Hamas Raug Dai Caj Pas

1 Vajntxwv thiab Hamas txawm mus nrog poj vajntxwv Hadassah noj pluas mov.

2 Hnub uas ob, thaum lawv tab tom haus cawv txiv hmab, vajntxwv rov hais rau Hadassah tias, poj vajntxwv Hadassah, koj tej lus taij yog abtsi? Kuv yuav pub rau koj. Thiab koj tej lus thov yog abtsi? Txawm yog yuav kuv lub tebchaws ib nrab los kuj tau.

3 Ces poj vajntxwv Hadassah thiaj teb tias, Au vajntxwv, yog kuv txaus koj lub siab thiab yog koj pom zoo, ces thov pub kuv thiab kuv haiv neeg muaj txojsia nyob raws li kuv tej lus thov.

4 Rau qhov kuv thiab kuv haiv neeg twb raug muab muag ua kom puam tsuaj, raug muab tua thiab raug muab ntxuav kom tu noob nrho lawm. Yog peb tsuas raug muab muag ua tub qhe, nkauj qhe xwb, kuv thev taus cia ua twjywm, vim tej kev txom nyem ntawd tsis txaus ua rau koj nyuaj siab.

5 Vajntxwv Xawxes hais rau poj vajntxwv Hadassah tias, tus ntawd yog leejtwg thiab nyob qhovtwg es yuav muaj cuab kav ua tau li ntawd?

6 Mas Hadassah hais tias, tus tshawj chim thiab tus yeeb ncuab ntawd yog tus Hamas phem no ntag.  Hamas kuj ntshai kawg ntawm vajntxwv thiab poj vajntxwv xubntiag.

7 Vajntxwv txawm sawv tsees ntawm rooj mov mus ua npau taws vog rau hauv lub vaj ntawm vajntxwv lub tsev, tiamsis Hamas tseem nyob thov nws txojsia ntawm poj vajntxwv Hadassah, rau qhov nws pom tias vajntxwv npaj tseg ua phem rau nws lawm.

8 Thaum vajntxwv rov hauv lub vaj los rau hauv chav uas lawv haus cawv txiv hmab ntawd, Hamas tab tom pe khwb rwg ntxi saum lub rooj uas Hadassah zaum.  Vajntxwv thiaj hais tias, nws tseem yuav yuam poj vajntxwv tab meeg kuv hauv kuv lub tsev thiab lov?

Thaum vajntxwv lo lus tu nrho ntawm nws qhov ncauj, lawv txawm muab ntaub kauv kiag Hamas lub ntsej muag.

9 Hanpaunas uas yog ib tug nraug sam tu vajntxwv, txawm hais tias, tus ncej siab tsib caug tshim uas Hamas npaj cia dai Maudekhais caj pas tseem nyob hauv Hamas tsev, Maudekhais yog tus uas qhia kom cawm vajntxwv txojsia.  

10 Vajntxwv txawm hais tias, cia li muab Hamas dai rau saum tus ncej ntawd. Lawv thiaj muab Hamas dai rau saum tus ncej uas nws npaj cia dai Maudekhais. Ces vajntxwv txojkev npau taws thiaj li nqeg lawm.