Tej Lus Uas Hais Txog Npanpiloos

1 Tej lus uas hais txog tebchaws moj sab qhua ntawm hiavtxwv. Zoo ib yam li khaub zeeg cua hauv Nekes ntsawj ya du lug mus, muaj ib tug tuaj hauv tebchaws moj sab qhua tuaj, thiab tuaj hauv lub tebchaws uas txaus ntshai kawg li. 2 Tej xwm txheej phem uas kuv ua yog toog pom hais tias, tus uas lws tabtom lws, tus uas ua kom puam tsuaj kuj tabtom ua. Elas es, cia li nce mus ntaus, Midias es, cia li mus vij lub nroog. Qhov uas Npanpiloos ua rau luag ntsaj laws kuv yuav ua kom ntsiag to tag nrho huvsi. 3 Vim li ntawd kuv lub duav thiaj mob heev kawg, kuv mob heev cuag nkaus li tej pojniam mob plab yug menyuam. Kuv tws kev nkaus vim tej uas kuv hnov, kuv poob siab nthav vim tej uas kuv pom. 4 Kuv siab ntsws fab tag, kuv ntshai ua ib ce hlauv hlo, kuv vam rau thaum tsaus ntuj, tiamsis qhov ntawd rov ua rau kuv ntshai tshee hnyo. 5 Lawv npaj rooj noj cia, lawv muab ntaub pua chaw nyob. Lawv noj, lawv haus. Nej cov thawj cia li sawv tsees, cia li ntaus roj rau daim tawv uas thaiv ua rog. 6 Vim yog (יחוח)Yahweh hais li no rau kuv tias, cia li mus tsa tus faj xwm kom nws tshaj tawm tej uas nws pom. 7 Thaum nws pom cov uas caij nees ua ib nkawg ib nkawg, cov uas caij nees luav thiab caij ntxhuav, mas kom nws ua tib zoo mloog, mloog zoo zoo li. 8 Tus faj xwm qw hais tias, Au Tus Tswv, kuv sawv saum lub chaw faj xwm tas hnub tas hmo, thiab kuv nyob rawv ntawm kuv lub chaw tag niaj tag hmo. 9 Saib maj, cov uas caij tuaj, yog cov uas caij nees ua ib nkawg ib nkawg. Thiab nws teb hais tias, Npanpiloos pob tag, pob tag lawm, lawv tej dab mlom huvsi tawg tag rau hauv pem teb. 10 Kuv haiv neeg uas txeev raug ntaus raug ntxuaj es, kuv tau hnov (יחוח)Yahweh tus muaj hwjchim loj kawg nkaus uas yog Ixayees Tus Tswv hais li cas lawm, kuv kuj piav qhia li ntawd rau nej. Tej lus uas hais txog Dumas. 11 Tej lus uas hais txog Dumas. Muaj ib tug hu ntawm Xe‑is rau kuv tias, tus faj xwm, tsaus ntuj ntev li cas lawm? Tshuav ntev li cas li kaj ntug? 12 Tus faj xwm hais tias, twb yuav kaj ntug, tiamsis yuav rov tsaus ntuj thiab. Yog koj xav nug dua kuj nug tau, koj rov tuaj dua. Tej lus uas hais txog Alanpias.

13 Tej lus uas hais txog Alanpias. Cov tibneeg Dedas uas ua ke mus ua luam tsheej pab es, nej yuav tsuam chaw so hauv Alanpias tej moj sab qhua. 14 Nej cov uas nyob hauv Themas tebchaws es, cia li muab dej rau tus uas nqhis haus, cia li muab mov rau tus uas khiav tuaj cawm siav noj.

15 Vim yog lawv khiav hniav ntaj tuaj, thiab khiav rab ntaj uas rho hlo thiab rab hneev uas nta lawm tuaj, thiab khiav ntawm tej tshav rog uas tawm tsam heev tuaj.

16 Yog vim (יחוח)Yahweh hais li no rau kuv tias, Ib xyoos xwb mas Khedas lub meej mom huvsi yuav ploj tag, raws li uas ntiav tub zog ib xyoos xwb.

17 Cov tibneeg Khedas cov tub rog uas siab loj siab tuab thiab txawj tua hneev yuav tshuav tsawg, rau qhov (יחוח)Yahweh uas yog Ixayees Tus Tswv tau hais li no lawm.