Cov Yahdais Rhuav Tshem Lawv Cov Yeeb Ncuab

1 Lub kaum ob hlis uas yog lub hli Adas, hnub xiab kaum peb, lub hli ntawd, thaum lawv yuav ua raws li vajntxwv tej lus cob qhia thiab tsab kevcai ntawd, hnub ntawd ntag, Yahdais cov yeeb ncuab vam tias lawv yuav kov yeej, tiamsis ho raug muab hloov ua hnub uas cov Yahdais kov yeej lawv cov tshawj chim.

2 Cov Yahdais thiaj tuaj txoos ua ke rau hauv lawv tej moos thoob plaws vajntxwv Xawxes txhua lub xeev xwv thiaj tua tau cov uas nrhiav kev txov lawv. Tsis muaj ib tug tiv tua tau lawv, rau qhov txhua haiv neeg ntshai lawv heev.

3 Cov thawj hauv tej xeev sawvdaws, yog cov uas kav tebchaws thiab cov uas kav tej xeev thiab vajntxwv cov tub teg tub taws kuj pab cov Yahdais, rau qhov lawv ntshai Maudekhais heev.

4 Maudekhais tau ua loj rau hauv vajntxwv lub tsev, thiab nws lub koob meej nrov nto moo mus thoob plaws txhua lub xeev, rau qhov tus yawg Maudekhais ntawd muaj hwjchim loj zuj zus.

5 Cov Yahdais thiaj xuas ntaj tua yeej lawv cov yeeb ncuab sawvdaws thiab ua kom puam tsuaj thiab ua raws li lawv lub siab rau cov uas ntxub lawv.

6 Hauv lub nroog Xuxas, cov Yahdais tua thiab ua kom puam tsuaj tsib puas leej,

7 thiab tua tau Pasadathas, Dafoos, Apathas,

8 Paulathas, Adalias, Alidathas,

9 Pamathas, Alixais, Alidais, thiab Vaixathas.

10 Kaum leej no yog Hamedathas tus tub Hamas uas ua cov Yahdais tus yeeb ncuab cov tub, tiamsis lawv tsis lws tej qhov txhia chaw.

11 Hnub ntawd muaj tibneeg qhia tias pes tsawg leej raug tua tuag hauv lub nroog Xuxas rau vajntxwv paub.

12 Vajntxwv hais rau poj vajntxwv Hadassah tias, hauv lub nroog Xuxas, cov Yahdais twb tua tsib puas leej thiab tua Hamas kaum leej tub. Dua li vajntxwv lwm lub xeev xyov lawv ua li cas lawm. Nimno koj tseem muaj tej lus taij thov abtsi? Kuv yuav pub rau koj. Koj tej lus thov ntxiv muaj abtsi? Kuv yuav ua kom tiav.

13 Hadassah hais tias, yog txaus koj lub siab, thov cia cov Yahdais uas nyob hauv lub nroog Xuxas ua ib yam li tsab kevcai uas ua hnub no rau tagkis ib hnub thiab.  Thiab thov muab Hamas kaum leej tub dai rau saum tus ncej dai caj pas.

14 Vajntxwv kuj hais kom ua li ntawd.  Muab kevcai tshaj tawm rau hauv Xuxas thiab Hamas kaum leej tub raug muab dai rau saum tus ncej dai caj pas.

15 Cov Yahdais uas nyob hauv Xuxas tuaj txoos ua ke rau hnub xiab kaum plaub, lub hli Adas thiab tua cov tibneeg hauv Xuxas peb puas leej, tiamsis lawv tsis lws tej qhov txhia chaw.

​

Ua Kevcai Phulees

16 Cov Yahdais uas nyob hauv vajntxwv lwm lub xeev kuj tuaj txoos ua ke tiv thaiv lawv txojsia thiab dim ntawm lawv cov yeeb ncuab.  Lawv tua cov uas ntxub lawv tuag xya vam tsib txeeb leej tiamsis lawv tsis lws tej qhov txhia chaw.

17 Tej no muaj tshwm rau hnub xiab kaum peb, lub hli Adas, hnub xiab kaum plaub, lawv so thiab muab ua hnub noj haus zoo siab xyiv fab.

