Tej Lus Uas Hais Txog  Damaxakas

1 Tej lus uas hais txog lub nroog Damaxakas. Saib maj, Damaxakas yuav tsis tau ua lub nroog lawm yuav pob tag ua tej niag pawg cia.

2 Alau‑aws tej moos yuav nyob do cuas cia mus ib txhis, yuav ua chaw rau yaj rau tshis nyob thiab pw, tsis muaj leejtwg yuav ua rau tej tsiaj ntawd ntshai.

3 Tej chaw ruaj khov hauv Efa‑is yuav ploj tag, thiab tej hwjchim uas kav tebchaws yuav ploj tag hauv Damaxakas mus. Thiab cov Alas uas tseem tshuav nyob yuav zoo ib yam li cov Ixayees uas poob koob meej. (יחוח)Yahweh uas muaj hwjchim loj kawg nkaus hais li no ntag.

​

Txiav Txim Rau Cov Ixayees

4 Txog hnub ntawd Yakhauj lub meej mom yuav poob qes thiab nws lub cev uas rog yuav yuag.

5 Yuav zoo yam nkaus li thaum tus hlais qoob mus sau tej teg qoob uas muab tsa cia thiab nws txhais tes nruam tej hnab mog, thiab zoo yam li thaum ib tug xawb tej hnab qeb hauv hav Lefa‑is.

6 Yuav tshuav ib txhia nyob hauv, ib yam nkaus li thaum ntaus tsob txiv aulib zeeg mas tseem tshuav ob peb lub nyob saum ntsis ceg, lossis tshuav plaub tsib lub nyob saum tej ceg ntoo. (יחוח)Yahweh uas yog Ixayees Tus Tswv hais li no ntag.

7 Hnub ntawd tej tibneeg yuav muab siab rau rau tus uas tsim lawv, thiab lawv yuav tsa qhov muag saiv ntsoov tus Dawbhuv hauv cov Ixayees.

8 Lawv yuav tsis quav ntsej tej thaj teev dab uas lawv txhais tes ua, thiab lawv yuav tsis ntsia ntsoov tej uas lawv xuas ntiv tes ua, tsis hais tej ncej dab Aselas lossis tej thaj hlawv hmoov xyab.

9 Hnub ntawd lawv tej moos uas muaj ntsa loog ruaj khov yuav zoo yam nkaus li cov Hivais thiab cov Amaulais tej chaw uas nyob do cuas cia, yog tej chaw uas lawv muab tso tseg vim cov tibneeg Ixayees. Tsuas yog muaj nyob do cuas cia xwb.

10 Nej tsis nco qab (יחוח)Yahweh uas cawm nej dim thiab tsis nco ntsoov txhib zeb uas yog nej lub chaw cawm siav. Txawm yog nej cog qoob loo zoo thiab cog tej ceg ntoo uas teev lwm haiv neeg li dab, 11 txawm yog hnub uas nej cog nej ua kom tuaj thiab hlob, thiab ua kom tawg paj rau tagkis uas nej tseb, los tej ntawd yuav khiav tag nej tsis tau sau, tsuas muaj hnub uas lwj siab thiab muaj mob kho tsis tau xwb.

12 Muaj suab nrov ntsoog qees ntawm ntau haiv neeg tuaj, lawv tej suab nrov vig voog yam li hiavtxwv ntas. Muaj suab nyooj luj laws hauv tej tebchaws tuaj, lawv tej suab nyooj luj laws nrov yam li dej ntsawj.

13 Tej tebchaws nyooj luj laws yam nkaus li dej ntsawj nrov, tiamsis (יחוח)Yahweh yuav txwv mas lawv yuav khiav mus deb, thiab yuav raug muab raws yam li tej npluag uas cua ntsawj ya saum tej roob thiab yam li tej cua daj cua dub ntsawj tej quav nyab.

14 Saib maj, thaum tsaus ntuj kuj muaj kev ntshai kawg li. Tsis tau kaj ntug twb tsis muaj lawv tag lawm. Cov tibneeg uas txeeb peb tej qhov txhia chaw thiab cov uas lws peb yuav raug tej xwm txheej no.