Axilias Yuav Kov Yeej Iziv Thiab Khuj Tebchaws.

1 Xyoo uas tus thawj tswjhwm uas cov Axilias tus vajntxwv Xakoos txib tuaj tau tuaj txog lub moos Asadaus thiab ua rog txeeb tau lub moos ntawd, 2 lub sijhawm ntawd (יחוח)Yahweh tau hais rau Amoj tus tub Isayah hais tias, cia li mus es hle tej khaub seev tsaj ntawm koj lub cev thiab hle khau ntawm koj txhais kotaw tseg. Mas nws kuj ua raws li ntawd liab qab mus kev tsis rau khau.

3 (יחוח)Yahweh hais tias, kuv tus tub qhe Isayah mus liab qab thiab tsis rau khau tau peb xyoos li cas, yog ua txujci piv txog xwm txheej uas yuav los raug Iziv thiab Khuj.

4 Mas ib yam li ntawd cov Axilias tus vajntxwv yuav ntes cov Iziv coj mus thiab muab cov Khuj kuav kiag mus, tsis hais cov laus cov tub ntxhais hluas yuav muab coj mus liab qab tsis rau khau, pobtw liab ploog ua rau cov Iziv txaj muag kawg.

5 Mas cov uas vam Khuj thiab khav txog Iziv yuav poob siab nthav thiab raug txaj muag.

6 Hnub ntawd cov tibneeg uas nyob ntawm ntug hiavtxwv no yuav hais tias, saib maj, cov uas peb cia siab thiab peb mus nrhiav kom pab peb dim Axilias tus vajntxwv, twb raug xwm txheej li no lawm. Mas peb nev, peb yuav dim tau li cas?