Cem Qhov Uas Ixayees Pe Dab Mlom

1 Cia li muab raj kub yaj los npuav ntawm koj qhov ncauj. Ib tug dav noj twm tabtom ya saum (יחוח)Yahweh lub tsev, vim cov tibneeg tau rhuav kuv tej lus cog tseg thiab fav xeeb rau kuv txoj kevcai lawm.

2 Cov Ixayees quaj thov kuv hais tias, (יחוח)Yahweh es, peb cov Ixayees lees paub koj.

3 Cov Ixayees muab txojkev zoo tso tseg lawm, yeeb ncuab thiaj raws caum lawv.

4 Lawv tsa muaj vajntxwv tiamsis tsis yog kuv qhia lawv ua li ntawd. Lawv tsa cov thawj, los kuv tsis paub kiag li. Lawv xuas lawv tej nyiaj tej kub ua tej dab mlom ua rau lawv raug kev puam tsuaj.

5 Cov Xamalis es, nej tus dab mlom thav nyuj kuv tsis yuav kiag li. Kuv txojkev npau taws tshwm los rau lawv. Yuav ntev li cas lawv li dawb huv tau?

6 Tus dab mlom ntawd ib tug Kws nchuav los rau hauv Ixayees xwb, tus dab mlom ntawd yeej tsis yog (יחוח)Yahweh. Xamalis tus thav nyuj yuav raug muab tsoo ua tej dwb daim.

7 Lawv tseb cua, lawv yuav tau sau khaub zeeg cua. Tej mog uas tseem nyob hauv teb tsis puv, yuav tsis tau coj los ua hmoov kiag li. Txawm yog tau hmoov, los lwm haiv neeg yuav coj mus noj.

8 Cov Ixayees raug luag noj tag lawm, lawv nyob hauv nruab nrab ib tsoom tebchaws zoo yam li tej twj taig uas tsis muaj qabhau kiag li.

9 Lawv mus cuag Axilias yam li tus nees luav qus mus yos ua twm xwb, Efa-is mus ntiav tibneeg tuaj nyiam nws.

10 Txawm yog lawv ntiav lwm haiv neeg tuaj lawv tog, los nimno kuv yuav sau zog lawv ua ke. Tshuav tsis ntev lawv yuav raug mob da pes luam vim raug tej vajntxwv thiab cov thawj tsuj yuam.

11 Efa-is ua thaj ntau zuj zus los daws txim, los tej thaj ntawd kuj ntxeev ua lub txim rov rau nws.

12 Txawm yog kuv sau kuv tej kevcai qas vam txoj, los lawv yuav suav tias yog tej nyuag yam txawv txawv xwb.

13 Lawv tua tsiaj xyeem rau kuv thiab lawv noj tej nqaij ntawd, los (יחוח)Yahweh yeej tsis zoo siab rau lawv. Nimno nws cim ntsoov txog lawv tej kev txhaum thiab txiav txim rau lawv, lawv yuav rov qab mus rau Iziv tebchaws.

14 Ixayees tsis nco qab tus uas tsim lawv lawm, thiab ua tej tsev vajntxwv. Yahdah kuj ua tej moos uas muaj ntsa loog tsav ntxiv. Kuv yuav tso hluavtaws los raug lawv tej moos thiab kub lawv tej chaw ruaj khov.