1 Vim tias txoj kevcai yog yam tsim txiaj uas yuav los tom qab tus duab xwb, tsis yog tus tseem, mas txoj kevcai uas hais kom niaj xyoo muab tsiaj xyeem li qub tsis tu ncua, ua tsis tau rau cov uas los cuag Abba (יחוח)Yahweh  ua tibneeg zoo kawg nkaus. 2 Yog ua tau, ces lawv kuj tseg tsis muab tsiaj xyeem los tsis yog? Yog tus uas pe hawm Abba (יחוח)Yahweh  raug muab ntxuav kom dawb huv ib zaug lawm, lawv kuj yuav tsis xav tias tseem muaj lub txim ntxiv mus. 3 Tiamsis qhov uas xyeem tsiaj ntawd, qhia kom niaj xyoo nco txog lub txim. 4 Rau qhov ntshav txiv nyuj, ntshav tshis ris tsis tau lub txim mus kiag li.

5 Vim li no, thaum (יהושע)Yahshua Messiah los rau hauv lub ntiajteb lawd, nws hais tias, koj tsis xav yuav tej tsiaj thiab tej qhov txhia chaw uas muab xyeem, tiamsis koj npaj lub cev rau kuv. (Ntawv Nkauj 40:7-9)

6 Qhov uas tua tsiaj hlawv xyeem thiab xyeem daws txim, koj tsis txaus siab.

7 Kuv hais tias, Au Abba (יחוח)Yahweh , kuv tuaj lawm, yuav ua raws li koj lub siab nyiam, raws li uas sau txog kuv rau hauv thooj ntawv.

8 Nws xub hais tias, tej tsiaj uas tua xyeem, thiab tej qhov txhia chaw uas muab xyeem, thiab tej uas hlawv xyeem, thiab tej uas xyeem daws txim, koj tsis xav yuav thiab koj tsis txaus siab rau, tej no yog tej uas muab xyeem raws li txoj kevcai xwb. 9 Thiab nws hais tias, kuv tuaj lawm, yuav ua raws li koj lub siab nyiam. Nws thiaj rhuav txoj qub kev ntawd lawm, kom thiaj rhawv tau txoj tshiab.

10 Vim (יהושע)Yahshua ua raws li Abba (יחוח)Yahweh  lub siab nyiam, peb thiaj raug muab cais ua tibneeg dawb huv, vim qhov uas muab (יהושע)Yahshua Messiah lub cev xyeem tib zaug xwb, kuj txaus lawm. 11 Txhua tus pov thawj, kuj niaj hnub sawv ntsug ua nws tes haujlwm, thiab coj tib yam qub tuaj xyeem tsis tu ncua li, tej ntawd yeej ris tsis tau lub txim mus kiag li.

12 Tiamsis thaum (יהושע)Yahshua Messiah xyeem tib zaug xwb, daws tau mus ib txhis, nws zaum ntawm Abba (יחוח)Yahweh  sab tes xis, 13 tos txog thaum nws cov yeeb ncuab raug muab los ua chaw tiag nws xib taws.

14 Qhov uas muab nws xyeem tib zaug xwb, (יהושע)Yahshua kuj ua rau cov uas, tabtom muab cais ua dawb huv, ua tau tibneeg zoo kawg nkaus mus ib txhis.

15 Tus Ntsuj Plig Dawbhuv, kuj ua timkhawv rau peb. Nws xub hais tias, 16 No yog tej lus cog tseg uas kuv yuav cog rau lawv tom qab ncua sijhawm ntawd. Abba (יחוח)Yahweh  hais li no ntag. Kuv yuav muab kuv txoj kevcai tso rau hauv lawv thiab sau cia rau hauv lawv lub siab. (Yeremyah 31:33-34) 17 Thiab nws hais tias, kuv yuav tsis cim ntsoov lawv lub txim thiab lawv tej kev txhaum dua li lawm. 18 Thaum muaj kev zam txim lawm, kuj tsis txog muaj kev xyeem daws txim dua li lawm.

