1 Lawv tau xa menyuam yaj ntawm lub moos Xelaj taug txojkev teb chaws moj sab qhua mus rau tus uas kav Ixayees tebchaws, yog xa mus rau Xi‑oo tus ntxhais.

2 Zoo yam nkaus li tej noog uas tabtom ya khiav thiab zoo yam li tej menyuam noog uas poob ntawm lub zes, mas Mau-as tej ntxhais zoo ib yam li ntawd rau ntawm tej chaw hla tus dej Anoos.

3 Cov Mau-as hais tias, thov koj nrog peb sablaj, thov pub kev ncaj ncees rau peb, thov koj ua ntxoov ntxoo roos peb ib yam li tsaus ntuj rau thaum tav su, thov pab zais peb uas raug luag raws, thov tsis txhob ntxeev siab rau cov uas tuaj cawm siav.

4 Thov cia Mau-as cov tibneeg uas raug luag caum, nyob hauv koj nruab nrab, thov koj ua chaw cawm siav tiv thaiv lawv dim ntawm tus uas ua kom puam tsuaj. Thaum uas tsis muaj leejtwg quab yuam lawm thiab tseg tsis ua kev puam tsuaj lawm, thiab thaum tus uas tsuj yuam nej tau ploj hauv lub tebchaws lawm, 5 mas thaum ntawd yuav tsa ib lub zwm txwv uas muaj txojkev hlub ruaj khov, thiab Davi‎v caj ces muaj ib tug yuav nyob saum ua ncaj ua ncees. Nws yuav txiav txim ncaj thiab maj nroos ua ncaj ncees.

6 Peb tau hnov txog cov Mau-as txojkev khav theeb, lawv yeej khav theeb tiag tiag, thiab hnov txog qhov uas lawv muab hlob, lawv khav theeb thiab lawv muaj muaj plhus, los tej uas lawv khav ntawd tsis muaj tseeb.

7 Vim li ntawd Mau-as yuav quaj nyiav, txhua tus yuav rov quaj nyiav Mau-as. Cia li quaj ntsuag lwj siab ntsuav nco txog tej ncuav txiv hmab qhuav hauv lub moos Khihalexes.

8 Tej liaj teb ntawm lub moos Hesanpoos thiab tej txiv hmab ntawm lub moos Ximas liamsim tag, cov thawj uas kav tej tebchaws muab tej ceg txiav pov  tseg tag, yog tej ceg uas txeev hla mus txog lub moos Yaxaws thiab nthuav mus txog tebchaws moj sab qhuav. Nws tej ntsuag hlav nthuav mus thiab mus dhau dej hiavtxwv.

9 Vim li ntawd kuv thiaj quaj ib yam li cov tibneeg hauv lub moos Yaxaws quaj tej txiv hmab ntawm Ximas. Hesanpoos thiab Ele‑ales es, kuv kua muag ntub neb tag vim yog lub suab qw zoo siab rau tej txiv uas siav lawm thiab tej qoob uas neb sau tau lawm tu nrho lawm.

10 Luag muab kev xyiv fab kev zoo siab rho hauv tej teb uas ntsu qoob lawm, tsis muaj leejtwg hu nkauj hauv tej vaj txiv hmab, tsis muaj leejtwg qw zoo siab, tsis muaj leejtwg tsuam kua txiv hmab ntawm tej qhov tsuam, lub suab uas qw tsuam txiv hmab ntsiag to li lawm.

11 Vim li no kuv lub siab thiaj li quaj ib yam li nkauj nog ncas rau Mau-as thiab kuv tus ntsuj plig quaj rau lub moos Khiheles.

12 Thaum Mau-as mus cuag dab thiab nws txog siav rau ntawm lub chaw siab uas teev dab, thaum nws mus thov rau ntawm lub tsev dab nws kuj tsis tau abtsi li.

13 Tej no yog tej lus uas (יחוח)Yahweh hais txog Mau-as yav thaum ub.

14 Tiamsis nimno (יחוח)Yahweh hais tias, Hauv peb xyoos raws li uas cog lus ntiav tub zog, txawm yog Mau-as pab tibneeg coob coob los nws lub koob meej yuav raug saib tsis taus thiab cov uas tshuav nyob los kuj tsawg tsawg thiab tsis muaj zog.