Tso Cai Rau Cov Yahdais Tawm Tsam

1 Hnub ntawd vajntxwv Xawxes muab kiag Hamas uas yog cov Yahdais tus yeeb ncuab lub tsev rau poj vajntxwv Hadassah. Maudekhais thiaj mus cuag tau vajntxwv, vim yog Hadassah qhia tias Maudekhais txheeb ze nws li cas.

2 Mas vajntxwv hle nws lub nplhaib txam txwm uas nws muab ntawm Hamas los cob rau Maudekhais.  Hadassah kuj tsa Maudekhais ua tus uas kav kiag Hamas lub vaj tse.

3 Thiab Hadassah hais dua rau vajntxwv.  Nws khwb nkaus rau ntawm vajntxwv kotaw thiab thov vajntxwv ua kua muag nrog tawv to thov kom muab Hamas uas yog tibneeg Akas tej tswvyim phem uas txov cov Yahdais rhuav pov tseg.

4 Vajntxwv txawm cev nws tus cwj kub rau Hadassah,

5 Hadassah thiaj sawv tsees los sawv ntsug rau ntawm vajntxwv xubntiag. Nws hais tias, vajntxwv, yog txaus koj siab thiab koj hlub kuv, thiab yog tias koj pom zoo thiab yog kuv txaus koj lub siab, mas thov koj sau ib tsab ntawv tso cai mus rhuav tej lus hauv tsab ntawv uas Hamedathas tus tub Hamas uas yog tibneeg Akas tau xav phem es sau mus txov cov Yahdais uas nyob hauv vajntxwv txhua lub xeev.

6 Kuv yuav ua li cas nyiaj taus saib txojkev puam tsuaj uas yuav los raug kuv haiv neeg? Kuv yuav ua li cas nyiaj taus saib qhov uas kuv cov kwvtij raug kev liamsim?

7 Ces vajntxwv Xawxes txawm hais rau poj vajntxwv Hadassah thiab Maudekhais uas yog tibneeg Yahdais tias, saib maj, kuv twb muab Hamas lub vaj tse rau Hadassah lawm thiab lawv twb muab nws dai caj pas rau saum tus ncej lawm, vim yog qhov uas nws yuav txov cov Yahdais.

8 Koj cia li sau dua ib tsab ntawv ua kuv lub npe ntsig txog cov Yahdais raws li koj pom zoo thiab muab vajntxwv lub nplhaib txam txwm ntaus cim rau, vim tias tsab kevcai uas sau ua kuv lub npe thiab muab lub nplhaib txam txwm ntaus rau lawm mas thim tsis tau.

9 Ces thaum ntawd vajntxwv txawm hu cov tub sau ntawv tuaj, yog hnub tim nees nkaum peb, lub peb hlis uas yog lub hli Xivas. Mas lawv sau ib tsab kevcai raws li txhua yam uas Maudekhais hais txog cov Yahdais, xa mus rau cov uas kav tebchaws thiab rau cov thawj thiab cov uas kav txhua lub xeev, txij ntua Idias tebchaws mus txog Ithi-aupiam tebchaws, huvsi ib puas nees nkaum xya lub xeev, ua txhua lub xeev li npe ntawv thiab txhua haiv neeg li lus, thiab xa mus rau cov Yahdais ua lawv li npe ntawv thiab lawv li lus.

10 Lawv sau ua vajntxwv Xawxes lub npe thiab muab vajntxwv lub nplhaib txam txwm ntaus cim rau, thiab muab rau cov tub xa xov uas caij nees nrawm, yog cov nees uas siv ua vajntxwv tej haujlwm thiab yug rau hauv vajntxwv lub nkuaj nees.

11 Cov lus hauv tsab ntawv no vajntxwv tso cai kom cov Yahdais uas nyob hauv txhua lub moos tuaj txoos ua ke tiv thaiv tsom kwm lawv txojsia cia, thiab yog pab tub rog twg hauv haiv neeg twg thiab hauv lub xeev twg tuaj ntaus lawv thiab lawv tej pojniam menyuam mas lawv cia li ua kom puam tsuaj thiab tua thiab rhuav tshem, thiab tso cai kom mus lws cov uas tuaj ntaus lawv cuab txhiaj cuab tam.

12 Tib hnub ntawd ua kom thoob plaws vajntxwv Xawxes txhua lub xeev, yog hnub xiab kaum peb, lub kaum ob hlis uas yog lub hli Adas.

13 Tsab ntawv uas sau ntawd yuav muab xa mus ua kevcai rau hauv txhua lub xeev thiab muab tshaj tawm rau txhua haiv neeg paub. Cov Yahdais yuav tau npaj txhij rau hnub ntawd ua pauj rau lawv cov yeeb ncuab.

14 Cov tub xa xov txawm caij tej nees nrawm uas siv ua vajntxwv li haujlwm maj nroos khiav tawm mus raws li vajntxwv txhib, thiab tsab kevcai ntawd kuj muab tshaj tawm hauv lub nroog Xuxas thiab.

15 Ces Maudekhais tawm ntawm vajntxwv lub xubntiag mus hnav tsoos tsho vajntxwv xiav thiab dawb, thiab ntoo mom kub loj thiab hnav lub tsho ntev ntaub mag tsamxem zoo heev, mas cov tibneeg hauv lub nroog Xuxas kuj qw zoo siab xyiv fab.

16 Cov Yahdais nyob kaj siab lug muaj kev zoo siab, kev xyiv fab thiab muaj koob meej.

17 Hauv txhua lub xeev thiab hauv txhua lub moos, tsis hais qhov twg uas vajntxwv tsab kevcai mus txog muaj kev zoo siab, kev xyiv fab rau hauv cov Yahdais, muaj kev npaj noj haus zoo siab xyiv fab. Muaj lwm haiv neeg coob coob hauv lub tebchaws lees hais tias, lawv yog tibneeg Yahdais vim yog lawv ntshai cov Yahdais.