Tej Lus Ntuas

19 Vim li no, cov kwvtij, vim muaj (יהושע)Yahshua cov ntshav, peb thiaj muaj cuabkav nkag mus rau hauv lub chaw Dawb Huv Kawg Nkaus. 20 Yog taug txojkev tshiab thiab txojkev muaj txojsia uas nws qheb rau peb hla daim ntaub mus, vim muaj nws lub cev. 21 Thiab vim peb muaj ib tug pov thawj loj, kav Abba (יחוח)Yahweh  tsev neeg lawm. 22 peb cia li ua lub siab dawb paug nkag mus ze thiab muaj lub siab ntseeg ruaj, muaj lub siab uas raug muab ntshav nchos kom tsis muaj ib qho phem kiag li, thiab muaj lub cev uas raus dej ntshiab ntxuav kom dawb huv.

23 Peb cia li tuav txojkev vam uas peb lees yuav ntawd, ruaj tsis txhob ywj fab ywj fwj, vim tus uas cog lus tseg ntawd, tso siab tau.

24 Peb cia li ua tib zoo saib, yuav ua li cas, ib leeg thiaj txhawb tau ib leeg lub zog kom sib hlub thiab ua tau haujlwm zoo. 25 Thiab tsis txhob tseg qhov uas tuaj txoos ua ke, yam li qee leej txeev tseg. Tiamsis ib leeg yuav tsum txhawb ib leeg lub siab, thiab yimhuab yuav tsum ua tej no, vim nej paub tias hnub uas teem cia los ze lawm. 26 Thaum peb twb paub txojkev tseeb lawm, yog peb tseem txhob txwm ua txhaum, kuj tsis muaj ib yam abtsi uas muab xyeem daws tau peb lub txim dua li lawm. 27 Tsuas muaj uas yuav tos txojkev teem txim, uas ntshai rwg thiab hluavtaws uas cig hlob heev, uas yuav kub cov uas tawm tsam Abba (יחוח)Yahweh . 28 Tus uas tso Mauxes txoj kevcai tseg, yog muaj ob leeg lossis peb leeg ua timkhawv lawm, tus ntawd yuav raug muab tua tuag tsis khuvleej li. 29 Nej sim xav saib, tus uas tsuj Abba (יחוח)Yahweh  tus tub thiab ua qias puas tsuas cov ntshav uas cog lus tseg, uas muab nws cais ua dawb huv lawm, thiab saib tsis taus Tus Ntsuj Plig Dawbhuv, uas pub txojkev hlub mas tsim nyog tus ntawd yuav raug txim hnyav heev tshaj npaum li cas? 30 Rau qhov peb paub Abba (יחוח)Yahweh  tus uas hais tias, Qhov uas ua pauj yog kuv li feem, thiab kuv yuav pauj rau. Thiab hais dua tias, Abba (יחוח)Yahweh  yuav txiav txim rau nws haiv neeg. (Kevcai 32:35-36)

31 Qhov uas poob rau hauv Abb (יחוח)Yahweh  uas muaj txojsia nyob txhais tes, yog qhov uas txaus ntshai kawg.

32 Tiamsis nej cia li nco txog yav nram ntej, uas nej tau txais txojkev kaj lawm, nej tau tiv thev tej kev txom nyem loj kawg. 33 Qee zaum, nej raug thuam thiab raug tsim txom tab meeg sawvdaws, thiab qee zaum, nej kuj nrog cov uas raug tsim txom li ntawd koom ua ke. 34 Rau qhov nej kuj mob siab cov uas raug kaw, thiab thaum luag lws nej tej cuab txhiaj cuab tam coj mus, nej kuj zoo siab hlo, vim nej paub tias nej muaj cuab txhiaj cuab tam uas zoo tshaj li tej ntawd, thiab yuav nyob mus li. 35 Vim li no, tsis txhob muab nej lub siab loj uas yuav coj nqe zog ntau heev los rau nej tso tseg. 36 Vim nej yuav tsum muaj lub siab thev taus kom nej thiaj ua tau raws li Abba (יחוח)Yahweh  lub siab, thiab nej thiaj tau tej uas cog lus cia lawd. 37 Tshuav tsis ntev, tus uas yuav los yeej yuav los, nws yuav tsis tos ntev. 38 Tiamsis tus uas kuv suav tias ncaj ncees, yuav muaj txojsia nyob, vim nws ntseeg Abba (יחוח)Yahweh . Yog nws thim rov qab, kuv yuav tsis txaus siab rau nws. (Habakkuk 2:3-4) 39 Tiamsis peb tsis yog cov uas thim rov qab, thiab raug kev puam tsuaj. Peb yog cov uas ntseeg thiaj tuav tau peb txojsia.

​