Tej Lus Uas Hais Txog Mau-as

1 Tej lus uas hais txog Mau-as. Vim yog tib hmos xwb lub moos As raug puam tsuaj, Mau-as thiaj liamsim tag. Vim yog tib hmos xwb lub moos Khis raug puam tsuaj, Mau-as thiaj liamsim tag.

2 Cov tibneeg hauv lub moos Dinpoos tau nce mus quaj qw saum lub chaw siab uas teev dab. Mau-as quaj nyiav txog lub moos Nenpaus thiab lub moos Medenpas. Lawv txhua lub taubhau do cuas thiab muab hwj txwv chais du lug huvsi.

3 Lawv hnav khaub seev tsaj nyob hauv tej kev, txhua tus quaj nyiav kua muag ntws lug saum tej tsev thiab tom tej tshav puam.

4 Lub moos Hesanpoos thiab lub moos Ele‑ales quaj qw, lawv lub suab quaj nrov mus txog lub moos Yahaj. Vim li ntawd Mau-as cov tub rog uas tuav cuab yeej thiaj li quaj nrov ua siab tshee hnyo.

5 Kuv quaj mob siab cov Mau-as. Mau-as cov tibneeg khiav mus cawm siav rau lub moos Xau‑as thiab lub moos Elaselisiyas. Lawv quaj taug kev nce mus txog lub moos Luhij, lawv tsa suab quaj tej kev puam tsuaj taug kev mus txog lub moos Haulauna‑is.

6 Tus dej ntawm Nilis kuj qhuav tag, tej nyom kuj qhuav qhawv, tsis hlav tej zaub mos, tsis tshuav tej zaub uas ntsuab li lawm.

7 Tej uas lawv khwv tau ntau nplua mias thiab tej uas lawv sau khaws cia, lawv kuj thauj mus hla tus dej Ntoo Lwg Zaj.

8 Lub suab quaj nrov thoob plaws Mau-as tebchaws, lub suab nyiav nrov mus txog lub moos Ela‑is, thiab nrov mus txog lub moos Npe‑awelis, 9 rau qhov muaj ntshav puv nkaus tus dej hauv lub moos Dimoos, txawm yog li ntawd los kuv tseem yuav tsav ntxiv vij sub vij sw rau Dimoos dua thiab. Kuv yuav tso tsov ntxhuav tom cov Mau-as uas khiav dim thiab tom cov uas tseem tshuav nyob hauv lub tebchaws.