keeb, cais tawm hauv cov Ixayees.

4 Ua ntej no tus pov thawj Eliyasis uas tau raug tsa ua tus uas saib xyuas tej chav hauv (יחוח)Yahweh lub tuam tsev thiab nrog Thaunpiyah ua phoojywg,

5 tau tu ib chav dav rau Thaunpiyah, yog chav uas tau siv khaws tej uas ua kevcai xyeem qoob loo, roj ntoos tsw qab, tej twj siv thiab ib feem kaum uas yog qoob, cawv txiv hmab tshiab thiab roj uas lawv pub raws li txoj kevcai rau cov Levis thiab cov hu nkauj thiab cov uas zov tej rooj loog, thiab tej uas pub rau cov pov thawj.

6 Thaum uas muaj tej xwm txheej no, kuv tsis nyob hauv Yeluxalees, rau qhov xyoo peb caug ob uas Athaxawxes ua vajntxwv hauv Npanpiloos, kuv mus cuag vajntxwv.  Nyob ntev loo, kuv li thov vajntxwv cia kuv rov los.

7 Kuv thiaj rov los rau hauv Yeluxalees mas kuv mam paub tej kev phem uas Eliyasis tau ua pab Thaunpiyah, yog qhov uas tu ib chav ntawm lub tshav puam (יחוח)Yahweh lub tuam tsev rau nws.

8 Kuv thiaj chim heev thiab kuv muab Thaunpiyah tej cuab txhiaj cuab tam rho hauv chav tsev ntawd laim pov tseg huvsi.

9 Thiab kuv hais kom ua kevcai ntxuav chav ntawd thiab kuv coj tej twj siv hauv (יחוח)Yahweh lub tuam tsev, thiab tej uas siv ua kevcai xyeem qoob loo thiab cov roj ntoos tsw qab rov los cia rau hauv tej qub chaw.

10 Thiab kuv kuj hnov tias cov Levis li feem mas lawv tsis muab rau cov Levis. Vim li no cov Levis thiab cov hu nkauj uas ua haujlwm thiaj nyias tsiv mus rau hauv nyias tej teb lawm.

11 Kuv thiaj yws cov thawj thiab hais tias, ua cas muab (יחוח)Yahweh lub tuam tsev tso tseg?  Kuv thiaj qaws lawv rov los thiab tsa lawv rov ua lawv tes haujlwm dua.

12 Mas cov Yahdah sawvdaws coj ib feem kaum uas yog qoob, cawv txiv hmab tshiab thiab roj tuaj tso rau hauv tej txhab.

13 Thiab kuv tsa tibneeg saib xyuas tej txhab ntawd, yog pov thawj Selemiyah, xibhwb Xadaus thiab Pedayah uas yog ib tug Levis thiab tsa Xakaws tus tub Hanas uas yog Mathanyah tus xeeb ntxwv ua tus uas pab lawv, rau qhov suav hais tias, lawv yog cov uas tso siab tau. Lawv li haujlwm yog faib rau lawv cov kwvtij.

14 Au (יחוח)Yahweh, kuv Tus Tswv, thov koj nco txog kuv rau tej no thiab thov tsis txhob rhuav tej haujlwm zoo uas kuv tau ua rau kuv Tus Tswv (יחוח)Yahweh lub tuam tsev thiab tej uas ua pab txojkev uas ua koom tu (יחוח)Yahweh.

15 Thaum ntawd hauv Yahdah kuv pom tibneeg tsuam kua txiv hmab rau hnub Sabbath thiab sau tej niag pawg qoob rau nees luav thauj thiab thauj cawv txiv hmab, tej txiv hmab, txiv cev thiab txhua yam nra coj los rau hauv Yeluxalees rau hnub Sabbath.  Kuv thiaj li ntuas lawv rau hnub uas lawv muag zaub mov ntawd.

16 Thiab cov tibneeg Thailab uas nyob hauv lub nroog coj ntses thiab txhua yam los muag rau hnub Sabbath rau cov pejxeem Yahdah thiab hauv Yeluxalees.

17 Ces kuv thiaj hais nyhav rau cov uas ua hlob hauv Yahdah thiab hais rau lawv tias, nej ua phem abtsi li no, ua qias puas tsuas hnub

Sabbath?

