Kev Thaj Yeeb

1 No yog tej uas (יחוח)Yahweh qhia rau Isayah uas yog Amoj tus tub pom txog Yahdah thiab lub nroog Yeluxalees. 2 Yav tom hauv ntej yuav muaj li no, lub roob uas muaj (יחוח)Yahweh lub tuam tsev, yuav raug muab tsa ua lub roob uas siab tshaj plaws thiab yuav raug txhawb nqa siab dua tej pov roob, thiab txhua lub tebchaws yuav sau nthwv tuaj rau saum lub roob ntawd.

3 Ntau haiv neeg yuav tuaj hais tias, cia li los, cia peb nce mus saum (יחוח)Yahweh lub roob, mus rau hauv Yakhauj Tus Tswv lub tuam tsev, mas nws yuav qhia nws txojkev rau peb kom peb thiaj taug tau nws txojkev.  

Rau qhov txoj kevcai yuav tawm hauv Xi‑oo tuaj thiab (יחוח)Yahweh txojlus yuav tawm hauv Yeluxalees tuaj. 4 Nws yuav phua cai rau txhua lub tebchaws, thiab nws yuav tu plaub rau ntau haiv neeg kom sib haum‎. Lawv yuav muab lawv tej ntaj riam ntaus ua khais laij teb, thiab muab lawv tej hmuv ntaus ua liag. Ib lub tebchaws yuav tsis rho ntaj ua tsov ua rog rau ib lub tebchaws, lawv yuav tsis kawm txujci ua tsov ua rog dua li lawm. 5 Yakhauj caj ces es, cia li los, cia peb taug (יחוח)Yahweh txojkev kaj.

​

(יחוח)Yahweh Teem Txim Rau Cov Uas Khav Theeb

6 (יחוח)Yahweh, koj tau tso koj haiv neeg tseg, yog Yakhauj caj ces, rau qhov lawv ua neeb saib yaig puv nkaus tebchaws raws li cov tibneeg uas nyob sab hnub tuaj, thiab lawv saib sij saib nyoog ib yam li cov tibneeg Filixatee‎s, thiab nrog lwm haiv neeg cog lus sib raug zoo. 7 Lawv lub tebchaws muaj nyiaj muaj kub puv nkaus, thiab lawv tej nyiaj txiag tsis txawj tag li. Lawv lub tebchaws muaj nees puv nkaus, thiab lawv tej tsheb nees ua rog muaj ntau siv tsis tag.

8 Lawv lub tebchaws muaj dab mlom puv nkaus, lawv pe hawm tej uas lawv txhais tes ua thiab pe tej uas lawv ntiv tes ua. 9 Mas tibneeg thiaj raug txo hwj chim thiab poob qes kawg. Tsis txhob zam lawv lub txim.

10 Cia li nkag rau hauv tej qab zeb qab ca, thiab mus khiav nkaum rau tej qhov av, khiav kom dim (יחוח)Yahweh txojkev chim thiab khiav kom dhau (יחוח)Yahweh lub hwjchim meej mom uas ci ntsa iab. 11 Cov uas yoj cev yuj yees khav theeb yuav poob qes, thiab cov uas muab hlob yuav raug muab rhuav.

(יחוח)Yahweh tib leeg xwb thiaj raug qhuas ntxhias rau hnub ntawd.

12 (יחוח)Yahweh uas muaj hwjchim loj kawg nkaus teem ib hnub cia rau txhua yam uas khav theeb thiab muab hlob, thiab rau txhua yam uas tsab ua loj thiab tsa hau siab, 13 thiab rau txhua tsob ntoo ciab hauv Lenpanoos uas siab siab thiab tsa hau siab, thiab rau txhua tsob ntoo qheb hauv Npasas, 14 thiab rau txhua lub roob siab thiab txhua lub pov roob uas tsa hau siab, 15 thiab rau txhua lub chaw tsom faj uas nyob siab, thiab rau txhua lub ntsa loog uas txhim zeb khov kho,

16 thiab rau Thasis txhua lub nkoj txwg thiab rau txhua lub nkoj uas zoo nkauj. 17 Qhov uas tibneeg khav theeb yuav raug muab rhuav thiab qhov uas tibneeg muab hlob yuav raug txo qes. (יחוח)Yahweh tib leeg xwb thiaj raug qhuas ntxhias rau hnub ntawd. 18 Tej dab mlom yuav ploj ntais tsis muaj li lawm.

19 Thiab tibneeg yuav nkag qhov zeb qhov tsua thiab tej qhov av, kom dim (יחוח)Yahweh txojkev chim thiab dhau ntawm (יחוח)Yahweh lub hwjchim meej mom uas ci ntsa iab, rau thaum nws sawv tsees co lub ntiajteb ua zog kais.

20 Mas hnub ntawd tej tibneeg yuav muab tej dab mlom nyiaj dab mlom kub uas lawv ua rau lawv pe laim pov tseg rau nas kauv thiab puav. 21 Lawv yuav nkag rau hauv tej qhov tsua thiab nkag rau hauv tej kem zeb, kom dim (יחוח)Yahweh txojkev chim thiab dhau ntawm (יחוח)Yahweh lub hwjchim meej mom uas ci ntsa iab, rau thaum nws sawv tsees co lub ntiajteb ua zog kais. 22 Tsis txhob quav ntsej tej tibneeg. Lawv lub qhov ntswg ua pa ib vuag dua xwb. Lawv tsim txiaj tus abtsi?