Tej Lus Uas Hais Txog Khuj Tebchaws

1 Lub tebchaws uas muaj kooj tis ntxuaj nrov voog uas nyob dhau tus dej hauv Khuj tebchaws es, 2 koj xa tub tshaj xo mus hauv hiavtxwv, yog caij lub nkoj uas xuas pias iav ua. Nej uas yog tub tshaj xo sai, nej cia li mus cuag ib haiv neeg uas lub cev siab siab thiab daim tawv nqaij mos nyoos, yog haiv neeg uas luag nyob ze nyob deb los ntshai, yog haiv neeg uas muaj zog thiab pheej kov yeej thiab muaj dej quas lawv lub tebchaws.

3 Nej sawvdaws uas nyob hauv qab ntuj, nej cov uas nyob hauv lub ntiajteb, thaum uas tsa tus chij saum tej roob, nej cia li tsa muag ntsia. Thaum tshuab raj xyu, nej cia li mloog.

4 Vim (יחוח)Yahweh hais li no rau kuv tias, kuv yuav nyob twjywm ntawm kuv lub chaw nyob saib tuaj, zoo yam nkaus li duab tshav ntuj ci laim txias thaum tshav ntuj kub, thiab ib yam nkaus li huab zeeg niab nrog lwg thaum lub caij sau qoob. 5 Thaum tsis tau txog lub caij sau qoob uas paj nra dua lawm thiab txiv hmab tabtom siav, (יחוח)Yahweh yuav muab rab liag los tav tej ntsuag uas hlav, thiab yuav txiav tej ceg uas tabtom nthuav pov tseg.

6 Mas lawv sawvdaws yuav raug muab pov tseg huvsi rau tej dav noj twm pem tej roob thiab rau tej tsiaj qus hauv ntiajteb, mas dav noj twm yuav muab noj rau lub caij ntuj kub, thiab tej tsiaj qus huvsi hauv ntiajteb yuav muab noj rau lub caij ntuj no.

7 Mas thaum ntawd lawv yuav coj tshav ntuj tuaj pub rau (יחוח)Yahweh uas muaj hwjchim loj kawg nkaus, yog coj ntawm ib haiv neeg uas lub cev siab siab thiab daim tawv nqaij mos nyoos tuaj, yog haiv neeg uas luag nyob ze nyob deb los ntshai, yog haiv neeg uas muaj zog thiab pheej kov yeej thiab muaj dej quas lawv lub tebchaws, coj mus txog lub roob Xi‑oo uas yog (יחוח)Yahweh uas muaj hwjchim loj kawg nkaus lub npe lub chaw nyob.