Txiav Txim Rau Yeluxalees Thiab Yahdah

1 Saib maj, Tus Tswv uas yog (יחוח)Yahweh, tus muaj hwjchim loj kawg nkaus, tabtom tshem tus ncej thiab tus las uas txheem lub nroog Yeluxalees thiab Yahdah mus, yog nws tshem tus ncej uas yog tej mov noj tag nrho huvsi thiab tus ncej uas yog tej dej haus tag nrho huvsi, 2 thiab tus uas siab loj siab tuab thiab tus tub rog, tus uas tu plaub, thiab tus uas cev (יחוח)Yahweh lus, tus uas saib sij saib yaig, tus kev txwj laug, 3 tus thawj uas kav tsib caug leej thiab tus uas muaj meej mom, tus uas ua chaw sablaj, tus uas txawj ua yees siv, tus uas txawj ua khaws koob. 4 Kuv yuav tsa tej menyuam yaus ua lawv tus thawj, thiab tej menyuam mos yuav kav lawv. 5 Thiab tej pejxeem ib leeg yuav quab yuam ib leeg, txhua tus yuav quab yuam nws tus phoojywg, thiab txhua tus quab yuam nws kwvtij zej zog. Tej menyuam yuav tsis hwm tej poj koob yawm txwv, thiab tus tibneeg tsis tsim txiaj kuj tsis hwm tus uas muaj koob meej. 6 Yuav muaj ib tug mus tuav nkaus nws ib tug kwvtij hauv nws leej txiv lub tsev hais tias, koj muaj lub tsho ntev, ces koj yuav ua peb cov tus thawj, thiab koj yuav kav tej niag pawg thwv cib uas pob tag no. 7 Mas hnub ntawd nws yuav hais tias, kuv tsis yeem ua tus uas kho. Hauv kuv tsev kuj tsis muaj mov noj thiab tsis muaj tsho ntev. Koj tsis txhob tsa kuv ua tus uas coj tej pejxeem. 8 Yeluxalees kuj dawm thiab Yahdah kuj ntog, vim yog lawv tej lus thiab lawv tej haujlwm tawm tsam (יחוח)Yahweh, fav xeeb rau nws lub ntsej muag uas ci ntsa iab. 9 Qhov uas lawv tu plaub tsis ncaj rov ua timkhawv tom lawv, lawv piav lawv qhov txhaum ib yam li lub moos Xaudoos, lawv tsis npog li. Lawv yuav raug txim lauj, vim lawv coj tej xwm txheej phem los rau lawv tus kheej. 10 Cia li hais rau cov uas ncaj ncees tias lawv yuav nyob kaj siab lug, vim lawv yuav tau saws raws li lawv twb ua lawm. 11 Cov tibneeg limhiam yuav raug txom nyem lauj! Vij sub vij sw yuav poob rau saum lawv. Lawv txhais tes tau ua yam twg lawv yuav raug yam ntawd.

12 Kuv cov tibneeg mas tej menyuam yaus quab yuam lawv thiab cov pojniam kav lawv. Kuv haiv neeg es, nej cov thawj coj nej yuam kev, thiab ua rau nej tsis pom qab mus txoj twg. 13 (יחוח)Yahweh los tu plaub ntug, nws sawv tsees txiav txim rau tej tibneeg.

14 (יחוח)Yahweh txiav txim rau cov kev txwj laug thiab cov uas ua thawj hauv nws haiv neeg hais tias, nej yog cov uas tau noj lub vaj txiv hmab tag lawm, thiab tej qhov txhia chaw uas nej txeeb ntawm cov pluag los kuj nyob puv nkaus hauv nej tsev. 15 Qhov uas nej muab kuv haiv neeg tsuam kom txia roj thiab tsuj pes ntiag tej tibneeg pluag ntsej muag, nej ua abtsi li ntawd? (יחוח)Yahweh uas muaj hwj chim loj kawg nkaus hais li no ntag.

​

Txiav Txim Rau Cov Pojniam Hauv Yeluxalees

16 (יחוח)Yahweh hais tias, vim Xi‑oo cov ntxhais khav theeb mus kev tsa ntswg ncuv, ua qhov muag cu ciav tsis paub txaj muag, mus kev ua plhom moj ntsuav kauj ruam mos nyoos tswb nyiaj nrov ziag hauv kotaw, 17 (יחוח)Yahweh yuav ua kom Xi‑oo tej ntxhais taubhau ua kiav txhab qawj, thiab ua rau lawv plaubhau hle tag do hau cuas.

18 Hnub ntawd (יחוח)Yahweh yuav muab lawv tej tsoos ua zam sau mus, yog tooj taw, hlaws rig taubhau, xauv caj dab uas zoo li thaum lub hli xiab, 19 khawb nyiaj, tooj tes, pluaj ntaub rig caj dab, 20 phuam, tooj npab, siv sia, lub haum‎ roj tsw qab, thiab tej pov haum‎, 21 lub nplhaib txam txwm ntawm ntiv tes, thiab lub khawb qhov ntswg, 22 lub tsho tsuj tseeb, tsho ntev, daim ntaub kauv thiab hnab nyiaj, 23 cev tsoos tsho ntaub nyias, cev tsoos tsho ntaub mag, hauv phuam saum taubhau thiab ntaub kauv taubhau. 24 Tej roj tsw qab yuav tsis muaj, tsuas muaj tus ntxhiab tsw lwj xwb. Tsis muaj siv sia tsuas muaj hlua sia xwb, tsis muaj plaubhau los ntxias kom zoo nkauj tsuas muaj do hau cuas xwb, tsis muaj tsoos tsho zoo hnav tsuas muaj khaub seev tsaj hnav xwb, tsis muaj qhov zoo nkauj lawm, tsuas muaj poob ntsej muag xwb.

25 Nej cov txivneej yuav raug ntaj tuag tag, nej cov tub rog uas siab loj siab tuab yuav tuag tag hauv tshav rog. 26 Xi‑oo tej rooj loog yuav quaj ntsuag thiab quaj lwj siab ntsuav, Xi‑oo yuav nyob do cuas thiab zaum hauv av.