Tej Lus Uas Hais Txog Iziv

1 Tej lus uas hais txog Iziv. Saib maj, (יחוח)Yahweh caij huab cua nrawm kawg los rau hauv Iziv, mas Iziv tej dab mlom yuav tshee hnyo ntawm (יחוח)Yahweh xubntiag, thiab cov tibneeg Iziv lub siab yuav yaj tag. 2 Kuv yuav tshum cov Iziv kom lawv rov ua rog rau lawv, mas kwvtij yuav ntaus kwvtij, txhua tus yuav ntaus nws kwvtij zej zog, ib lub moos yuav ntaus ib lub moos thiab ib lub tebchaws yuav ntaus ib lub tebchaws. 3 Mas cov Iziv yuav tws kev nkaus tsis muaj siab ua abtsi, thiab kuv yuav ua kom lawv tej haujlwm uas lawv npaj tseg ntxhov tag ua tsis tau. Lawv yuav sablaj ntxig nug rau lawv tej dab mlom thiab rau lawv tej txiv neeb txiv yaig thiab tej uas txawj yees siv txawj tshuaj sij.

4 Kuv yuav muab cov Iziv cob rau ib Tug Tswv uas siab tawv heev mas ib tug vajntxwv uas nyaum heev yuav kav rawv lawv. Tus Tswv uas yog (יחוח)Yahweh tus muaj hwj chim loj kawg nkaus hais li no ntag. 5 Dej hiavtxwv yuav qhuav thiab tus niag dej yuav qhuav qhawv. 6 Tej kwj ha yuav tsw lwj ntxiag, thiab tej ceg dej uas los tshuam tus dej Nais hauv Iziv los yuav yau zuj zus thiab qhuav tag. Tej tauj deg thiab tej tauj iab yuav tuag tshav qhuav tag. 7 Tej nroj tsuag uas nyob raws ob sab ntug dej Nais thiab txhua yam qoob loo uas tseb raws ntug dej Nais kuj yuav qhuav tag thiab cua yuav muab ntsawj ya ploj tag.

8 Cov tibneeg muab ntses yuav quaj lwj siab ntsuav, yog txhua tus uas nuv ntses hauv tus dej Nais. Cov uas ntaus vas hauv tus dej yuav qaug zog zis. 9 Cov tub zog uas tshuab ntuag thiab cov uas ntos ntaub xov paj yuav poob siab tag.

10 Cov uas ntos ntaub hauv lub tebchaws yuav tws kev nkaus, thiab txhua tus uas ua dag ua zog yuav txhawj xeeb. 11 Cov thawj coj hauv lub moos Xau‑as ruam kawg li, Falaus cov tuav xam uas txawj ntse kuj taw qhia tej yam uas tsis muaj qabhau li. Nej yuav ua li cas hais rau Falaus tias, kuv yog cov uas txawj ntse li tub, kuv yog cov vajntxwv thaum ub caj ces? 12 Nej cov tub txawj ntse nyob qhovtwg? Tiamsis lawv hais rau nej thiab qhia tseeb hais tias (יחוח)Yahweh uas muaj hwjchim loj kawg nkaus xav tseg li cas rau Iziv. 13 Cov thawj coj hauv lub moos Xau‑as rov ua tibneeg ruam lawm, thiab cov thawj coj hauv lub moos Meefis raug ntxias tau lawm. Cov uas ua Iziv txhua xeem daim lag zeb tiag taw twb coj Iziv yuam kev lawm.

14 (יחוח)Yahweh ua rau lawv lub siab ywj fab ywj fwj, thiab lawv ua rau cov Iziv ua txhua yam yuam kev ntsuav, ib yam nkaus li tus qaug cawv ntog puj poog saum nws cov ntuav. 15 Tsis muaj ib yam abtsi uas yuav ua pab tau Iziv, tsis hais lub taubhau thiab kotw, lossis nplooj toov laj thiab tauj deg, los yeej pab tsis tau. 16 Hnub ntawd cov Iziv yuav zoo yam nkaus li tej pojniam. Lawv yuav ntshai tshee hnyo rau (יחוח)Yahweh uas muaj hwjchim loj kawg nkaus txhais tes uas nyem nrig saum lawv. 17 Thiab Yahdah lub tebchaws yuav ua cov Iziv lub chaw ntshai. Thaum hais txog Yahdah lub npe rau leejtwg hnov, lawv kuj ntshai vim tej uas (יחוח)Yahweh tus muaj hwjchim loj kawg nkaus twb npaj tseg yuav ua rau lawv.

18 Hnub ntawd yuav muaj tsib lub moos hauv Iziv tebchaws uas hais Khana‑as li lus thiab cog lus tias lawv ntseeg (יחוח)Yahweh uas muaj hwjchim loj kawg nkaus. Mas tej moos ntawd yuav muaj ib lub hu ua lub moos Nkauj Hnub.

19 Hnub ntawd yuav muaj ib lub thaj xyeem rau (יחוח)Yahweh nyob hauv nruab nrab Iziv tebchaws, thiab yuav muaj ib tug ncej rau (יחוח)Yahweh nyob ntawm ciam teb. 20 Tus ncej ntawd yuav ua tsoob zeej tim khawv rau (יחוח)Yahweh uas muaj hwjchim loj kawg nkaus rau hauv Iziv tebchaws. Thaum lawv raug quab yuam lawv thov hu  (יחוח)Yahweh mas nws yuav txib ib tug cawmseej mas nws yuav tsom kwm lawv thiab cawm lawv dim.

21 (יחוח)Yahweh yuav qhia kom cov Iziv paub nws,mas hnub ntawd cov Iziv yuav paub (יחוח)Yahweh thiab yuav muab qhov txhia chaw xyeem thiab ua kevcai hlawv xyeem pe hawm (יחוח)Yahweh, thiab lawv yuav yeem lus rau (יחוח)Yahweh thiab yuav ua raws li lawv yeem lus lawd.

22 (יחוח)Yahweh yuav nplawm cov Iziv, nws yuav nplawm kom mob thiab yuav kho kom zoo. Lawv yuav tig rov los cuag (יחוח)Yahweh, mas nws yuav mloog lawv tej lus thov thiab yuav kho lawv zoo. 23 Hnub ntawd yuav muaj ib txoj niag kev ntawm Iziv mus txog Axilias tebchaws, cov Axilias yuav tuaj rau hauv Iziv thiab cov Iziv yuav mus rau hauv Axilias. Mas cov Iziv yuav nrog cov Axilias pe hawm (יחוח)Yahweh ua ke.

24 Hnub ntawd Ixayees yuav ua tus peb ntawm Iziv thiab Axilias, thiab yuav ua koob hmoov hauv plawv lub ntiajteb, 25 yog cov uas (יחוח)Yahweh uas muaj hwjchim loj kawg nkaus foom koob hmoov hais tias, Iziv uas yog kuv haiv neeg thiab Axilias uas yog kuv tes haujlwm thiab Ixayees uas yog kuv qub txeeg qub teg puavleej tau hmoov zoo.