18 Mas cov Yahdais uas nyob hauv lub nroog Xuxas tuaj txoos ua ke rau hnub xiab kaum peb thiab kaum plaub, thiab so rau hnub xiab kaum tsib, thiab muab ua hnub uas noj haus zoo siab xyiv fab.

19 Vim li no cov Yahdais uas nyob hauv tej zej zog thiab lwm lub moos thiaj caiv hnub xiab kaum plaub, lub hli Adas, ua hnub uas noj haus zoo siab xyiv fab thiab ua hnub koob tsheej uas ib leeg pub tshav ntuj rau ib leeg.

20 Maudekhais sau tej no cia thiab xa ntawv mus rau cov Yahdais sawvdaws uas nyob thoob plaws vajntxwv Xawxes txhua lub xeev tsis hais ze los deb,

21 hais kom lawv caiv hnub xiab kaum plaub thiab kaum tsib, lub hli Adas, rau txhua xyoo mus li,

22 ua hnub uas cov Yahdais dim lawv cov yeeb ncuab thiab ua lub hli uas muab kev txhawj xeeb ntxeev ua kev zoo siab thiab muab kev quaj ntsuag ntxeev ua kev luag zoo siab, thiab kom lawv muab ua hnub uas noj haus zoo siab xyiv fab thiab ua hnub uas ib leeg pub tshav ntuj rau ib leeg thiab pub tshav ntuj rau tej pluag.

23 Cov Yahdais thiaj hais haum ua raws li uas lawv pib ua los lawd thiab ua raws li Maudekhais sau mus rau lawv.

24 Hamedathas tus tub Hamas uas yog tibneeg Akas, ua yeeb ncuab rau cov Yahdais sawvdaws, tau ntaus tswvyim phem thiab khov kuam Phus (lub npe uas siv khov kuam) ua rau lawv liamsim puam tsuaj tag.

25 Tiamsis thaum Hadassah mus cuag vajntxwv, vajntxwv thiaj sau ntawv hais kom tej tswvyim phem uas Hamas npaj ua rau cov Yahdais rov los poob rau saum Hamas lub taubhau, thiab cia nws thiab nws cov tub raug muab dai rau saum tus ncej dai caj pas.

26 Vim li ntawd thiaj hu ob peb hnub ntawd hu ua Phulees, raws li lo lus khov kuam Phus. Vim yog txhua yam uas sau rau tsab ntawv no thiab txhua yam uas cov Yahdais raug no thiab txhua yam uas tshwm los rau lawv,

27 cov Yahdais thiaj teem tseg tias, lawv thiab lawv caj ces thiab cov uas nrog lawv koom yuav tau caiv ob hnub no raws li uas sau cia thiab raws li sijhawm uas teem rau txhua xyoo mus tsis tu ncua li.  

28 Thiab txhua yim hauv txhua lub xeev thiab hauv txhua lub moos yuav nco ntsoov ob hnub no thiab caiv mus tag txhua txhia tiam, mas cov Yahdais yuav ua hnub kevcai Phulees tsis txhob tso tseg li thiab lawv tej caj ces yuav tau pheej nco ntsoov ob hnub no.  

29 Mas poj vajntxwv Hadassah uas yog Anpiha‑is tus ntxhais, thiab Maudekhais uas yog tibneeg Yahdais, sau dua ib tsab ntawv yom ceev tsab ntawv uas ob uas hais txog kevcai Phulees no.

30 Thiab xa tsab ntawv ntawd mus rau cov Yahdais sawvdaws uas nyob thoob plaws ib puas nees nkaum xya lub xeev uas vajntxwv Xawxes kav foom hmoov kom noj qab nyob zoo,

31 thiab hais kom ua hnub kevcai Phulees raws li sijhawm uas teem cia raws li Maudekhais uas yog tibneeg Yahdais thiab poj vajntxwv Hadassah tau nkaw lus rau cov Yahdais, ib yam li lawv twb teem cia rau lawv tus kheej thiab lawv caj ces rau thaum lawv yoo mov thiab thaum lawv quaj ntsuag.

32 Poj vajntxwv Hadassah tsa tej kevcai ua Phulees no thiab muab sau cia rau hauv ntawv.