18 Nej tej poj koob yawm txwv tsis tau ua li no lov? (יחוח)Yahweh tsis tau coj tej xwm txheej phem no huvsi los raug peb thiab lub nroog no lov, es nej tseem yuav coj txojkev npau taws heev dua li ntawd los raug cov Ixayees vim yog nej ua qias puas tsuas hnub Sabbath?

19 Hmo uas yuav txog hnub Sabbath thaum yuav tsaus ntuj, kuv hais kom kaw tej rooj loog tsis txhob qhib mus txog dhau hnub Sabbath tso, thiab kuv tsa kuv cov tub teg tub taws qee leej saib xyuas tej rooj loog thiaj txwv tsis kheev thauj ib yam nra abtsi los rau hauv rau hnub Sabbath.  

20 Mas cov tub luam thiab cov uas coj txhua yam tuaj muag thiaj pw ib hmo sab nraum lub nroog Yeluxalees ib ob zaug.

21 Kuv ntuas lawv thiab hais rau lawv tias, ua cas nej tuaj pw sab nraum lub ntsa loog? Yog nej tseem tuaj dua thiab, kuv yuav ntes nej.  Txij thaum ntawd los lawv tsis tuaj rau hnub Sabbath dua li lawm.  

22 Thiab kuv hais kom cov Levis tu lawv tus kheej kom dawb huv thiab tuaj zov tej rooj loog, thiaj li ua tau kom hnub Sabbath dawb huv.  Au (יחוח)Yahweh, kuv Tus Tswv, thov koj nco txog kuv rau tej no thiab thov koj tseg kuv txojsia cia raws li koj txojkev hlub loj kawg uas ruaj khov.  

23 Thaum ntawd kuv kuj pom cov Yahdah uas yuav cov tibneeg Asadaus, Asmoos thiab Mau‑as tej ntxhais ua pojniam,

24 thiab lawv tej menyuam ib nrab hais lus Asadaus, lawv hais tsis tau lus Yahdah, tsuas yog nyias hais nyias yam lus xwb.

25 Kuv thiaj cem lawv thiab foom lawv thiab ntaus lawv qee leej thiab dob lawv plaubhau pov tseg, thiab kuv kom lawv tuav (יחוח)Yahweh lub npe cog lus twv. Kuv hais tias, nej tsis txhob muab nej tej ntxhais qua rau lawv tej tub, thiab tsis txhob yuav lawv tej ntxhais rau nej tej tub lossis nej tus kheej.

26 Cov Ixayees tus vajntxwv Xalaumoos tsis tau ua txhaum rau qhov uas nws yuav pojniam li no lov?  Hauv ib tsoom tebchaws tsis muaj ib tug vajntxwv twg zoo cuag li nws thiab (יחוח)Yahweh, uas yog nws Tus Tswv kuj hlub nws, ()Yahweh pub nws ua vajntxwv kav cov Ixayees huvsi. Txawm li ntawd los tej pojniam uas yog lwm haiv neeg tseem ua rau nws ua txhaum.  

27 Tseem tsim nyog peb yuav mloog nej thiab ua tej kev phem loj no huvsi thiab ntxeev siab rau (יחוח)Yahweh, es mus yuav lwm haiv neeg tej ntxhais los ua pojniam lov?

28 Tus tuam pov thawj hlob Eliyasis tus tub Yahyadas muaj ib tug tub uas ua Xanpalas uas yog tibneeg Hauloos tus vauv, vim li no kuv thiaj muab nws ntiab khiav ntawm kuv mus.

29 Au (יחוח)Yahweh, kuv Tus Tswv, thov koj nco txog lawv, rau qhov lawv tau ua qias puas tsuas qhov uas ua pov thawj thiab ua qias puas tsuas tej lus uas koj cog tseg rau cov pov thawj thiab cov Levis.

30 Kuv thiaj muab txhua yam uas yog lwm haiv neeg li, ntxuav ntawm lawv mus li no. Thiab kuv tu haujlwm rau cov pov thawj thiab cov Levis, nyias ua nyias feem.

31 Thiab kuv teem kom coj taws tuaj pub raws li sijhawm uas teem cia lawd thiab coj thawj phaum qoob loo tuaj.  Au (יחוח)Yahweh, kuv Tus Tswv, thov nco txog kuv thiab hlub kuv.